ເຮືອບິນຮົບຖະຫລົ່ມກຸ່ມກະບົດຢູ່ຊີຣີຕໍ່ເນື່ອງ
ເບຣຸດ 5 ເມສາ: ກຸ່ມສັງເກດການດ້ານສິດທິມະນຸດຢູ່ຊີຣີ ເປີດເຜີຍເຮືອບິນຮົບປະຕິບັດການໂຈມຕີທາງອາ ກາດຫລາຍເທື່ອຖະຫລົ່ມພື້ນທີ່ຂອງກຸ່ມກະບົດທາງຕາເວັນຕົກສຽງເໜືອຂອງຊີຣີ, ພາຍຫລັງວັນທີ 4 ເມສານີ້ ຫາກໍມີລາຍງານການໃຊ້ອາວຸດເຄມີໂຈມຕີ ເຮັດໃຫ້ມີຜູ້ເສຍຊີວິດຈຳນວນຫລາຍ.
ທັງນີ້, ທາງກຸ່ມບໍ່ສາມາດລະບຸໄດ້ວ່າເປັນເຮືອບິນຮົບຂອງຝ່າຍໃດ ແລະ ຍັງບໍ່ສາມາດຕິດຕໍ່ຂໍຄວາມຄິດເຫັນຈາກກອງທັບຊີຣີກ່ຽວກັບປະຕິບັດການໂຈມຕີທາງອາກາດເທື່ອຫລ້າສຸດຢູ່ແຂວງອິດລິບໄດ້, ສ່ວນຈຳນວນຜູ້ເສຍຊີວິດຈາກການໂຈມຕີດ້ວຍອາວຸດເຄມີໃນວັນທີ 5 ເມສາ ເພີ່ມຂຶ້ນເປັນ 72 ຄົນແລ້ວ ໃນຈຳນວນນີ້ເປັນຜູ້ຍິງ 17 ຄົນ ແລະ ເດັກນ້ອຍ 20 ຄົນ. ກຸ່ມສັງເກດການເປີດເຜີຍວ່າ: ຈຳນວນຜູ້ເສຍຊີວິດອາດຈະຍັງເພີ່ມສູງຂຶ້ນອີກ ເພາະພົບວ່າຍັງມີຜູ້ສູນຫາຍໄປຫລັງການໂຈມຕີ.
ສ່ວນສະພາຄວາມໝັ້ນຄົງແຫ່ງສະຫະປະຊາຊາດ (UNHC) ຈະຈັດກອງປະຊຸມປຶກສາຮ່າງມະຕິຂອງຝ່າຍຕາເວັນຕົກປະນາມປະຕິບັດການໂຈມຕີທາງອາກາດດັ່ງກ່າວ ໂດຍອາເມລິກາກ່າວຫາກອງທັບຂອງຝ່າຍລັດຖະບານຊີຣີວ່າ: ເປັນຜູ້ໃຊ້ອາວຸດເຄມີໃນການໂຈມຕີກຸ່ມກະບົດ, ແຕ່ກອງທັບລັດຖະບານຊີຣີອອກມາປະຕິເສດວ່າ: ບໍ່ມີສ່ວນກ່ຽວຂ້ອງໃນເລື່ອງນີ້, ສ່ວນກະຊວງປ້ອງກັນປະເທດຣັດເຊຍອອກມາປົກປ້ອງຝ່າຍລັດຖະບານຊີຣີວ່າ: ແກັສພິດຮົ່ວໄຫລອອກມາຈາກສາງອາວຸດເຄມີຂອງຝ່າຍກະບົດເອງ, ພາຍຫລັງຖືກກອງທັບຊີຣີປະຕິບັດການໂຈມຕີທາງອາກາດ.
