ອິດສະລາແອນຈັບເຈົ້າໜ້າທີ່ສໍານັກງານນາຍົກລັດຖະມົນຕີ 4 ຄົນ ຂໍ້ຫາເຮັດໃຫ້ຂໍ້ມູນຄວາມໝັ້ນຄົງຮົ່ວໄຫລ
ຊິນເບດ ໜ່ວຍງານດ້ານຄວາມໝັ້ນຄົງພາຍໃນປະເທດຂອງອິດສະລາແອນ ຈັບຜູ້ຖືກສົງໄສ 4 ຄົນ ລວມທັງຜູ້ຊ່ວຍຂອງນາຍົກລັດຖະມົນຕີ ເບັນຈາມິນ ເນທັນຢາຮູ ຜູ້ນໍາອິດສະລາແອນ ໃນຄະດີກ່ຽວກັບການຮົ່ວໄຫລຂອງເອກະສານດ້ານຄວາມໝັ້ນຄົງພາຍໃນສໍານັກງານນາຍົກລັດຖະມົນຕີ.
ໜັງສືພິມລາຍວັນ ຮາວາເຣດ ຂອງອິດສະລາແອນ ລາຍງານໃນວັນທີ 1 ພະຈິກຜ່ານມາວ່າ: ຜູ້ຊ່ວຍຄົນໜຶ່ງໃນສໍານັກງານຂອງທ່ານ ເນທັນຢາຮູ ເຜີຍແຜ່ຂໍ້ມູນ ແລະ ເອກະສານໃຫ້ໜັງສືພິມຕ່າງປະເທດ ເຊິ່ງເນື້ອໃນບາງສ່ວນມີຄໍາຂີ້ຕົວະຢ່າງຊັດເຈນ ແລະ ຂໍ້ມູນດ້ານຄວາມໝັ້ນຄົງທີ່ລະອຽດອ່ອນ.
ຕໍ່ມາໃນຕອນຄໍ່າຂອງວັນທີ 3 ພະຈິກ, ອົງການກະຈາຍສຽງ ແລະ ແຜ່ພາບແຫ່ງອິດສະລາແອນ (IBA) ລະບຸວ່າ: ຫລັງຈາກສານຢູ່ເມືອງຣິຊອນ ເລີຊິອອງ ຍົກເລີກຄໍາສັ່ງຫ້າມການເຜີຍແຜ່, ໜ່ວຍງານຈຶ່ງໄດ້ຮັບອະນຸຍາດໃຫ້ເປີດເຜີຍເຖິງການຈັບບຸກຄົນ 4 ຄົນ ໃນຄະດີຂໍ້ມູນຄວາມໝັ້ນຄົງຮົ່ວໄຫລ ໂດຍຜູ້ຕ້ອງສົງໄສຫລັກຄືທ້າວ ເອລີເຊີ ເຟລສະໄຕ ຜູ້ຊ່ວຍຂອງທ່ານ ເນທັນຢາຮູ, ສ່ວນອີກສາມຄົນເປັນທີ່ປຶກສາຂອງທ່ານ ເນທັນຢາຮູ.
ທັງນີ້, ບັນທຶກຂອງສານລະບຸວ່າ: ການສອບສວນຄະດີດັ່ງກ່າວເລີ່ມຂຶ້ນຫລັງເກີດຄວາມສົງໄສໃນຊິນເບດ ແລະ ກອງທັບອິດສະລາແອນ ກ່ຽວກັບການຮົ່ວໄຫລຂອງຂໍ້ມູນຂ່າວທີ່ລະອຽດອ່ອນຈາກລະບົບຂອງກອງທັບ ແລະ ການເປີດເຜີຍຂໍ້ມູນເຫລົ່ານີ້ຢ່າງຜິດກົດໝາຍ.
ຂະນະທີ່ IBA ລາຍງານວ່າ: ຂໍ້ມູນທີ່ຮົ່ວໄຫລຈາກສໍານັກງານນາຍົກລັດຖະມົນຕີ ເຮັດໃຫ້ເກີດຄວາມກັງວົນດ້ານຄວາມປອດໄພ ກ່ຽວກັບຜົນກະທົບທາງລົບທີ່ອາດເກີດຂຶ້ນຕໍ່ຄວາມໝັ້ນຄົງຂອງອິດສະລາແອນ ແລະ ຄວາມພະຍາຍາມໃນການປ່ອຍຕົວສະເລີຍສົງຄາມໃນເຂດກາຊາ.
