ນາຍົກລັດຖະມົນຕີ ສປ ຈີນ ພົບປະກັບ ທ່ານ ທອງລຸນ ສີສຸລິດ ປະທານປະເທດແຫ່ງ ສປປ ລາວ

ວັນທີ 11 ຕຸລາ 2024, ທ່ານ ຫລີ ສຽງ ນາຍົກລັດຖະມົນຕີແຫ່ງ ສປ ຈີນ ໄດ້ພົບປະກັບທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນປະຕິວັດລາວ, ປະທານປະເທດ ທີ່ນະຄອນຫລວງວຽງຈັນ.

ທ່ານ ຫລີ ສຽງ ໄດ້ສົ່ງຄຳອວຍພອນອັນສະໜິດສະໜົມຈາກທ່ານ ສີ ຈິ້ນຜິງ ປະທານປະເທດຈີນ ເຖິງທ່ານ ທອງລຸນ ສີສຸລິດ ປະທານປະເທດລາວ ແລະ ອວຍພອນປະເທດລາວໄດ້ເປັນເຈົ້າພາບຈັດກອງປະຊຸມຜູ້ນຳຮ່ວມມືອາຊີຕາເວັນອອກແລະກອງປະຊຸມກ່ຽວຂ້ອງຕ່າງໆຢ່າງຈົບງາມ.

ຈີນສະໜັບສະໜູນລາວເດີນເສັ້ນທາງສັງຄົມນິຍົມທີ່ສອດຄ່ອງກັບສະພາບແຫ່ງຊາດຂອງຕົນຢ່າງເດັດດ່ຽວໜຽວແໜ້ນ, ຍິນດີສືບຕໍ່ສະໜັບສະໜູນເຊິ່ງກັນ ແລະ ກັນຢ່າງແໜ້ນແຟ້ນກັບລາວໃນບັນຫາທີ່ກ່ຽວຂ້ອງເຖິງຜົນປະໂຫຍດຫລັກຂອງເຊິ່ງກັນ ແລະ ກັນ. ສອງຝ່າຍຄວນເລັ່ງລັດຜັນຂະຫຍາຍປະຕິບັດແຜນການສ້າງຄູ່ຮ່ວມຊາຕາກຳຈີນ-ລາວສະບັບໃໝ່, ສືບຕໍ່ຊຸກຍູ້ການເຊື່ອມໂຍງຂໍ້ລິເລີ່ມ “ໜຶ່ງແລວໜຶ່ງເສັ້ນທາງ” ກັບຍຸດທະສາດລາວທີ່ຫັນຈາກປະເທດທີ່ບໍ່ມີຊາຍແດນຕິດກັບທະເລກາຍເປັນປະເທດເຊື່ອມໂຍງເຊື່ອມຈອດກັບປະເທດໃກ້ຄຽງ, ເປີດກວ້າງການຮ່ວມມືໃນຂົງເຂດຕ່າງໆເຊັ່ນທາງດ້ານການຄ້າ, ການລົງທຶນ, ຄວາມສາມາດການຜະລິດ, ພະລັງໄຟຟ້າ ແລະ ບໍ່ແຮ່ເປັນຕົ້ນ, ສືບຕໍ່ຄົ້ນຂຸດກຳລັງບົ່ມຊ້ອນ, ເສີມຂະຫຍາຍບົດບາດຂອງເສັ້ນທາງລົດໄຟລາວ-ຈີນ, ຊຸກຍູ້ການຮ່ວມມືຮອບດ້ານລະຫວ່າງຈີນ-ລາວບັນລຸໄດ້ຜົນງານທີ່ເຫັນໄດ້ຫລາຍກວ່າເກົ່າ. ຈີນຍິນດີເປີດກວ້າງການແລກປ່ຽນດ້ານວັດທະນະທຳ, ການທ່ອງທ່ຽວ, ການສຶກສາ ແລະ ການແລກປ່ຽນປະຊາຊົນກັບລາວຢ່າງບໍ່ຢຸດຢັ້ງ, ເພີ່ມຄວາມເຂົ້າໃຈແລະມິດຕະພາບເພື່ອສ້າງພື້ນຖານຄວາມຄິດເຫັນຂອງປະຊາຊົນສອງປະເທດໃຫ້ເລິກເຊິ່ງກ່ວາເກົ່າແກ່ການລົງເລີກການຮ່ວມມືສອງປະທດ.

ໂອກາດນີ້, ທ່ານ ທອງລຸນ ສີສຸລິດ ກ່າວວ່າ: ລາວຍິນດີເພີ່ມທະວີການແລກປ່ຽນຂັ້ນສູງກັບຈີນ, ຮັດແໜ້ນຍຸດທະສາດພັດທະນາປະເທດຊາດຂອງລາວດ້ວຍການຮ່ວມມືໃນການກໍ່ສ້າງຂໍ້ລິເລີ່ມ “ໜຶ່ງແລວໜຶ່ງເສັ້ນທາງ”, ຊຸກຍູ້ການຮ່ວມມືໃນຂົງເຂດສຳຄັນເຊັ່ນທາງລົດໄຟລາວ-ຈີນແລະອື່ນໆ, ລົງເລີກການພົບປະແລກປ່ຽນດ້ານວັດທະນະທຳ, ຊຸກຍູ້ການກໍ່ສ້າງຄູ່ຮ່ວມຊາຕາກຳລາວ-ຈີນໃຫ້ກ້າວສູ່ລະດັບໃໝ່, ເພື່ອສ້າງຄວາມຜາສຸກໃຫ້ແກ່ປະຊາຊົນທັງສອງປະເທດ.