ນຳຕົວຜູ້ກໍ່ເຫດວາງຢາພິດຄອບຄົວຄົນອື່ນຈົນມີຜູ້ເສຍຊີວິດ ມາຈຳລອງເຫດການປະກອບຄຳສາລະພາບ

ຂ່າວ ປກສ ແຂວງຫົວພັນລາຍງານວ່າ: ວັນທີ 17 ຕຸລາ 2024, ເຈົ້າໜ້າທີ່ ປກສ ແຂວງຫົວພັນ ສົມທົບກັບຜູ້ກ່ຽວຂ້ອງ ນໍາຕົວ ທ້າວ ກົວລີ່ ອາຍຸ 49 ປີ ຜູ້ຕ້ອງຫາ ວາງຢາພິດຄອບຄົວຄົນອື່ນ ຢູ່ບ້ານຫ້ວຍຮຽງ ເມືອງສົບເບົາ ແຂວງຫົວພັນ ມາສ້າງແຜນຈໍາລອງເຫດການ ປະກອບຄຳສາລະພາບ.

ເຫດການດັ່ງກ່າວເກີດຂຶ້ນວັນທີ 15 ກຸມພາ ຜ່ານມາ ຢູ່ບ້ານຫ້ວຍຮຽງ ເມືອງສົບເບົາ ເຮັດໃຫ້ລູກຊາຍຂອງ ທ້າວ ເລັງຟາງ ອາຍຸ 9 ປີ ເສຍຊີວິດ , ສ່ວນລູກຊາຍ ອາຍຸ 4 ປີ ແລະ ລູກສາວອາຍຸ 5 ປີ ໄດ້ສົ່ງໂຮງໝໍທັນ ຈຶ່ງລອດຊີວິດ. ຜ່ານການຊັນນະສູດຊາກສົບ ຈຶ່ງຮູ້ວ່າເຫດການດັ່ງກ່າວ ແມ່ນການວາງຢາພິດເພື່ອຄາຕະກໍາ, ຕໍ່ມາ ວັນທີ 16 ກຸມພາ ເຈົ້າໜ້າທີ່ໄດ້ກັກຕົວເປົ້າໝາຍຄື ທ້າວ ກົວລີ່ ອາຍຸ 49 ປີ ຢູ່ບ້ານຫ້ວຍຮຽງ ເມືອງສົບເບົາ, ມາດໍາເນີນການສອບສວນ.

ຜູ້ກ່ຽວຮັບສາລະພາບວ່າ: ເປັນຜູ້ລົງມືກະທໍາຜິດແທ້, ຄືວັນທີ 14 ກຸມພາ ໄດ້ມີບຸກຄົນບໍ່ຮູ້ຊື່ ແລະ ບໍ່ຈື່ໜ້າມາບອກວ່າ ມີວຽກໃຫ້ເຮັດ ຖ້າສໍາເລັດແມ່ນຈະໄດ້ເງິນຄ່າຈ້າງຈໍານວນ 2,000,000-3,000,000 ດົງ (ຫວຽດນາມ) ວຽກທີ່ຈະຕ້ອງເຮັດແມ່ນໄປວາງຢາພິດໃສ່ຄອບຄົວທ້າວ ເລັງຟາງ ຍ້ອນຕົນເອງຕິດຢາເສບຕິດແດ່ ຈຶ່ງຕົກລົງ ດ້ວຍການເອົາຢາພິດປະສົມໃສ່ນໍ້າອັດລົມ ໃຫ້ຄົນໃນຄອບຄົວທ້າວເລັງຟາງດື່ມໃນຂະນະໄປເອົາເງິນຄ່າຈ້າງຖາງໄຮ່, ພາຍຫຼັງວາງຢາພິດແລ້ວຜູ້ກ່ຽວເຮັດທໍາທ່າບໍ່ມີຫຍັງເກີດຂຶ້ນ ຍ່າງອອກໄປຖາງໄຮ່ປົກກະຕິ ລະຫວ່າງທາງຜູ້ກ່ຽວໄດ້ເອົາຢາພິດສ່ວນທີ່ເຫລືອຢູ່ຖົງເສື້ອຖິ້ມເຂົ້າປ່າ ແລະ ນຳມາເຊິ່ງການຈບກຸມຕົວໄດ້ໃນທີ່ສຸດ

ປັດຈຸບັນຄະດີດັ່ງກ່າວກໍາລັງດໍາເນີນຄະດີຕາມຂັ້ນຕອນຂອງກົດໝາຍ.

ທີ່ມາ: ຂ່າວ ປກສ ແຂວງຫົວພັນ News