ກິນແປ້ງນົວເຮັດໃຫ້ຄວາມຈໍາເສື່ອມແທ້ ຫລື ບໍ່ ?

     ແປ້ງນົວ ເຄື່ອງປຸງທີ່ຊ່ວຍເພີ່ມຄວາມອູມາມິໃຫ້ອາຫານ ເຮັດໃຫ້ແຊບ, ແຕ່ມີຂ່າວລືວ່າ: ການກິນແປ້ງນົວອາດເຮັດໃຫ້ຄວາມຈໍາເສື່ອມໄດ້. ມື້ນີ້ເຮົາມີຄໍາຕອບມາບອກວ່າ ແທ້ ຫລື ບໍ່ ?.

     ແປ້ງນົວ ເປັນເຄື່ອງປຸງທີ່ຂາດບໍ່ໄດ້ ເພາະຊ່ວຍເຮັດໃຫ້ອາຫານແຊບຂຶ້ນ, ແຕ່ຄົນສ່ວນຫລາຍຍັງກັງວົນວ່າ: ຖ້າກິນຫລາຍເກີນໄປຈະເປັນອັນຕະລາຍຕໍ່ສຸຂະພາບ ຫລື ບໍ່ ? ຈຶ່ງມີຫລາຍຄົນ ແລະ ຫລາຍຄອບຄົວບໍ່ກິນແປ້ງນົວເລີຍ.

     ນອກຈາກນີ້, ຍັງມີຂ່າວລືວ່າ: ການກິນແປ້ງນົວເຮັດໃຫ້ເຮົາວິນຫົວ, ປວດຮາກ ແລະ ສູນເສຍຄວາມຈໍາໄດ້ ເຊິ່ງມີຫລາຍຄົນສົງໄສວ່າ: ແທ້ ຫລື ບໍ່ ? ມື້ນີ້ເຮົາມີຄໍາຕອບມາບອກ…

     ສ່ວນປະສົມຕົ້ນຕໍຂອງແປ້ງນົວຄື ກລູຕາເມດ ເຊິ່ງເປັນກົດອະມິໂນທົ່ວໄປທີ່ຊ່ວຍສ້າງໂປຣຕີນໃນສິ່ງມີຊີວິດ. ແປ້ງນົວມີລົດອູມາມິ ຫລື ເອີ້ນວ່າຄວາມຫວານ ເຊິ່ງຊ່ວຍເພີ່ມລົດຊາດຂອງອາຫານ.

     ຈາກການວິໄຈ ແລະ ປະເມີນຄວາມປອດໄພໂດຍອົງການທາງການແພດທີ່ມີຊື່ສຽງຫລາຍແຫ່ງທົ່ວໂລກ ເຊິ່ງໃຊ້ເວລາສຶກສາ 30 ກວ່າປີ ໄດ້ຂໍ້ສະຫລຸບວ່າ: ແປ້ງນົວເປັນເຄື່ອງປຸງທີ່ປອດໄພໃນການປຸງແຕ່ງອາຫານ.

    ຄະນະກໍາມະການຮ່ວມຜູ້ຊ່ຽວຊານດ້ານວັດຖຸເຈືອປົນອາຫານຂອງອົງການອະນາໄມໂລກ (WHO) ພ້ອມອົງການອາຫານ ແລະ ກະສິກໍາແຫ່ງສະຫະປະຊາຊາດ (FAO) ຢືນຢັນເຊັ່ນກັນວ່າ: ແປ້ງນົວເປັນເຄື່ອງປຸງທີ່ປອດໄພ.

     ສ່ວນ European Community Scientific Committee on Food (EC/SCF) ຫລື ສໍານັກງານຄະນະກໍາມະການອາຫານ ແລະ ຢາແຫ່ງສະຫະລັດອາເມລິກາ (FDA) ເປີດເຜີຍວ່າ: ແປ້ງນົວປອດໄພ ແລະ ບໍ່ເຮັດໃຫ້ເກີດຜົນເສຍຕໍ່ສຸຂະພາບ.

     ເພາະສະນັ້ນ ແປ້ງນົວ ບໍ່ສາມາດເຮັດໃຫ້ເຮົາຄວາມຈໍາເສື່ອມໄດ້ຢ່າງແນ່ນອນ.

     ສະໝອງຂອງເຮົາມີສິ່ງກີດຂວາງລະຫວ່າງເລືອດ ແລະ ສະໝອງ ບໍ່ແມ່ນວ່າສານທຸກຊະນິດຈະສາມາດທະລຸຜ່ານສິ່ງກີດຂວາງນີ້ເພື່ອເຂົ້າໄປທາງໃນໄດ້. ກລູຕາເມດ ຈາກແປ້ງນົວບໍ່ສາມາດເຂົ້າສູ່ລະບົບໄຫລວຽນ ແລະ ເຂົ້າສູ່ພລາສມາ ຫລື ລະບົບສະໝອງໄດ້. ດັ່ງນັ້ນ ເຮົາຈຶ່ງສາມາດໃຊ້ແປ້ງນົວໃນການປຸງອາຫານໄດ້ຢ່າງປອດໄພ, ຮັບປະທານໄດ້ຢ່າງສະບາຍໃຈ.

     ເຖິງຢ່າງໃດກໍດີ, ເຖິງວ່າແປ້ງນົວຈະຜະລິດມາຈາກວັດຖຸດິບທໍາມະຊາດ ຈຶ່ງບໍ່ເປັນອັນຕະລາຍຕໍ່ຮ່າງກາຍຂອງເຮົາ, ແຕ່ຕ້ອງທານໃນປະລິມານທີ່ພໍດີ ຖ້າທານຫລາຍເກີນໄປຈະເຮັດໃຫ້ຮ່າງກາຍໄດ້ຮັບປະລິມານໂຊດຽມຫລາຍເກີນ ສົ່ງຜົນເຮັດໃຫ້ຄວາມດັນເລືອດສູງຂຶ້ນ, ເພີ່ມຄວາມສ່ຽງຕໍ່ການເປັນພະຍາດຫົວໃຈ ແລະ ພະຍາດໝາກໄຂ່ຫລັງຊໍາເຮື້ອ.