ປະຊາຄົມອາຊຽນ 2025 ແລະ ຄວາມພະຍາຍາມຂອງ ສປປ ລາວ ທີ່ຈະຫັນຈາກປະເທດທີ່ບໍ່ມີຊາຍເເດນຕິດກັບທະເລ ເປັນປະເທດເຊື່ອມໂຍງ-ເຊື່ອມຈອດໃນພາກພື້ນ

19 ຕຸລາ 2024 ນີ້ ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດ ອາຊຽນ (AIPA) ຄັ້ງທີ 45 ໄດ້ໄຂຂຶ້ນຢ່າງເປັນໂດຍການເຂົ້າຮ່ວມຂອງ ທ່ານ ທອງລຸນ ສີສຸລິດ ປະທານປະເທດ ໄດ້ກ່າວສູນທອນພົດໃນກອງປະຊຸມ ໂດຍໄດ້ຕີລາຄາສູງຕໍ່ບົດບາດຂອງ AIPA ໃນຖານະທີ່ເປັນ ອົງການນິຕິບັນຍັດ, ທັງເປັນຕົວແທນແຫ່ງສິດ ແລະ ຜົນປະໂຫຍດຂອງບັນດາປະເທດສະມາຊິກອາຊຽນ ໃນການຊຸກຍູ້ສົ່ງເສີມການຮ່ວມມືພາຍໃນອາຊຽນ ແລະ ອາຊຽນ ກັບພາຍນອກ ໂດຍສະເພາະ ການສ້າງກົດໝາຍ, ການສະໜອງຂໍ້ມູນດ້ານນິຕິກຳ, ການໃຫ້ສັດຕະຍາບັນແກ່ສົນທິສັນຍາ ແລະ ຊຸກຍູ້ການຈັດຕັ້ງປະຕິບັດແຜນດໍາເນີນງານຕ່າງໆໃນຂອບການຮ່ວມມືອາຊຽນຢ່າງຕັ້ງໜ້າ ອັນໄດ້ປະກອບສ່ວນເຂົ້າໃນຂະບວນການສ້າງປະຊາຄົມອາຊຽນ ໃຫ້ນັບມື້ນັບມີຄວາມເຂັ້ມແຂງ, ມີຄວາມສາມັກຄີ ແລະ ເປີດກວ້າງ, ຮັດແຄບຄວາມແຕກໂຕນທາງດ້ານການພັດທະນາ ແລະ ຍົກລະດັບຊີວິດການເປັນຢູ່ຂອງປະຊາຊົນອາຊຽນ ໃຫ້ດີຂຶ້ນເປັນກ້າວໆ.

ທ່ານ ທອງລຸນ ສີສຸລິດ ກ່າວອີກວ່າ: ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດ ອາຊຽນ ຄັ້ງທີ 45 ດຳເນີນພາຍໃຕ້ຫົວຂໍ້ “ບົດບາດຂອງລັດຖະສະພາໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ” ເຊິ່ງເຫັນວ່າ ມີຄວາມສຳຄັນ ແລະ ສອດຄ່ອງກັບຄວາມພະຍາຍາມລວມຂອງອາຊຽນ ໃນການຈັດຕັ້ງປະຕິບັດວິໄສທັດ ປະຊາຄົມອາຊຽນ 2025 ແລະ ຄວາມພະຍາຍາມຂອງ ສປປ ລາວ ທີ່ຈະຫັນຈາກປະເທດທີ່ບໍ່ມີຊາຍເເດນຕິດກັບທະເລ ເປັນປະເທດເຊື່ອມໂຍງ-ເຊື່ອມຈອດໃນພາກພື້ນ, ພ້ອມທັງສອດຄ່ອງກັບເປົ້າໝາຍການພັດທະນາແບບຍືນຍົງ 2030 ຂອງບັນດາປະຊາຊາດ ແນໃສ່ໃຫ້ພວກເຮົາທຸກຄົນກ້າວໄປພ້ອມກັນ. ພ້ອມທັງ ສະແດງຄວາມເຊື່ອໝັ້ນວ່າ ກອງປະຊຸມໃນຄັ້ງນີ້, ຈະເປັນໂອກາດດີ ໃຫ້ພວກເຮົາສະແດງຄວາມຄິດເຫັນ, ວິໄສທັດ ແລະ ແລກປ່ຽນທັດສະນະຂອງຕົນຢ່າງກົງໄປກົງມາ ແລະ ສ້າງສັນ ແນໃສ່ຮັດແໜ້ນການຮ່ວມມື ແລະ ກຳນົດທິດທາງໃນຕໍ່ໜ້າ ສຳລັບວຽກງານ AIPA ເພື່ອສືບຕໍ່ປະກອບສ່ວນເຂົ້າໃນການສ້າງປະຊາຄົມອາຊຽນ ໃຫ້ມີການເຊື່ອມຈອດ ແລະ ເຂັ້ມແຂງກວ່າເກົ່າ ເພື່ອນໍາຜົນປະໂຫຍດຕົວຈິງມາສູ່ປະຊາຊົນ ຂອງບັນດາປະເທດສະມາຊິກອາຊຽນ ຢ່າງທົ່ວເຖິງ.

ທ່ານ ທອງລຸນ ສີສຸລິດ ຍັງໄດ້ສະແດງຄວາມພາກພູມໃຈ ທີ່ເຫັນວ່າ ອາຊຽນ ມີຄວາມຫລາກຫລາຍທາງດ້ານວັດທະນະທໍາ, ຮີດຄອງປະເພນີ, ພາສາປາກເວົ້າ ແລະ ຄວາມເຊື່ອຖື ເເຕ່ພາຍໃຕ້ກົດບັດອາຊຽນ ກໍຄື ບັນດາຫລັກການທີ່ເປັນພື້ນຖານທີ່ພວກເຮົາຍຶດຖືຮ່ວມກັນນັ້ນ, ພວກເຮົາສາມາດຫັນເອົາຄວາມຫລາກຫລາຍກາຍເປັນກຳລັງແຮງ ເພື່ອບັນລຸເປົ້າໝາຍລວມຂອງອາຊຽນ ໃນການສ້າງພາກພື້ນຂອງພວກເຮົາໃຫ້ກາຍເປັນພາກພື້ນ ທີ່ມີສັນຕິພາບ, ສະຖຽນລະພາບ ແລະ ມີການພັດທະນາ. ໃນອະນາຄົດອັນໃກ້ນີ້, ອາຊຽນ ຈະກວມເອົາທຸກປະເທດ ໃນອາຊີຕາເວັນອອກສຽງໃຕ້ ພາຍຫລັງ ຕີມໍແລັດສະເຕ ເຂົ້າເປັນສະມາຊິກສົມບູນຂອງອາຊຽນ ເຊິ່ງຍິ່ງຈະເພີ່ມທ່າແຮງ ແລະ ຄວາມເຂັ້ມເເຂງໃຫ້ແກ່ ປະຊາຄົມ ອາຊຽນ ຂອງພວກເຮົາ.

ຕະຫລອດໄລຍະການເປັນສະມາຊິກຄອບຄົວອາຊຽນ ໃນໄລຍະ 27 ປີຜ່ານມາ, ສປປ ລາວ ໄດ້ຖືສຳຄັນວຽກງານອາຊຽນ ແລະ ຖືເປັນບຸລິມະສິດໜຶ່ງໃນນະໂຍບາຍການຕ່າງປະເທດຂອງຕົນ ໂດຍທຸກຂະແໜງການຂອງ ສປປ ລາວ ກໍໄດ້ເຂົ້າຮ່ວມຂະບວນການລວມຂອງອາຊຽນ ຢ່າງເຕັມສ່ວນ ແລະ ດ້ວຍຄວາມຮັບຜິດຊອບສູງ. ສປປ ລາວ ໄດ້ສຳເລັດການເຮັດໜ້າທີ່ປະທານໝູນວຽນອາຊຽນ 3 ຄັ້ງ, ອັນໄດ້ປະກອບສ່ວນສຳຄັນເຂົ້າໃນຂະບວນການສ້າງປະຊາຄົມອາຊຽນ ກໍຄື ພາລະກິດລວມ ແຫ່ງການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການຮ່ວມມືເພື່ອການພັດທະນາ ເພື່ອຄວາມຈະເລີນຮຸ່ງເຮືອງໃນພາກພື້ນ ອາຊີຕາເວັນອອກສຽງໃຕ້ ຂອງພວກເຮົາ.

ທີ່ມາ: ຂ່າວສານປະເທດລາວ