ແຈ້ງເຖິງເຈົ້າອະທິການທຸກໆວັດໃນນະຄອນຫຼວງວຽງຈັນ ກວດກາເຂັ້ມງວດ ແລະ ອຳນວຍຄວາມສະດວກໃຫ້ແກ່ພຣະສົງຕ່າງແຂວງທີ່ມາບຸນທາດຫຼວງ

ວັນທີ 28 ຕຸລາ 2024 ຜ່ານມານີ້ ປະທານອົງການ ພຸດທະສາສະໜາສຳພັນລາວ ນະຄອນຫຼວງວຽງຈັນ ອອກແຈ້ງການເຖິງ ອພສ ເມືອງ 9 ຕົວເມືອງ ໃນຂອບເຂດນະຄອນຫຼວງວຽງຈັນ ເລື່ອງຕ້ອນຮັບພຮະສົງສາສະເນນທີ່ມາຈາກຕ່າງແຂວງທີ່ເດີນທາງມາຮ່ວມບຸນນະມັດສະການພຮະທາດຫຼວງ ເພື່ອຄວາມເປັນລະບຽບຮຽບຮ້ອຍໃນການປະຕິບັດກິດຈະວັດ ຂອງພຣະອາຄັນຕຸກກະ ແລະ ເປັນບ່ອນອີງ ໃຫ້ແກ່ຄະນະປົກຄອງວັດຕ່າງໆ ທີ່ມີພຣະອາຄັນຕຸກກະຈາກຕ່າງແຂວງ ແລະ ຕ່າງປະເທດເຂົ້າມາພັກອາໄສໃນຊ້ວງ ໄລຍະດັ່ງກ່າວ ປະທານ ອພສ ນະຄອນຫຼວງວຽງຈັນ ຈຶ່ງໄດ້ແຈ້ງການມາໃຫ້ຮັບຊາບດັ່ງນີ້:

1. ຂໍໃຫ້ຄະນະປົກຄອງສົງທຸກວັດ ເອົາໃຈໃສ່ປະຕິບັດຕາມລະບຽບປົກຄອງສົງສະບັບເລກທີ 11/ ອພສ .ນວ ລົງວັນທີ 06 ຕຸລາ 2012 ພຣະອາຄັນຕຸກກະ ຫຼື ຄາຣະວາດທີ່ຈະເຂົ້າມາພັກເຊົາຕາມວັດ ຕ່າງໆໃຫ້ເຈົ້າອະທິການວັດ ຫຼື ຄະນະປົກຄອງວັດກວດກາເບິ່ງໜັງສືສຸດທິ ຫຼື ໜັງສືເດີນທາງເຫັນວ່າ ຖືກຕ້ອງແລ້ວຈິ່ງອະນຸຍາດໃຫ້ພັກເຊົາໄດ້, ສໍາລັບພຣະອາຄັນຕຸກກະຈາກຕ່າງປະເທດຕ້ອງມີໜັງສືຜ່ານແດນຢ່າງຖືກຕ້ອງ.
2. ພຣະອາຄັນຕຸກກະທຸກອົງທີ່ມາສະແຫວງບຸນ (ໄຫວ້ພຣະທາດ) ຖືວ່າເປັນຜູ້ຊົງຄຸນນະທໍາ – ຈະຣິຍະ ທໍາທີ່ໜ້າເຫຼື້ອມໃສ ແລະ ຄວນເຄົາລົບ ຮີດຄອງປະເພນີ ຂອງສະຖານທີ່ໆຕົນພັກເຊົາຢູ່.
3. ຄະນະປົກຄອງວັດຄວນຊີ້ແຈງລາຍງານລະບຽບການ ໃນການພັກເຊົາຕະຫຼອດເຖິງຮີດຄອງປະເພນີ ໃຫ້ພຣະອາຄັນຕຸກກະໄດ້ຮັບຊາບ.
4. ອີງຕາມຮີດຄອງປະເພນີຂອງ ສປປ ລາວ ເວົ້າລວມ, ເວົ້າສະເພາະນະຄອນຫຼວງວຽງຈັນ ພຣະສົງ-ສາມະເນນທຸກວັດ ຈະອອກບິນທະບາດເປັນຂະບວນຕາມສາຍທາງທີ່ກໍານົດໄວ້ ແລະ ທຸກຂະບວນຕ້ອງກັບວັດໂດຍພ້ອມພຽງກັນ, ພຣະອາຄັນຕຸກກະທີ່ໄດ້ຮັບອະນຸຍາດພັກຢູ່ຕາມວັດຕ່າງໆກໍອະນຸຍາດໃຫ້ອອກບິນທະບາດນໍາຂະບວນພຣະສົງ-ສາມະເນນຂອງວັດນັ້ນ ຫຼື ຕາມການແນະນໍາຂອງຄະນະປົກຄອງວັດນັ້ນໆ.
5. ຫ້າມບໍ່ໃຫ້ພຣະອາຄັນຕຸກກະອອກບິນທະບາດຕາມລໍາພັງໃຈເຊັ່ນ: ໄປຕາມຕະຫຼາດ, ຮ້ານຄ້າ. ເຊິ່ງເຫັນວ່າບໍ່ເຫມາະສົມ ແລະ ຂັດຕໍ່ຮີດຄອງປະເພນີຂອງຊາວນະຄອນຫຼວງວຽງຈັນ.
6. ພຣະສົງ – ສາມະເນນ ທຸກອົງ ນັບທັງພາຍໃນ ແລະ ຕ່າງປະເທດທີ່ມີຈຸດປະສົງໄປຮັບບິນທະບາດ ໃນງານບຸນນະມັດສະການພຣະທາດຫຼວງ ເຊົ້າ 15 ຄໍ່າ ຂໍໃຫ້ປະຕິບັດຕາມຄະນະກໍາມະການຈັດສະຖານທີ່ຈະໄດ້ຖວາຍແນະນໍາ ແລະ ເພື່ອເກັບກໍາຈໍານວນພຣະສົງ – ສາມະເນນ ທີ່ເຂົ້າຮ່ວມບິນທະບາດນິມົນລົງທະບຽນຕາມຈຸດທີ່ຄະນະກໍາມະການໄດ້ກະກຽມຕ້ອນຮັບ.
7. ຂໍໃຫ້ຄະນະປົກຄອງວັດທຸກໆວັດ ທີ່ມີພຣະອາຄັນຕຸກກະອາໄສຢູ່ ເອົາໃຈໃສ່ຈັດຕັ້ງປະຕິບັດຕາມ ແຈ້ງການສະບັບນີ້ຢ່າງເຂັ້ມງວດດ້ວຍ, ຂໍໃຫ້ພຣະອາຈານປະທານ ອພສ ເມືອງ ແຈ້ງລົງທຸກວັດໃນຂອບເຂດຮັບຜິດຊອບຂອງຕົນ.
8. ແຈ້ງການສະບັບນີ້ ມີຜົນສັກສິດ ນັບແຕ່ວັນລົງລາຍເຊັນເປັນຕົ້ນໄປ.