ໂຟກສະວາເກນ ຜະເຊີນວິກິດ ກຽມປິດໂຮງງານຢ່າງໜ້ອຍ 3 ແຫ່ງຢູ່ເຢຍລະມັນ
ບໍລິສັດ ໂຟກສະວາເກນ ຜູ້ຜະລິດລົດລາຍໃຫຍ່ລະດັບໂລກກໍາລັງປະສົບບັນຫາ ມີແຜນປິດໂຮງງານຢ່າງໜ້ອຍ 3 ແຫ່ງຢູ່ເຢຍລະມັນ ແລະ ເລີກຈ້າງພະນັກງານຫລາຍໝື່ນຄົນ ຕາມສ່ວນໜຶ່ງຂອງແຜນຫລຸດຕົ້ນທຶນຄັ້ງໃຫຍ່.
ນອກຈາກປິດໂຮງງານ ແລະ ເລີກຈ້າງພະນັກງານແລ້ວ, ໂຟກສະວາເກນຍັງມີແຜນຫລຸດເງິນເດືອນພະນັກງານທຸກຄົນ 10% ລວມທັງຫລຸດຂະໜາດໂຮງງານທີ່ເຫລືອ ແລະ ຍ້ານພະແນກທັງໝົດໄປຕ່າງປະເທດ ຫລື ໂອນຖ່າຍວຽກໃຫ້ໜ່ວຍງານພາຍນອກຢ່າງເຕັມຮູບແບບ.
ສ່ວນຄະນະຜູ້ບໍລິຫານຂອງໂຟກສະວາເກນຍັງບໍ່ສະແດງຄວາມຄິດເຫັນໃນທັນທີ ໂດຍໂຄສົກຂອງບໍລິສັດອ້າງວ່າເປັນຄວາມລັບຂອງການເຈລະຈາກັບສະຫະພາບແຮງງານ ແລະ ສະພາແຮງງານຂອງໂຟກສະວາເກນ.
ກ່ອນໜ້ານີ້, ໜັງສືພິມລາຍວັນດ້ານການເງິນ ຮັນເດລບລາດ ລາຍງານວ່າ: ໂຟກສະວາເກນ ພະຍາຍາມປະຢັດເງິນປະມານ 4,000 ລ້ານເອີໂຣ ຜ່ານການປິດໂຮງງານ, ການຫັກເງິນເດືອນ ແລະ ການຫລຸດໂບນັດ. ອີກທັງການປິດໂຮງງານຢູ່ເຢຍລະມັນ ຖືເປັນການດໍາເນີນງານຄັ້ງທໍາອິດໃນປະຫວັດສາດ 87 ປີຂອງບໍລິສັດ.
“ໂຟກສະວາເກນສ້າງຄວາມຕົກໃຈໃຫ້ພະນັກງານ ດ້ວຍແຜນຫລຸດຕົ້ນທຶນທີ່ມີມະຕິຄັ້ງປະຫວັດສາດ” ສະພາແຮງງານຂອງໂຟກສະວາເກນລະບຸໃນຖະແຫລງການ ຫລັງຈາກແຈ້ງໃຫ້ພະນັກງານຂອງໂຮງງານທັງສິບແຫ່ງຢູ່ເຢຍລະມັນຮູ້ເຖິງຂໍ້ສະເໜີດັ່ງກ່າວ.
ໃນເດືອນກັນຍາຜ່ານມາ, ໂຟກສະວາເກນລະບຸເຖິງຄວາມຈໍາເປັນໃນການປັບໂຄງສ້າງ, ການພິຈາລະນາຫລຸດຕໍາແໜ່ງ ແລະ ການປິດໂຮງງານພາຍໃນປະເທດບ້ານເກີດ ໂດຍໃຫ້ເຫດຜົນວ່າ: ບໍລິສັດຜະເຊີນບັນຫາຕົ້ນທຶນການຜະລິດສູງ, ການຢຸດສະງັກໃນການປ່ຽນໄປຜະລິດລົດໄຟຟ້າ (EV) ແລະ ການແຂ່ງຂັນທີ່ເພີ່ມຂຶ້ນໃນຕະຫລາດຫລັກຄືຈີນ.
ເຖິງວ່າສະພາແຮງງານຂອງໂຟກສະວາເກນຍອມຮັບວ່າ: ບໍລິສັດປະສົບບັນຫາຮ້າຍແຮງ, ແຕ່ຕົວແທນຂອງພະນັກງານກ່າວຫາວ່າ: ບັນດາຜູ້ນໍາຂອງໂຟກສະວາເກນ ບໍລິຫານຜິດພາດ ແລະ ໃຫ້ຄວາມສໍາຄັນຕໍ່ຜົນກໍາໄລຫລາຍກວ່າການສ້າງອະນາຄົດທີ່ຍືນຍົງສໍາລັບຜູ້ຜະລິດ ເຊິ່ງກຸ່ມພະນັກງານໃຫ້ຄໍາໝັ້ນວ່າ: ຈະຕໍ່ຕ້ານມາດຕະການຫລຸດຕົ້ນທຶນຢ່າງໜັກແໜ້ນ.
