ຍີ່ປຸ່ນປະກາດ ໄຂ້ຫວັດໃຫຍ່ລະບາດທົ່ວປະເທດ ຜູ້ຕິດເຊື້ອມີທ່າອ່ຽງເພີ່ມຂຶ້ນ
ຈໍານວນຜູ້ຕິດເຊື້ອໄຂ້ຫວັດໃຫຍ່ຢູ່ຍີ່ປຸ່ນໄດ້ເຂົ້າສູ່ໄລຍະການລະບາດທົ່ວປະເທດແລ້ວ ແລະ ມີທ່າອ່ຽງເພີ່ມຂຶ້ນຢ່າງຕໍ່ເນື່ອງ.
ສໍານັກຂ່າວຊິນຮົວລາຍງານວ່າ: ກະຊວງສາທາລະນະສຸກຍີ່ປຸ່ນລາຍງານວ່າ: ສະຖາບັນການແພດປະມານ 5,000 ແຫ່ງໃນປະເທດ ຢືນຢັນຜູ້ຕິດເຊື້ອພະຍາດໄຂ້ຫວັດໃຫຍ່ສະສົມລວມກັນ 5,127 ຄົນ ໃນອາທິດຫລ້າສຸດຈົນເຖິງວັນທີ 3 ພະຈິກຜ່ານມາ ເພີ່ມຂຶ້ນ 829 ຄົນ ເມື່ອທຽບໃສ່ອາທິດກ່ອນໜ້າ.
ຂະນະທີ່ຈໍານວນຜູ້ຕິດເຊື້ອທີ່ພົບໂດຍສະເລ່ຍຕໍ່ສະຖາບັນການແພດໜຶ່ງແຫ່ງມີ 1.14 ຄົນ ເຊິ່ງສູງເກີນລະດັບການປະກາດເລີ່ມຕົ້ນລະດູການລະບາດຂອງພະຍາດໄຂ້ຫວັດໃຫຍ່ທົ່ວປະເທດ. ກະຊວງສາທາລະນະສຸກຍີ່ປຸ່ນຈຶ່ງປະກາດການເຂົ້າສູ່ລະດັບການລະບາດທົ່ວປະເທດຢ່າງເປັນທາງການຂອງພະຍາດໄຂ້ຫວັດໃຫຍ່ໃນວັນທີ 8 ພະຈິກຜ່ານມາ.
ເມື່ອຈໍາແນກຕາມພາກພື້ນ ພົບວ່າໂອກິນາວາມີອັດຕາການເກີດພະຍາດໄຂ້ຫວັດໃຫຍ່ສູງສຸດ ໂດຍມີຜູ້ຕິດເຊື້ອ 10.64 ຄົນຕໍ່ໂຮງໝໍໜຶ່ງແຫ່ງ, ຮອງລົງມາຄື ຊິຊຸໂອກະ 2.09 ຄົນ, ຊິບະ 2 ຄົນ, ໂອອິຕະ 1.66 ຄົນ ແລະ ຟຸກຸອິ 1.62 ຄົນ.
