ມອບໜ້າທີ່ປະທານກອງປະຊຸມລັດຖະມົນຕີ ປ້ອງກັນປະເທດອາຊຽນ ໃຫ້ ມາເລເຊຍ ເປັນເຈົ້າພາບ ໃນປີ 2025
ກອງປະຊຸມລັດຖະມົນຕີປ້ອງກັນປະເທດອາຊຽນ ຄັ້ງທີ 18, ກອງປະຊຸມລັດຖະມົນຕີປ້ອງກັນປະເທດອາຊຽນບວກ ຄັ້ງທີ 11 ແລະ ກອງປະຊຸມປິ່ນອ້ອມ ໄດ້ອັດລົງດ້ວຍຜົນສຳເລັດອັນຈົບງາມ ພາຍຫລັງດຳເນີນມາແຕ່ວັນທີ 19-22 ພະຈິກ 2024 ທີ່ນະຄອນຫລວງວຽງຈັນ ພາຍໃຕ້ຄໍາຂວັນ “ຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງອາຊຽນ”.
ທ່ານ ພົນເອກ ຈັນສະໝອນ ຈັນຍາລາດ ຮອງນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດ ແຫ່ງ ສປປ ລາວ ໄດ້ຖະແຫລງຜົນສຳເລັດ ວັນທີ 21 ພະຈິກ 2024 ວ່າ: ກອງປະຊຸມລັດຖະ ມົນຕີປ້ອງກັນປະເທດອາຊຽນ ຄັ້ງທີ 18 ໄດ້ຈັດຂຶ້ນໃນວັນທີ 20 ພະຈິກ 2024 ລວມມີ ບັນດາລັດຖະມົນຕີປ້ອງກັນປະເທດອາຊຽນ, ລວມທັງ ຕີມໍແລັດສະເຕ ໃນນາມເປັນປະເທດສັງເກດການ ແລະ ເລຂາທິການໃຫຍ່ອາຊຽນ, ພ້ອມຄະນະຜູ້ແທນເຂົ້າຮ່ວມ. ໄດ້ປຶກສາຫາລືຫລາຍວາລະທີ່ສໍາຄັນກອງປະຊຸມໄດ້ຮັບຮອງເອົາ ການປະເມີນຜົນກ່ຽວກັບການເຂົ້າຮ່ວມສັງເກດການ ຂອງໜ່ວຍງານຜູ້ຊ່ຽວ ຊານ ໃນຂອບກອງປະຊຸມລັດຖະມົນຕີ ປ້ອງກັນປະເທດອາຊຽນບວກ ໃນຮອບວຽນປີ 2021-2023 ແລະ ການສະໝັກເຂົ້າຮ່ວມສັງເກດການຂອງໜ່ວຍງານດັ່ງກ່າວ ແລະ ໃນຮອບວຽນປີ 2024-2027; ສິ່ງສໍາຄັນທີ່ສຸດໃນກອງປະຊຸມຄັ້ງນີ້, ບັນດາປະເທດສະມາຊິກອາຊຽນ ໄດ້ເຫັນດີຢ່າງເປັນເອກະສັນ ແລະ ຮັບຮອງເອົາຖະແຫລງການຮ່ວມຂອງ ກອງປະຊຸມລັດຖະມົນຕີ ປ້ອງກັນປະເທດອາຊຽນ ຄັ້ງທີ 18 ເຊິ່ງເອີ້ນວ່າ: “ຖະແຫລງການຮ່ວມວຽງຈັນ ຂອງລັດຖະມົນຕີປ້ອງກັນປະເທດອາຊຽນ ວ່າດ້ວຍຮ່ວມມືກັນເພື່ອສັນຕິພາບ, ຄວາມໝັ້ນຄົງ ແລະ ຄວາມເຂັ້ມແຂງຂອງອາຊຽນ”.
ນອກຈາກກອງປະຊຸມລັດຖະມົນຕີ ປ້ອງກັນປະເທດອາຊຽນ, ວັນທີ 21 ພະຈິກ 2024, ກະຊວງປ້ອງກັນປະເທດ ຍັງໄດ້ເປັນເຈົ້າພາບ ແລະ ເປັນປະທານກອງປະຊຸມລັດຖະມົນຕີ ປ້ອງກັນປະເທດອາຊຽນບວກ ຄັ້ງທີ 11 ໂດຍການເຂົ້າຮ່ວມຂອງ ລັດຖະມົນຕີປ້ອງກັນປະເທດ ຂອງບັນດາປະເທດສະມາຊິກອາຊຽນບວກ ທັງໝົດ 18 ປະເທດ. ໃນນັ້ນ ມີ 10 ປະເທດສະມາຊິກອາຊຽນ ແລະ ອີກ 8 ປະເທດບວກ ຄື: ອົດສະຕຣາລີ, ຈີນ, ອິນເດຍ, ສ ເກົາຫລີ, ຍີ່ປຸ່ນ, ນິວຊີແລນ, ຣັດເຊຍ ແລະ ອາເມລິກາ. ນອກນັ້ນ, ຍັງມີ ຕີມໍແລັດສະເຕ ໃນນາມປະເທດສັງເກດການ ແລະ ເລຂາທິການໃຫ່ຍອາຊຽນ; ກອງປະຊຸມໄດ ຮັບຮອງເອົາ ຖະແຫລງການຮ່ວມຂອງລັດຖະມົນຕີ ປ້ອງກັນປະເທດອາຊຽນບວກ ວ່າດ້ວຍການສ້າງຄວາມເຂັ້ມແຂງໃນການຮັບມືກັບໄພພິບັດ ທີ່ໄດ້ຮັບຜົນກະທົບຈາກການປ່ຽນແປງສະພາບດິນຟ້າອາ ກາດ ແລະ ໄພພິບັດທາງທໍາມະຊາດ, ລວມທັງການແລກປ່ຽນບົດຮຽນທີ່ດີ ແລະ ການສ້າງຂີດຄວາມສາມາດ.
ກະຊວງປ້ອງກັນປະເທດ ແຫ່ງ ສປປ ລາວ ໄດ້ມອບໂອນການເປັນປະທານກອງປະຊຸມລັດຖະມົນຕີ ປ້ອງກັນປະເທດອາຊຽນ ຄັ້ງທີ 19 ແລະ ກອງປະຊຸມລັດຖະມົນຕີ ປ້ອງກັນປະເທດອາຊຽນບວກ ຄັ້ງທີ 12 ໃຫ້ກະຊວງປ້ອງກັນປະເທດ ແຫ່ງ ມາເລເຊຍ ສືບຕໍ່ເປັນເຈົ້າພາບ ໃນປີ 2025. ນອກຈາກນີ້, ຍັງມີກອງປະຊຸມບໍ່ເປັນທາງການ ຂອງລັດຖະມົນຕີປ້ອງກັນປະເທດອາຊຽນ-ສປ ຈີນ ແລະ ອາຊຽນ-ສ ອາເມລິກາ ເພື່ອປຶກສາຫາລືກ່ຽວກັບການຮ່ວມມືດ້ານວຽກງານປ້ອງກັນຊາດ ລະຫວ່າງ ອາຊຽນ ກັບສອງປະເທດຕື່ມອີກ.
ທີ່ມາ: ປະເທດລາວ
