ຍົກລະດັບດ່ານທ້ອງຖິ່ນບ້ານວັງ, ເມືອງໝື່ນ ແຂວງວຽງຈັນ ເຊື່ອມຕໍ່ ດ່ານ ບ້ານຄົກໄຜ່ ອຳເພພີປາກຊົມ ຈັງຫວັດເລີຍ ຂຶ້ນເປັນດ່ານສາກົນ
ວັນທີ 15 ຕຸລາ 2024, ແຂວງວຽງຈັນ ໄດ້ຈັດພິທີປະກາດການຍົກລະດັບດ່ານທ້ອງຖິ່ນບ້ານວັງ, ເມືອງໝື່ນ, ແຂວງວຽງຈັນ ເຊື່ອມຕໍ່ບ້ານຄົກໄຜ່, ຕຳບົນປາກຊົມ ອຳເພີປາກຊົມ ຈັງຫວັດເລີຍ ຣາຊະອານາຈັກໄທ ຂຶ້ນເປັນດ່ານສາກົນ ຢ່າງເປັນທາງການ, ມີທ່ານ ໂພໄຊ ໄຂຄຳພິທູນ ຮອງລັດຖະມົນຕີ ກະຊວງການຕ່າງປະເທດ, ທ່ານ ຄຳພັນ ສິດທິດຳພາ ເຈົ້າແຂວງວຽງຈັນ, ທ່ານ ກິດຕິຄູນ ບຸດຄູນ ຮອງຜູ້ວ່າຣາຊະການຈັງຫວັດເລີຍ, ທ່ານ ນ. ມໍຣະກົດ ສີສະຫວັດ ເອກອັກຄະຣາຊະທູດຜູ້ມີອໍານາດເຕັມ ແຫ່ງ ຣາຊະອານາຈັກໄທ ປະຈຳ ສປປ ລາວ ເຂົ້າຮ່ວມ.
ທ່ານ ເຈົ້າແຂວງວຽງຈັນ ກ່າວວ່າ: ການເປີດດ່ານສາກົນບ້ານວັງ ແມ່ນຈະສ້າງໂອກາດອັນດີເພື່ອບໍລິການຮັບໃຊ້ນັກທຸລະກິດຜູ້ປະກອບການປະຊາຊົນຂອງສອງປະເທດລາວ-ໄທ ແລະ ໄທ-ລາວ ໂດຍສະເພາະແຂວງວຽງຈັນ ກັບ ຈັງຫວັດເລີຍ ໃຫ້ມີຄວາມໃກ້ຊິດ, ມີຄວາມສໍາພັນຮ່ວມມືກັນຢ່າງແຫນ້ນແຟ້ນຍິ່ງຂຶ້ນ, ສ້າງຄວາມສະດວກສະບາຍກວ່າເກົ່າໃນການໄປມາຫາສູ່ພົບປະຢ້ຽມຢາມທ້ອງທ່ຽວ ແລກປ່ຽນຊື້ຂາຍສິນຄ້ານາໆພັນ, ກາຍເປັນທ່າແຮງບົ່ມຊ້ອນ ແລະ ສ້າງຜົນປະໂຫຍດອັນໃຫຍ່ຫລວງຫລາຍດ້ານປະກອບສ່ວນເຂົ້າໃນການພັດທະນາເສດຖະກິດສັງຄົມຂອງແຂວງວຽງຈັນ ໃຫ້ມີບາດກ້າວຂະຫຍາຍຕົວໃຫມ່ດີກວ່າເກົ່າ. ພ້ອມທັງຊ່ວຍຊຸກຍູ້ການພັດທະນາເສດຖະສິດ-ສັງຄົມຂອງປະເທດຊາດ ແລະ ຊຸກຍູ້ການເປີດປີທ່ອງທ່ຽວ 2024.
ກ່ອນໜ້ານີ້ຄືວັນທີ 14 ຕຸລາ 2024ນີ້ ແຂວງວຽງຈັນ ໄດ້ປະກາດການຈັດຕັ້ງຄະນະຄຸ້ມຄອງດ່ານສາກົນບ້ານວັງ ເມືອງໝື່ນ, ຕາມຂໍ້ຕົກລົງຂອງທ່ານເຈົ້າແຂວງວຽງຈັນ ສະບັບເລກທີ 2377/ຈຂ.ວຈ ລົງວັນທີ25 ກັນຍາ 2024 ວ່າດ້ວຍການແຕ່ງຕັ້ງຄະນະຄຸ້ມຄອງດ່ານສາກົນບ້ານວັງ ເມືອງໝື່ນປະກອບມີ7ທ່ານຄື:
- ແຕ່ງຕັ້ງທ່ານພັນໂທ ກອງແກ້ວ ພົມພິທັກ ຮອງຫ້ອງສັນຕິບານ ກອງບັນຊາການ ປກສ ແຂວງວຽງຈັນ ເປັນຫົວໜ້າຄະນະຄຸ້ມຄອງດ່ານສາກົນບ້ານວັງ ເມືອງໝື່ນ.
- ທ່ານ ແສງມະນີ ໄຊຍະກອນ ຫົວຫນ້າພາສີປະຈຳດ່ານສາກົນບ້ານວັງ ເປັນຮອງ.
- ທ່ານ ພັນໂທ ຄຳແດງ ທຳມະສິດ ຫົວໜ້າ ຕມ ປະຈຳດ່ານສາກົນບ້ານວັງ ເປັນຮອງ.
- ທ່ານ ບຸນສວນ ສີພັນດອນ ຮອງຫົວໜ້າຂະແໜງກໍ່ສ້າງຮາກຖານການເມືອງຫ້ອງວ່າການແຂວງ ເປັນຮອງ.
- ທ່ານ ຄຳເສົາ ຈັນທະວົງ ວິຊາການສັດຕະວະແພດພະແນກກະສິກຳແລະປ່າໄມ້ແຂວງ ເປັນຄະນະ.
- ທ່ານ ຈອນນີ່ ຄູນລ້ຳປະເສີດ ຮອງຫົວໜ້າຂະແໜງກົງສູນ ພະແນກການຕ່າງປະເທດແຂວງ ເປັນຄະນະ.
- ທ່ານ ສຸບັນ ພັນທະວົງ ວິຊາການຂະແໜງທາງນ້ຳ ພະແນກໂຍທາທິການແລະຂົນສົ່ງແຂວງ ເປັນຄະນະ.
