ໄລຍະ 9 ເດືອນ 2024 ແຂວງເຊກອງ ສົ່ງເສີມການຜະລິດພາຍໃນໃຫ້ເຂັ້ມແຂງ ຄຽງຄູ່ກັບການຜະລິດສົ່ງອອກແຮ່ທາດ
ທ່ານ ຂັນຕີ ສີລະວົງສາ ຮອງເຈົ້າແຂວງເຊກອງ ລາຍງານ ເນື່ອງໃນໂອກາດ ທ່ານ ຮອງລັດຖະມົນຕີ ກະຊວງພະລັງງານ ແລະບໍ່ແຮ່ ເຄື່ອນໄຫວວຽກງານຢູ່ແຂວງເຊກອງ ວັນທີ 18 ຕຸລາ 2024 ຜ່ານມານີ້ວ່າ:
ແຂວງເຊກອງ ໄດ້ສຸມໃສ່ການຜະລິດເພື່ອທົດແທນການນໍາເຂົ້າ, ໂດຍໄດ້ສົ່ງເສີມດຶງດູດທຸລະກິດເອກະຊົນ ລົງທຶນສ້າງຕັ້ງຟາມໄຂ່, ຟາມໝູ ເພື່ອສະໜອງໃຫ້ຕະຫຼາດພາຍໃນແຂວງ;
ການນໍາເຂົ້າ-ສົ່ງອອກ ແມ່ນເຫັນວ່າ ການສົ່ງອອກຫລາຍກວ່າການນໍາເຂົ້າມີ ກະແສໄຟຟ້າ, ແປ້ງມັນຕົ້ນ, ມັນຕົ້ນແຫ້ງ, ຢາງພາລາ, ກາເຟ, ຜະລິດຕະພັນໄມ້, ຖ່ານຫີນ ແລະ ສິນຄ້າ ອື່ນໆ…;
ໄດ້ຕິດຕາມ ຊຸກຍູ້ ແລະ ຊ່ວຍເອື້ອອໍານວຍຄວາມສະດວກໃຫ້ແກ່ການຈັດຕັ້ງປະຕິບັດໂຄງການ ກໍ່ສ້າງພະລັງງານລົມ, ໂຄງການກໍ່ສ້າງໂຮງງານປຸງແຕ່ແຮ່ບົກຊິດ, ໂຄງການກໍ່ສ້າງສາຍສົ່ງເຂື່ອນໄຟຟ້າອີມູນ-ເຂື່ອນຫວຍລະແງ ແລະ ການສົ່ງອອກຖ່ານຫີນໄປຂາຍ ສສ ຫວຽດນາມ ແມ່ນມີຄວາມຄືບໜ້າດີ;
ດ້ານລາຍຮັບ ແລະ ຄຸ້ມຄອງລາຍຈ່າຍ ແມ່ນສຸມໃສ່ການຈັດເກັບລາຍຮັບ ຕາມຖານທີ່ສູນກາງໄດ້ມອບໃຫ້ແຂວງ ຄົບຖ້ວນ, ການປະຕິບັດລາຍຮັບ 9 ເດືອນ ປີ 2024 ລວມພູດສູນກາງ ແລະ ທ້ອງຖິ່ນ 298,426 ຕື້ກີບ ເທົ່າກັບ 134%, ໃນນັ້ນ ພູດສູນກາງ 92,202 ຕື້ກີບ, ເທົ່າກັບ 120%, ພູດທ້ອງຖິ່ນ 398,939 ຕື້ກີບ ເທົາກັບ 140%;
ໄດ້ເອົາໃຈໃສ່ ໃນການແກ້ໄຂບັນດາຮ້ານແລກປ່ຽນເງິນຕາໃນທົ່ວແຂວງ ເຊິ່ງມາຮອດປະຈຸບັນທົ່ວແຂວງ ບໍ່ມີຮ້ານແລກປ່ຽນເງິນຕາ; ພ້ອມນີ້ ທາງເຈົ້າໜ້າທີ່ ປກສ ກໍໄດ້ເຄື່ອນໄຫວຕິດຕາມ, ລາດຕະເວນ ແລະ ກວດກາເປັນປົກກະຕິ ການເຄື່ອນໄຫວແລກປ່ຽນເງິນຕາຊະຊາຍ.
