ໄລຍະ 9 ເດືອນ 2024 ນະຄອນຫລວງວຽງຈັນ ຢຶດຢາບ້າໄດ້ 15.5 ລ້ານກວ່າເມັດ ຈັບຜູ້ຕ້ອງຫາໄດ້ 1,200 ກວ່າຄົນ.
ວັນທີ 29 ຕຸລາ 2024 ກອງບັນຊາການປ້ອງກັນຄວາມສະຫງົບນະຄອນຫລວງວຽງຈັນ ໄດ້ຈັດກອງປະຊຸມສະຫຼຸບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ ປະຈຳປີ 2024 ແລະ ທິດທາງແຜນການ 2025 ທົ່ວນະຄອນຫລວງວຽງຈັນ,
ພົນຈັດຕະວາ ບົວພັນ ຟອງມະນີ ຫົວໜ້າກອງບັນຊາການປ້ອງກັນຄວາມສະຫງົບນະຄອນຫລວງວຽງຈັນຜ່ານບົດສະຫຼຸບ ວ່າດ້ວຍການແກ້ໄຂບັນຫາຢາເສບຕິດ ໃນໄລຍະ 9 ເດືອນ 2024 ແລະ ທິດທາງແຜນການ 2025 ໃຫ້ຮູ້ວ່າ: ໃນໄລຍະ 9 ເດືອນຜ່ານມາ ເຈົ້າໜ້າທີ່ປ້ອງກັນຄວາມສະຫງົບນະຄອນ ຫລວງວຽງຈັນ ໄດ້ມ້າງຄະດີຢາເສບຕິດ ທັງໝົດໄດ້ 739 ເລື່ອງ ກັກຕົວຜູ້ຖືກຫາໄດ້ 1,273 ຄົນ, ຍິງ 129 ຄົນ. ໃນນີ້, ມີຄົນຕ່າງປະເທດ 82 ຄົນ ໃນຈຳນວນເປົ້າໝາຍທີ່ໄດ້ຂຶ້ນບັນຊີ ສົກ 2023-2024 ມີ 2636 ຄົນ ແລະ ມ້າງຈຸດມົ້ວສຸມໄດ້ 13 ຈຸດ, ຢືດຂອງກາງຄະດີຢາບ້າ 15,571,632 ເມັດ. ຢາບ້າປຽກນໍ້າ 3 ກິໂລກຣາມ, ຢາໄອ 2,266 ກຣາມ ແລະຢາເສບຕິດປະເພດອື່ນໆ ອີກຫຼາຍລາຍການ,
ນອກນີ້ ຍັງຢຶດໄດ້ ປືນ AK 2 ກະບອກ, ປືນສັ້ນ 21 ກະບອກ ລູກກະສຸນ 953 ລູກ, ປືນລູກຊອງ 1 ກະບອກ ລຸກກະສຸນ 52 ລູກ, ປືນຍາວ M4 3 ກະບອກພ້ອມລູກະສຸນ 161 ລູກ ແລະ ຊຸດແຕ່ງ 1 ຊຸດ, ລູກປືນຂະໜາດຕ່າງໆ ຈຳນວນຫຼາຍ, ໝາກແຕກ 3 ໜ່ວຍ, ລະເບີດຄວັນ 1 ໜ່ວຍ, ໂທລະສັບມືຖື 98 ໜ່ວຍ, ເຮືອນ 2 ຫລັງ, ດິນ 2 ຕອນ, ລົດໃຫຍ່ 51 ຄັນ, ລົດຈັກ 25 ຄັນ, ເງິນກີບ 165 ລ້ານກີບ, ເງິນບາດ 1 ລ້ານກວ່າບາດ, ເງິນໂດລາ 20,138 ໂດລາ, ເງິນຢວນ 5,852 ຢວນ, ເງິນດົງ 25 ລ້ານກວ່າດົງ, ວັດຖຸຄ້າຍຄືຄໍາມີສາຍຄໍ 32 ເສັ້ນ, ສາຍແຂນ 28 ເສັ້ນ, ສາຍແອວ 1 ເສັ້ນ, ແຫວນ 18 ວົງ, ວັດຖຸຄ້າຍຄືເພັດມີສາຍຄໍ 10 ເສັ້ນ, ສາຍແຂນ 3 ເສັ້ນ, ແຫວນ 16 ວົງ, ຕຸ້ມຫູ 7 ຄູ່.
ໃນຕໍ່ໜ້າຄະນະພັກ ຄະນະກອງບັນຊາການປ້ອງກັນຄວາມສະຫງົບນະຄອນຫລວງວຽງຈັນ ຈະສືບຕໍ່ສ້າງຄວາມຮັບຮູ້ໃນທົ່ວສັງຄົມ ໂດຍການສຶກສາອົບຮົມ ໂຄສະນາເຜີຍແຜ່ກົດໝາຍ ແລະ ຜົນຮ້າຍຂອງຢາເສບຕິດ, ປັບປຸງກົດໝາຍ ແລະ ນິຕິກໍາ ໃຕ້ກົດໝາຍທີ່ກ່ຽວຂ້ອງກັບບັນຫາຢາເສບຕິດ ປັບປຸງກົງຈັກການຈັດຕັ້ງ ແລະ ຍົກລະດັບຄວາມສາມາດ ໃນການເຄື່ອນໄຫວເຮັດໜ້າທີ່ການເມືອງ ຂອງອົງກອນສືບສວນສອບສວນ ແລະ ພາກສ່ວນທີ່ກ່ຽວຂ້ອງ ຕໍ່ການແກ້ໄຂບັນຫາຢາເສບຕິດ ຍົກສູງດ້ານການຄຸ້ມຄອງຊີ້ນໍາ ການຈັດຕັ້ງປະຕິບັດຮອບດ້ານ ໃນວຽກງານແກ້ໄຂບັນຫາຢາເສບຕິດ, ປັບປຸງຂີດຄວາມສາມາດໃນການເຄື່ອນໄຫວ ເຮັດໜ້າທີ່ຂອງລະບົບການເມືອງແຕ່ລະຂັ້ນ ເພື່ອຊີ້ນໍາ ນໍາພາການແກ້ໄຂບັນຫາຢາເສບຕິດ ທີ່ເກີດຂື້ນຢູ່ໃນຄວາມຮັບຜິດຊອບຂອງຕົນ ແລະ ເພີ່ມທະວີວຽກງານການຮ່ວມມືສາກົນ ແນ່ໃສ່ຕ້ານ ແລະ ສະກັດກັັ້ນແກ້ໄຂບັນຫາຢາເສບຕິດ ໃນຫລຸດໜ້ອຍຖ້ອຍລົງເທື່ອລະກ້າວ ເຮັດໃຫ້ ນະຄອນຫລວງວຽງຈັນ ມີຄວາມສະຫງົບປອດໄພໂດຍພື້ນຖານ.
ທີ່ມາ: ປ້ອງກັນຄວາມສະຫງົບນະຄອນຫຼວງວຽງຈັນ
