ນາຍົກລັດຖະມົນຕີຍີ່ປຸ່ນ ເດີນທາງມາເຖິງນະຄອນຫລວງວຽງຈັນ ຢ້ຽມຢາມລາວຢ່າງເປັນທາງການ

ຕອນເຊົ້າວັນທີ 10 ຕຸລາ 2024, ທ່ານ ອິຊິບະ ຊິເງະຣຸ (H.E. Mr. ISHIBA Shigeru) ນາຍົກລັດຖະມົນຕີຍີ່ປຸ່ນ ພ້ອມດ້ວຍຄະນະ ເດີນທາງມາເຖິງສະໜາມບິນສາກົນວັດໄຕ ນະຄອນຫລວງວຽງຈັນ ໂດຍມີທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ພ້ອມດ້ວຍຄະນະໃຫ້ການຕ້ອນຮັບຢ່າງອົບອຸ່ນ ແລະ ສົມກຽດ.

ທ່ານ ອິຊິບະ ຊິເງະຣຸ ແລະ ຄະນະ ຈະດໍາເນີນການຢ້ຽມຢາມ ສປປ ລາວ ຢ່າງເປັນທາງການ ແລະ ເຂົ້າຮ່ວມກອງປະຊຸມສຸດຍອດອາຊຽນ-ຍີ່ປຸ່ນ ຄັ້ງທີ 27, ກອງປະຊຸມສຸດຍອດອາຊຽນບວກສາມ ຄັ້ງທີ 27 ແລະ ກອງປະຊຸມສຸດຍອດອາຊີຕາເວັນອອກ ຄັ້ງທີ 19 ໃນລະຫວ່າງວັນທີ 10-11 ຕຸລາ 2024. ພ້ອມນີ້, ທ່ານນາຍົກລັດຖະມົນຕີຍີ່ປຸ່ນ ຍັງຈະໄດ້ພົບປະສອງຝ່າຍຢ່າງເປັນທາງການກັບທ່ານ ສອນໄຊ ສີພັນດອນ ນາຍົກລັດຖະມົນຕີແຫ່ງ ສປປ ລາວ.