8 ປະເທດສະມາຊິກໂອເປັກພລັສຂະຫຍາຍເວລາຫລຸດອຸປະທານນໍ້າມັນຈົນຮອດທ້າຍປີນີ້

      ສະມາຊິກ 8 ປະເທດຂອງກຸ່ມປະເທດນອກອົງກອນກຸ່ມປະເທດຜູ້ສົ່ງນໍ້າມັນອອກ (ໂອເປັກ) ຈໍານວນ 10 ປະເທດ ກັບສະມາຊິກໂອເປັກດັ້ງເດີມ 12 ປະເທດ ເຊິ່ງເອີ້ນລວມກັນວ່າ: ໂອເປັກພລັສ ປະກາດຂະຫຍາຍເວລາຫລຸດການຈັດຫານໍ້າມັນຈົນຮອດເດືອນທັນວານີ້.

      ການເຄື່ອນໄຫວດັ່ງກ່າວມີຈຸດມຸ້ງໝາຍເພື່ອກະຕຸ້ນລາຄານໍ້າມັນ ທ່າມກາງອຸປະສົງທີ່ບໍ່ແນ່ນອນ ແລະ ອຸປະທານທີ່ສູງຂຶ້ນຢ່າງວ່ອງໄວ ຄຽງຄູ່ກັບການເລືອກຕັ້ງປະທານາທິບໍດີອາເມລິກາ ເຖິງວ່ານັກວິເຄາະຫລາຍຄົນຄາດຄະເນວ່າ: ຜົນກະທົບຈະຢູ່ໃນວົງຈໍາກັດກໍຕາມ.

      ໂອເປັກ ລະບຸໃນຖະແຫລງການວ່າ: ປະເທດສະມາຊິກ 8 ປະເທດ ໄດ້ແກ່ ຊາອຸດິອາຣະບີ, ຣັດເຊຍ, ແອລຈີເຣຍ, ອີຣັກ, ກາຊັກສະຖານ, ກູເວດ, ໂອມານ ແລະ ສະຫະລັດອາຣັບເອມິເຣດ (UAE) ຕົກລົງຈະຂະຫຍາຍໄລຍະເວລາຫລຸດການຜະລິດນໍ້າມັນ 2.2 ລ້ານບາເຣລຕໍ່ວັນ ໂດຍສະໝັກໃຈນັບແຕ່ເດືອນພະຈິກ 2024 ອອກໄປອີກ 1 ເດືອນ ຈົນຮອດທ້າຍເດືອນທັນວາ 2024.