ເກີດຫຍັງຂຶ້ນຢູ່ປາກິດສະຖານ ? ພາຍຫລັງເມືອງຫລວງລັອກດາວ ຕັດອິນເຕີເນັດ ຜູ້ປະທ້ວງປະທະຕໍາຫລວດ ສັນຍານປະຊາທິປະໄຕສັ່ນຄອນ

November 27, 2024 - 11:17 AM

ການເມືອງຢູ່ປາກິດສະຖານກໍາລັງຢູ່ໃນຈຸດດຸເດືອດຄັ້ງໜຶ່ງໃນປະຫວັດສາດ ເມື່ອຜູ້ສະໜັບສະໜູນທ່ານ ອິມຣານ ຂ່ານ ອະດີດນາຍົກລັດຖະມົນຕີຂອງປາກິດສະຖານ ອອກມາປະທ້ວງທົ່ວປະເທດເພື່ອຮຽກຮ້ອງການປ່ອຍຕົວທ່ານ ຂ່ານ ແລະ ຈັດເລືອກຕັ້ງໃໝ່. ເຫດການທີ່ເກີດຂຶ້ນນີ້ບໍ່ພຽງແຕ່ສະທ້ອນເຖິງຄວາມຂັດແຍ່ງທາງໂຄງສ້າງຂອງການເມືອງຢູ່ປາກິດສະຖານ, ແຕ່ຍັງເປັນສັນຍານເຕືອນເຖິງຄວາມທ້າທາຍຂອງປະຊາທິປະໄຕໃນປະເທດທີ່ເຕັມໄປດ້ວຍຄວາມບໍ່ສະຫງົບ.

ເກີດຫຍັງຂຶ້ນ ?

ການປະທ້ວງເລີ່ມຮຸນແຮງຂຶ້ນໃນທ້າຍເດືອນພະຈິກນີ້ ເມື່ອຜູ້ສະໜັບສະໜູນຂອງທ່ານ ຂ່ານ ປະກາດເດີນຂະບວນຄັ້ງໃຫຍ່ ແລະ ລວມຕົວຢູ່ນະຄອນຫລວງອິດສະລາມາບັດ ເຊິ່ງໄດ້ກາຍເປັນຈຸດສູນກາງຂອງຄວາມເຄັ່ງຕຶງໃນເວລານີ້.

ລັດຖະບານໄດ້ປິດກັ້ນເສັ້ນທາງສໍາຄັນ ແລະ ຈັດຕັ້ງຈຸດກວດຫລາຍຈຸດເພື່ອສະກັດກັ້ນກຸ່ມຜູ້ຊຸມນຸມ. ຂະນະທີ່ເມືອງໃຫຍ່ອື່ນໆເຊັ່ນ: ລາຮໍ, ກາຣາຈີ ແລະ ເປຊະວາ ກໍມີການຊຸມນຸມໃນລັກສະນະດຽວກັນ ໂດຍຢູ່ບາງພື້ນທີ່ຜູ້ປະທ້ວງມີການປະທະກັບເຈົ້າໜ້າທີ່ ແລະ ມີລາຍງານວ່າເຈົ້າໜ້າທີ່ໄດ້ໃຊ້ແກັສນໍ້າຕາສະຫລາຍການຊຸມນຸມ.

ເບື້ອງຕົ້ນມີລາຍງານຜູ້ເສຍຊີວິດຈາກການປະທະແລ້ວຢ່າງໜ້ອຍ 6 ຄົນ, ຂະນະທີ່ມີຜູ້ໄດ້ຮັບບາດເຈັບຫລາຍສິບຄົນ ລວມທັງນັກຂ່າວທີ່ຖືກທໍາຮາຍຮ່າງກາຍລະຫວ່າງລາຍງານຂ່າວ.

ນອກຈາກນີ້, ຍັງມີການປິດຖະໜົນສາຍສໍາຄັນ ເຮັດໃຫ້ການເດີນທາງລະຫວ່າງເມືອງກາຍເປັນເລື່ອງຍາກລໍາບາກ ລວມທັງມີການຢຸດໃຫ້ບໍລິການໂທລະສັບມືຖື ແລະ ອິນເຕີເນັດໃນຫລາຍພື້ນທີ່ ສົ່ງຜົນເຮັດໃຫ້ປະຊາຊົນບໍ່ສາມາດຕິດຕໍ່ສື່ສານ ຫລື ເຮັດທຸລະກໍາໄດ້, ສ່ວນໂຮງຮຽນ ແລະ ມະຫາວິທະຍາໄລຫລາຍແຫ່ງຕ້ອງປິດການຮຽນການສອນເພື່ອຄວາມປອດໄພ.

ຜູ້ປະທ້ວງຕ້ອງການຫຍັງ ?

ຜູ້ປະທ້ວງທີ່ເປັນກຸ່ມຜູ້ສະໜັບສະໜູນທ່ານ ຂ່ານ ມາຍາວນານໄດ້ອອກມາຮຽກຮ້ອງໃຫ້ປ່ອຍຕົວທ່ານ ຂ່ານ ແລະ ນັກການເມືອງຝ່າຍຄ້ານທີ່ຖືກຈັບ, ພວກເຂົາເບິ່ງວ່າທ່ານ ຂ່ານ ເປັນຕົວແທນຂອງການຕໍ່ສູ້ນໍາການສໍ້ລາດບັງຫລວງ ແລະ ການປະຕິຮູບລະບົບການເມືອງທີ່ເຕັມໄປດ້ວຍອິດທິພົນຂອງກຸ່ມຊົນຊັ້ນສູງ.

ນອກຈາກນີ້, ກຸ່ມຜູ້ປະທ້ວງຕ້ອງການໃຫ້ລັດຖະບານຂອງທ່ານ ເຊບາຊ ຊາຣີບ ນາຍົກລັດຖະມົນຕີປາກິດສະຖານ ຢຸດການບໍລິຫານປະເທດທັນທີ ເນື່ອງຈາກເບິ່ງວ່າຂາດຄວາມຍຸຕິທໍາໃນການຂຶ້ນສູ່ອໍານາດ.

ໂດຍພວກເຂົາເຊື່ອວ່າການເລືອກຕັ້ງຄັ້ງກ່ອນໜ້ານີ້ເຕັມໄປດ້ວຍການແຊກແຊງຈາກກອງທັບ ແລະ ບໍ່ໂປ່ງໃສ ແລະ ຮຽກຮ້ອງໃຫ້ມີການເລືອກຕັ້ງທົ່ວໄປຄັ້ງໃໝ່ພາຍໃຕ້ການເບິ່ງແຍງຂອງໜ່ວຍງານອິດສະຫລະ ເພື່ອໃຫ້ໝັ້ນໃຈວ່າບໍ່ມີການໂກງ ຫລື ແຊກແຊງທາງການເມືອງ ເພາະການເລືອກຕັ້ງທີ່ໂປ່ງໃສຈະຊ່ວຍຄືນຄວາມເຊື່ອໝັ້ນໃຫ້ປະຊາຊົນ ແລະ ຢຸດຄວາມຂັດແຍ່ງທາງການເມືອງ.

ເປັນຫຍັງເຫດການຈຶ່ງຮຸນແຮງຂຶ້ນ ?

ລັດຖະບານຊຸດປັດຈຸບັນທີ່ມີທ່ານ ເຊບາຊ ຊາຣີບ ເປັນນາຍົກລັດຖະມົນຕີ ເບິ່ງວ່າການປະທ້ວງຄັ້ງນີ້ເປັນການກະທໍາທີ່ສ້າງຄວາມວຸ້ນວາຍທາງການເມືອງ ໂດຍມີເບື້ອງຫລັງຈາກວາລະທາງການເມືອງທີ່ຊົ່ວຮ້າຍ. ຂະນະທີ່ສື່ຫລາຍສໍານັກລາຍງານວ່າ ມີການໃຊ້ກໍາລັງຂອງເຈົ້າໜ້າທີ່ ໂດຍຕໍາຫລວດ ແລະ ກອງກໍາລັງຄວາມໝັ້ນຄົງໃຊ້ແກັສນໍ້າຕາ ແລະ ກີດຂວາງເສັ້ນທາງເພື່ອສະກັດກັ້ນຜູ້ຊຸມນຸມ. ຂະນະດຽວກັນ ມີການຂູ່ຈະໃຊ້ອາວຸດຖ້າຜູ້ປະທ້ວງໃຊ້ຄວາມຮຸນແຮງ.

ອ້າງອີງ: