ໄຂ້ເລືອດອອກຂ້າຊີວິດປະຊາຊົນຢູ່ບັງກະລາເທດ ທຸບສະຖິຕິ 10 ຄົນພາຍໃນມື້ດຽວ
ກອງອໍານວຍການບໍລິຫານສາທາລະນະສຸກຂອງບັງກະລາເທດ ລາຍງານຈໍານວນຜູ້ເສຍຊີວິດຈາກພະຍາດໄຂ້ເລືອດໃນປະເທດ 10 ຄົນ ສະເພາະວັນທີ 2 ພະຈິກຜ່ານມາ ເຊິ່ງຖືເປັນຈໍານວນຜູ້ເສຍຊີວິດປະຈໍາວັນສູງສຸດ ແລະ ເຮັດໃຫ້ສະຖິຕິຜູ້ເສຍຊີວິດຈາກພະຍາດດັ່ງກ່າວໃນປີນີ້ມີຢ່າງໜ້ອຍ 310 ຄົນ.
ຜູ້ຕິດເຊື້ອໄຂ້ເລືອດອອກລາຍໃໝ່ເພີ່ມຂຶ້ນ 1,348 ຄົນ ໃນໄລຍະ 24 ຊົ່ວໂມງ ຈົນຮອດວັນທີ 2 ພະຈິກຜ່ານມາ ສົ່ງຜົນເຮັດໃຫ້ຈໍານວນຜູ້ຕິດເຊື້ອທັງໝົດຂອງພະຍາດໄຂ້ເລືອດອອກຢູ່ບັງກະລາເທດປີນີ້ເພີ່ມຂຶ້ນເປັນຢ່າງໜ້ອຍ 63,165 ຄົນ. ຂະນະທີ່ມີຜູ້ເສຍຊີວິດຈາກພະຍາດດັ່ງກ່າວ 12 ຄົນ ໃນເດືອນກໍລະກົດ, 27 ຄົນ ໃນເດືອນສິງຫາ, 80 ຄົນ ໃນເດືອນກັນຍາ ແລະ 134 ຄົນ ໃນເດືອນຕຸລາຜ່ານມາ.
ສ່ວນສະຖິຕິໃນປີ 2022 ບັງກະລາເທດຢືນຢັນຜູ້ເສຍຊີວິດຈາກພະຍາດໄຂ້ເລືອດອອກ 1,705 ຄົນ ເຊິ່ງຖືເປັນຈໍານວນຜູ້ເສຍຊີວິດຕໍ່ປີສູງສຸດ ເມື່ອທຽບໃສ່ຈໍານວນຜູ້ເສຍຊີວິດຈາກພະຍາດນີ້ໃນປີ 2022 ເຊິ່ງມີຢູ່ 281 ຄົນ ແລະ 179 ຄົນ ໃນປີ 2019.
ໄຂ້ເລືອດອອກເປັນພະຍາດຈາກເຊື້ອໄວຣັສທີ່ແຜ່ຈາກການຖືກຍຸງລາຍທີ່ມີເຊື້ອກັດ ສົ່ງຜົນເຮັດໃຫ້ເຈັບເປັນກະທັນຫັນ ແລະ ມີອາການເຈັບຫົວ, ໄຂ້ສູງ, ອ່ອນເພຍ, ປວດກ້າມຊີ້ນ ແລະ ຂໍ້ຢ່າງຮຸນແຮງ, ຕ່ອມນໍ້າເຫລືອງໃຫຍ່, ປວດຮາກ ແລະ ມີຜືນຂຶ້ນຕາມຜິວໜັງ.
