ຕຳຫລວດ ລາວ-ຫວຽດນາມ ຮ່ວມມືແກ້ໄຂບັນຫາອາຊະຍາກໍາຂ້າມຊາດຢ່າງຮອບດ້ານ

ວັນທີ 13-16 ຕຸລາ 2024 ທີ່ນະຄອນຫລວງຮ່າໂນ້ຍ ສສ ຫວຽດນາມ, ໄດ້ມີກອງປະຊຸມຮ່ວມມືສະກັດກັ້ນ ແລະ ຕ້ານອາຊະຍາກໍາ ລະຫວ່າງ ກໍາລັງຕໍາຫລວດ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ແລະ ກຳລັງຕຳຫລວດ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ຄັ້ງທີ XIII, ນໍາໂດຍ ພົນຕີ ຫງວຽນ ວັນ ລອງ ຮອງລັດຖະມົນຕີ ກະຊວງປ້ອງກັນຄວາມສະຫງົບຫວຽດນາມ ແລະ ພົນຕີ ຄໍາກິ່ງ ຜຸຍຫລ້າມະນີວົງ ຮອງລັດຖະມົນຕີ ຫົວໜ້າກົມໃຫຍ່ຕໍາຫລວດ ກະຊວງປ້ອງກັນຄວາມສະຫງົບລາວ.

ກອງປະຊຸມໄດ້ແລກປ່ຽນຄວາມຄິດເຫັນ, ປຶກສາຫາລື ແລະ ເປັນເອກະພາບສູງຕາມເນື້ອໃນແຜນການຮ່ວມມືຕໍ່ໜ້າຄື: ສອງຝ່າຍຈັດຕັ້ງປະຕິບັດຕາມບົດບັນທຶກໃຫ້ໄດ້ຮັບຜົນດີ, ຕາມການຕົກລົງສາກົນທີ່ສອງຝ່າຍເປັນສະມາຊິກ; ປະສານສົມທົບໃນການກວດກາ, ຕີລາຄາ, ສະເໜີປັບປຸງ, ບັນດາເອກະສານຮ່ວມມືຕ້ານອາຊະຍາກຳ ລະຫວ່າງ ສອງກະຊວງ ທີ່ໄດ້ລົງນາມຮ່ວມກັນມາແຕ່ປີ 1998 ຈົນເຖິງປັດ ຈຸບັນ ໃຫ້ເໝາະສົມກວ່າເກົ່າໃນສະພາບການໃໝ່; ເພີ່ມທະວີການຮ່ວມມືຢ່າງຮອບດ້ານໃນການປະສານສົມທົບ, ຊ່ວຍເຫລືອເຊິ່ງກັນ ແລະ ກັນ ໃນເວທີສາກົນກ່ຽວກັບວຽກງານສະກັດກັ້ນ ແລະ ຕ້ານອາຊະຍາກໍາ ຄື: INTERPOL, ASENNAPOL ບົນພື້ນຖານໄມຕີຈິດມິດຕະພາບ ແລະ ການຮ່ວມມືຮອບດ້ານລະຫວ່າງ ກຳລັງຕຳຫລວດຂອງສອງປະເທດ ຫວຽດນາມ-ລາວ, ຍົກສູງພາລະບົດ ບາດຂອງກໍາລັງຕໍາຫລວດສອງປະເທດໃນເວທີສາກົນ; ຍູ້ແຮງການຮ່ວມມືຮອບດ້ານໃນການແລກ ປ່ຽນ ຂໍ້ມູນຂ່າວສານກ່ຽວກັບວຽກງານສະກັດກັ້ນ, ຕ້ານອາຊະຍາກໍາ, ຮັກສາຄວາມເປັນລະບຽບຮຽບຮ້ອຍທາງສັງຄົມ, ໂດຍສະເພາະແມ່ນອາຊະຍາກຳຂ້າມຊາດລະຫວ່າງ ສອງປະເທດ, ອາຊະຍາກໍາຢາເສບຕິດ, ອາຊະຍາກໍານໍາໃຊ້ເຕັກໂນໂລຊີຂັ້ນສູງ, ອາຊະຍາກໍາທາງອິນເຕີເນັດ, ອາຊະຍາກໍາທາງດ້ານເສດຖະກິດ, ອາຊະຍາກໍາຄ້າມະນຸດ, ອາຊະຍາກໍາສິ່ງແວດລ້ອມ, ການສໍ້ໂກງທາງໂທລະຄົມ, ການໄລ່ຊອກ-ໄລ່ຈັບເປົ້າໝາຍ…

ພ້ອມນີ້, ທັງສອງຝ່າຍ ຍັງເຫັນດີສ້າງຕັ້ງໜ່ວຍປະສານງານແລກປ່ຽນຂໍ້ມູນຂ່າວສານລະຫວ່າງສອງກຳລັງຕໍາຫລວດ ເຊັ່ນ: ມອບໃຫ້ຫ້ອງການອົງການຕຳຫລວດສືບສວນ-ສອບສວນ ກະຊວງປ້ອງກັນຄວາມສະຫງົບ ຫວຽດນາມ ແລະ ຫ້ອງການກົມໃຫຍ່ຕຳຫລວດ ກະຊວງປ້ອງກັນຄວາມສະຫງົບລາວ ເປັນຜູ້ປະສານງານ; ໃນກໍລະນີຮີບດ່ວນ, ຕຳຫລວດບັນດາທ້ອງຖິ່ນຕິດກັບຊາຍແດນ ຫລື ບັນດາ ໜ່ວຍງານວິຊາສະເພາະ ສາມາດແລກປ່ຽນຂໍ້ມູນຂ່າວສານໂດຍກົງ, ແຕ່ຕ້ອງລາຍງານໃຫ້ການນຳຂັ້ນເທິງຂອງຕົນ ແລະ ແຈ້ງໃຫ້ໜ່ວຍປະສານງານຂອງກຳລັງຕຳຫລວດສອງປະເທດໄດ້ຮັບຊາບ, ເພື່ອຕິດຕາມ ແລະ ສ້າງແຜນການປະສານສົມທົບຮ່ວມມືກັນສະກັດກັ້ນ ແລະ ແກ້ໄຂຢ່າງທັນເວລາ.

ຂ່າວ: ວາລະສານປ້ອງຄວາມສະຫງົບ