ລັດຖະບານ ທຣໍາ 2.0 ກຽມຖອນຕົວຈາກຂໍ້ຕົກລົງປາຣີສ-ຂະຫຍາຍສົ່ງອອກນໍ້າມັນ

     ຄະນະປ່ຽນຜ່ານຂອງທ່ານ ໂດນັລ ທຣໍາ ວ່າທີ່ປະທານາທິບໍດີອາເມລິກາ ກໍາລັງກຽມຄໍາສັ່ງ ແລະ ປະກາດກ່ຽວກັບການຖອນຕົວຈາກຂໍ້ຕົກລົງປາຣີສ ແລະ ການຫລຸດຂະໜາດອະນຸສອນສະຖານແຫ່ງຊາດບາງແຫ່ງ ເພື່ອໃຫ້ສາມາດຂຸດເຈາະ ແລະ ເຮັດບໍ່ແຮ່ໄດ້ຫລາຍຂຶ້ນ.

     ເດິ ນິວຢອກ ທາມ ລາຍງານວ່າ: ທ່ານ ທຣໍາ ຈະຖອນຕົວອອກຈາກຂໍ້ຕົກລົງປາຣີສ ສະບັບປີ 2015 ແລະ ຫລຸດຂະໜາດອານຸສອນສະຖານເພື່ອຂຸດເຈາະ ແລະ ເຮັດບໍ່ແຮ່ ລວມທັງຂະຫຍາຍການສົ່ງອອກແກັສທໍາມະຊາດເຫລວໄປຕະຫລາດໃຫຍ່ໃນອາຊີ ແລະ ເອີຣົບ ແລະ ຖອນມາດຕະຖານມົນລະພິດທີ່ເຂັ້ມງວດໃນລັດແຄລິຟໍເນຍ.

      ທັງນີ້, ວ່າທີ່ຜູ້ນໍາອາເມລິກາໃຫ້ຄໍາໝັ້ນລະຫວ່າງການຫາສຽງວ່າ: ຈະດໍາເນີນງານຫລາຍຢ່າງກ່ຽວກັບນະໂຍບາຍສິ່ງແວດລ້ອມ. ຂະນະທີ່ນາງ ແຄໂຣໄລ ລີວິດ ໂຄສົກຂອງຄະນະປ່ຽນຜ່ານຂອງທ່ານ ທຣໍາ ລະບຸວ່າ: ຜົນການເລືອກຕັ້ງໃນວັນທີ 5 ພະຈິກຜ່ານມາ ຄືການມອບອໍານາດຈາກປະຊາຊົນ ເຮັດໃຫ້ທ່ານ ທຣໍາ ປະຕິບັດຕາມຄໍາໝັ້ນສັນຍາທີ່ໃຫ້ໄວ້ລະຫວ່າງການຫາສຽງ ແລະ ທ່ານຈະປະຕິບັດຕາມນັ້ນ.

      ນອກຈາກນັ້ນ, ຍັງມີລາຍງານວ່າ: ຄະນະປ່ຽນຜ່ານຂອງທ່ານ ທຣໍາ ກໍາລັງຫາລືກັນ ເຖິງການຍ້າຍສໍານັກງານປົກປ້ອງສິ່ງແວດລ້ອມອາເມລິກາ (EPA) ອອກຈາກນະຄອນຫລວງວໍຊິງຕັນ.