ສະພາສາມັນອັງກິດ ເຫັນພ້ອມຮ່າງກົດໝາຍຫ້າມເຍົາວະຊົນສູບຢາ
ສະມາຊິກສະພາສາມັນຂອງອັງກິດ ມີມະຕິເຫັນພ້ອມຮ່າງກົດໝາຍຊັ້ນນໍາລະດັບໂລກ ເຊິ່ງມີເປົ້າໝາຍເພື່ອຢຸດການສູບຢາ ໂດຍປ້ອງກັນບໍ່ໃຫ້ເຍົາວະຊົນສາມາດຊື້ຢາສູບໄດ້.
ໃນການລົງມະຕິຄັ້ງທໍາອິດ ສະມາຊິກສະພາສາມັນ 415 ຄົນ ເຫັນພ້ອມໃຫ້ຮ່າງກົດໝາຍຢາສູບ ແລະ ຢາສູບໄຟຟ້າ ເຂົ້າສູ່ຂັ້ນຕອນຕໍ່ໄປຂອງຂະບວນການທາງນິຕິບັນຍັດ ໂດຍມີຜູ້ບໍ່ເຫັນພ້ອມພຽງ 47 ສຽງ.
ຮ່າງກົດໝາຍດັ່ງກ່າວຈະປ້ອງກັນບໍ່ໃຫ້ຜູ້ທີ່ເກີດຫລັງວັນທີ 1 ມັງກອນ 2009 ສູບຢາໄດ້ຢ່າງຖືກກົດໝາຍ ໂດຍທາງການອັງກິດຈະຄ່ອຍໆເພີ່ມອາຍຸຂັ້ນຕໍ່າທີ່ສາມາດຊື້ຢາສູບໄດ້ ເຊິ່ງລັດຖະບານອັງກິດລະບຸວ່າ: ມີເປົ້າໝາຍຈະສ້າງຄົນລຸ້ນໃໝ່ບໍ່ສູບຢາກຸ່ມທໍາອິດຂອງປະເທດ.
ຂໍ້ສະເໜີດັ່ງກ່າວຄ້າຍຄືຮ່າງກົດໝາຍທີ່ສະເໜີໂດຍລັດຖະບານອະນຸລັກນິຍົມຊຸດກ່ອນ ເຊິ່ງຖືກໂຈະໄວ້ໃນຕົ້ນປີຜ່ານມາ ເມື່ອທ່ານ ຣິຊີ ຊູແນັກ ນາຍົກລັດຖະມົນຕີອັງກິດ ໃນເວລານັ້ນ ຮຽກຮ້ອງໃຫ້ມີການເລືອກຕັ້ງທົ່ວໄປກ່ອນກໍານົດ.
ເຖິງຢ່າງໃດກໍຕາມ, ທ່ານ ເຊີ ເຄຍ ສະຕາຣເມີ ນາຍົກລັດຖະມົນຕີອັງກິດຄົນປັດຈຸບັນ ແລະ ຜູ້ນໍາລັດຖະບານແຮງງານຊຸດໃໝ່ ນໍາເອົາຂໍ້ສະເໜີດັ່ງກ່າວກັບມາອີກ ຕາມສ່ວນໜຶ່ງຂອງຄວາມພະຍາຍາມໃນການຍົກລະດັບມາດຕະການປ້ອງກັນດ້ານສຸຂະພາບ ແລະ ຫລຸດແຮງກົດດັນໃນໄລຍະຍາວ ຕໍ່ໜ່ວຍງານບໍລິການສຸຂະພາບແຫ່ງຊາດ (NHS).
ນອກຈາກນີ້, ຮ່າງກົດໝາຍສະບັບໃໝ່ຈະກໍານົດຂໍ້ຈໍາກັດກ່ຽວກັບການໂຄສະນາ ແລະ ການສະໜັບສະໜູນຢາສູບໄຟຟ້າ ຕະຫລອດຈົນການຈໍາກັດລົດຊາດ, ການນໍາສະເໜີ ແລະ ການຫຸ້ມຫໍ່ຂອງຢາສູບໄຟຟ້າ ເພື່ອຫລຸດການດຶງດູດໃຈຕໍ່ເດັກ ແລະ ເຍົາວະຊົນ. ອີກທັງລັດຖະບານອັງກິດຍັງປະກາດວ່າ: ຢາສູບໄຟຟ້າແບບໃຊ້ເທື່ອດຽວຖິ້ມຈະຖືກຫ້າມນໍາໃຊ້ໃນປີໜ້າ ພາຍໃຕ້ກົດໝາຍແຍກຕ່າງຫາກ.
