WHO ອະນຸມັດວັກຊີນປ້ອງກັນພະຍາດໝາກສຸກລີງຊະນິດທີ 2 ຂອງໂລກ

      ອົງການອະນາໄມໂລກ (WHO) ອະນຸມັດວັກຊີນປ້ອງກັນພະຍາດໝາກສຸກລີງຂອງບໍລິສັດການຢາຍີ່ປຸ່ນ ເຄເອັມ ໄບໂອໂລຈິກສ໌ ເພື່ອໃຊ້ໃນກໍລະນີສຸກເສີນ ໂດຍເປັນວັກຊີນສໍາລັບພະຍາດໝາກສຸກລີງຊະນິດທີ 2 ທີ່ໄດ້ຮັບການຮັບຮອງ.

      ອົງການອະນາໄມໂລກ ລະບຸໃນຖະແຫລງການວ່າ: ອະນຸມັດໃຫ້ວັກຊີນ LC16M8 ຢູ່ໃນບັນຊີວັກຊີນສໍາລັບກໍລະນີສຸກເສີນດ້ານສາທາລະນະສຸກລະດັບໂລກ ຫລື Emergency Use Listing Procedure (EUL) ເພື່ອໃຫ້ປະເທດທີ່ຕ້ອງການວັກຊີນດັ່ງກ່າວ ເພື່ອປ້ອງກັນພະຍາດໝາກສຸກລີງ ສາມາດເຂົ້າເຖິງວັກຊີນໄດ້ຫລາຍຂຶ້ນ ແລະ ທັນທີ.

      ຍິ່ງໄປກວ່ານັ້ນ, ບັນຊີຢາສໍາລັບກໍລະນີສຸກເສີນຂອງ WHO ເປີດທາງໃຫ້ປະເທດຕ່າງໆທົ່ວໂລກ ອະນຸມັດ ແລະ ນໍາເຂົ້າວັກຊີນເພື່ອຈໍາໜ່າຍໄດ້ຢ່າງວ່ອງໄວຂຶ້ນ.

      ກ່ອນໜ້ານີ້, WHO ຮັບຮອງວັກຊີນປ້ອງກັນພະຍາດໝາກສຸກລີງ MVA-BN ຂອງບໍລິສັດບາວາຣຽນ-ນໍດິກ ຈາກດານມາກ ໃນເດືອນກັນຍາຜ່ານມາ ເພື່ອຊ່ວຍຍົກລະດັບການຕໍ່ສູ້ການລະບາດຂອງເຊື້ອໄວຣັສພະຍາດໝາກສຸກລີງ ເຄລດ1ບີ ເຊິ່ງເປັນເຊື້ອສາຍພັນໃໝ່.

      ລາຍງານຂອງ WHO ລະບຸວ່າ: ມາຮອດປັດຈຸບັນ ມີການພົບຜູ້ຕິດເຊື້ອຈາກເຊື້ອສາຍພັນດັ່ງກ່າວ ແລະ ສາຍພັນອື່ນຂອງພະຍາດໝາກສຸກລີງຢ່າງໜ້ອຍ 80 ປະເທດ ໂດຍ 19 ປະເທດຢູ່ອາຟຣິກາ.

      ຂະນະທີ່ຄອງໂກຍັງເປັນປະເທດທີ່ໄດ້ຮັບຜົນກະທົບໜັກທີ່ສຸດ ໂດຍມີຜູ້ຕິດເຊື້ອຖືກສົງໄສສະສົມຫລາຍກວ່າ 39,000 ຄົນ ແລະ ມີຜູ້ເສຍຊີວິດຫລາຍກວ່າ 1,000 ຄົນ ນັບແຕ່ຕົ້ນປີນີ້.

      ສ່ວນລັດຖະບານຍີ່ປຸ່ນປະກາດວ່າ: ຈະບໍລິຈາກວັກຊີນ LC16M8 ຈໍານວນ 3.05 ລ້ານໂດສ ພ້ອມເຂັມສັກຢາພິເສດໃຫ້ຄອງໂກ.

      ເຖິງຢ່າງໃດກໍຕາມ, WHO ເຕືອນວ່າ: ບໍ່ຄວນໃຊ້ວັກຊີນ LC16M8 ກັບແມ່ຍິງຖືພາ ຫລື ຜູ້ມີພູມຕ້ານທານອ່ອນແອ.