ຜູ້ນຳອາເມລິກາ-ຈີນ ພົບກັນເທື່ອທຳອິດມື້ອື່ນ ຄາດຫາລືບັນຫາ ສປປ ເກົາຫລີ

     ວໍຊິງຕັນ 5 ເມສາ: ປະທານາທິບໍດີ ໂດນັນ ທຣຳ ຂອງອາເມລິກາ ແລະ ປະທານປະເທດ ສີຈິ້ນຜິງ ຂອງຈີນ ຈະ ພົບກັນເທື່ອທຳອິດໃນວັນທີ 6 ເມສານີ້. ຖືເປັນການເຈລະຈາດ້ານການພົວພັນເທື່ອສຳຄັນທ່າມກາງໄພຄຸກຄາມ ຈາກອາວຸດນິວເຄຼຍຂອງ ສປປ ເກົາຫລີ ແລະ ວິກິດການຄ້າ.
ລາຍງານລະບຸວ່າ: ຜູ້ນຳຂອງທັງ 2 ປະເທດມະຫາອຳນາດດ້ານເສດຖະກິດ ແລະ ທະຫານຂອງໂລກມີກຳນົດຈະ ພົບກັນຢູ່ລີສອດມາຣອາລາໂກ ໃນລັດຟໍຣິດາ. ທັງນີ້ ກ່ອນໜ້ານີ້ກອງປະຊຸມສຸດຍອດລະຫວ່າງທັງສອງຈະເລີ່ມຕົ້ນ ໃນອີກບໍ່ເຖິງ 48 ຊົ່ວໂມງ ສປປ ເກົາຫລີ ໄດ້ຍິງລູກສອນໄຟລົງສູ່ທະເລບໍລິເວນແຫລມເກົາຫລີ ໃນຕອນເຊົ້າວັນທີ 5 ເມສານີ້. ຂະນະທີ່ທຳນຽບຂາວຂອງອາເມລິກາສະແດງຄວາມກັງວົນກ່ຽວກັບການພັດທະນາອາວຸດນິວເຄຼຍ ແລະ ລູກສອນໄຟໄລຍະໄກຂອງ ສປປ ເກົາຫລີ ທີ່ອາດເຮັດໃຫ້ແຄມຝັ່ງເບື້ອງຕາເວັນຕົກຂອງອາເມລິກາຕົກເປັນ ເປົ້າໝາຍ.
ເພື່ອເປັນການຕອບໂຕ້ໄພຄຸກຄາມຈາກ ສປປ ເກົາຫລີ, ອາເມລິກາປະກາດພ້ອມຈະເຮັດທຸກທາງ ລວມທັງ ປະທານາທິບໍດີ ທຣຳ ມີແນວຄິດຈະໃຊ້ມາດຕະການຂວ້ຳບາດຕໍ່ທະນາຄານຂອງຈີນທີ່ມີການເຮັດທຸລະກິດກັບ ສປປ ເກົາຫລີ, ຖ້າຈີນບໍ່ໃຫ້ການຮ່ວມມືໃນການຊ່ວຍປິດກັ້ນເສັ້ນທາງການເງິນຂອງ ສປປ ເກົາຫລີ. ຂະນະທີ່ຈີນ ຢ້ານວ່າ: ການໃຊ້ໄມ້ແຂງ ຫລື ມາດຕະການທາງທະຫານຂອງອາເມລິກາ ອາດເຮັດໃຫ້ເກີດສົງຄາມຢູ່ແຫລມເກົາ ຫລີ ແລະ ສົ່ງຜົນໃຫ້ມີຜູ້ອົບພະຍົບຫລາຍລ້ານຄົນ ຈີນຈຶ່ງມີແນວທາງຂອງຕົນເອງໃນການຮັບມືກັບ ສປປ ເກົາ ຫລີ.
ດັ່ງນັ້ນ, ນັກວິເຄາະຈີນເບິ່ງວ່າ: ຜູ້ນຳທັງ 2 ຄົນຈະມີການຍົກເອົາບັນຫາເລື່ອງການປົດອາວຸດນິວເຄຼຍຢູ່ ສປປ ເກົາຫລີ ຂຶ້ນມາຫາລືໃນການເຈລະຈາກັນຢ່າງແນ່ນອນ, ແຕ່ຈີນຈະບໍ່ມີທາງປ່ຽນຈຸດຢືນຕາມນະໂຍບາຍຂອງປະ ທານາທິບໍດີ ທຣຳ. ນອກຈາກນີ້ ປະທານປະເທດ ສີຈິ້ນຜິງ ຈະມີການຫາລືໃນບັນຫາດ້ານການຄ້າກ່ຽວກັບການລົງ ທຶນຂອງຈີນຢູ່ອາເມລິການຳອີກ.