ຜູ້ນຳອາຊຽນ ທົບທວນຄືນຜົນສຳເລັດການສ້າງປະຊາຄົມອາຊຽນ ໃນກອງປະຊຸມສຸດຍອດອາຊຽນ ຄັ້ງທີ 44
ວັນທີ 9 ຕຸລາ 2024, ທີ່ ຫໍປະຊຸມແຫ່ງຊາດ, ນະຄອນຫຼວງວຽງຈັນ, ທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໄດ້ເປັນປະທານກອງປະຊຸມສຸດຍອດອາຊຽນ ຄັ້ງທີ 44 (ແບບຄົບຄະນະ) ແລະ ຄັ້ງທີ 45 (ແບບວົງແຄບ) ພາຍໃຕ້ຄຳຂວັນ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ”, ໂດຍມີບັນດາຜູ້ນຳປະເທດສະມາຊິກອາຊຽນ, ຜູ້ຕາງໜ້າທີ່ບໍ່ແມ່ນທາງການເມືອງຂອງ ມຽນມາ, ເລຂາທິການໃຫຍ່ອາຊຽນ ແລະ ທ່ານ ນາຍົກລັດຖະມົນຕີ ຕີມໍແລັດສະເຕ ເຂົ້າຮ່ວມ.
ກອງປະຊຸມສຸດຍອດອາຊຽນ ຄັ້ງທີ 44 ໄດ້ທົບທວນຄືນບັນດາຜົນສຳເລັດການສ້າງປະຊາຄົມອາຊຽນ ກໍຄືການກໍານົດທິດທາງຂອງອາຊຽນໃນຕໍ່ໜ້າ. ກອງປະຊຸມໄດ້ສະແດງຄວາມຊົມເຊີຍຕໍ່ຄວາມຄືບໜ້າຂອງການຈັດຕັ້ງປະຕິບັດວິໄສທັດປະຊາຄົມອາຊຽນ 2025 ກໍຄື ຄວາມຄືບໜ້າການຈັດຕັ້ງປະຕິບັດ 9 ຂົງເຂດບູລິມະສິດການເປັນປະທານອາຊຽນຂອງ ສປປ ລາວ ປີ 2024 ທີ່ສຸມໃສ່ການເພີ່່ມທະວີການເຊື່ອມໂຍງ-ເຊື່ອມຈອດ ໃນຂົງເຂດເສດຖະກິດ, ສ້າງອະນາຄົດແບບທົ່ວເຖິງ ແລະ ຍືນຍົງ, ການຫັນປ່ຽນສູ່ຍຸກດີຈີຕອນ, ການສ້າງບັນດາແຜນຍຸດທະສາດ ເພື່ອຈັດຕັ້ງປະຕິບັດວິໄສທັດປະຊາຄົມອາຊຽນ 2045 ແນໃສ່ສ້າງປະຊາຄົມອາຊຽນທີ່ເຂັ້ມແຂງ, ມີນະວັດຕະກໍາ, ຄ່ອງແຄ້ວ ແລະ ມີປະຊາຊົນເປັນແກນກາງ; ສົ່ງເສີມຄວາມເຂັ້ມແຂງຕໍ່ການປ່ຽນແປງສະພາບດິນຟ້າອາກາດ ແລະ ສິ່ງແວດລ້ອມ; ການສົ່ງເສີມດ້ານວັດທະນະທໍາ ແລະ ສິນລະປະ; ການສົ່ງເສີມບົດບາດແມ່ຍິງ ແລະ ເດັກ; ແລະ ການສົ່ງເສີມຄວາມເຂັ້ມແຂງດ້ານສາທາລະນະສຸກ. ທັງໝົດນີ້ ກໍເພື່ອຮັບປະກັນການຮັດແໜ້ນປະຊາຄົມອາຊຽນໃຫ້ມີຕໍ່ຄວາມເນື່ອງ ແລະ ມີການເຊື່ອມໂຍງ-ເຊື່ອມຈອດກັນຫລາຍຂຶ້ນ ແລະ ມີຄວາມເຂັ້ມແຂງ ເພື່ອສາມາດຮັບມືກັບບັນດາສິ່ງທ້າທາຍ ແລະ ນໍາໃຊ້ກາລະໂອກາດຕ່າງໆ ໃນທ່າມກາງສະພາບພູມສາດ-ການເມືອງ ແລະ ພູມສາດ-ເສດຖະກິດໃນພາກພື້ນ ແລະ ໃນໂລກ ມີການຜັນແປໄປຢ່າງສະຫຼັບສັບຊ້ອນ.
ຜູ້ນຳອາຊຽນໄດ້ຍິນດີຕໍ່ຄວາມຄືບໃນໜ້າການຈັດຕັ້ງປະຕິບັດແຜນດໍາເນີນງານສໍາລັບການເປັນສະມາຊິກສົມ ບູນອາຊຽນຂອງ ຕີມໍແລັດສະເຕ ແລະ ຫວັງວ່າ ຕີມໍແລັດສະເຕ ຈະໄດ້ເຂົ້າເປັນສະມາຊິກສົມບູນຂອງຄອບຄົວອາຊຽນໃນເວລາອັນໃກ້ນີ້.
ກອງປະຊຸມ ຍັງໄດ້ປຶກສາຫາລື ກ່ຽວກັບການພົວພັນຮ່ວມມືລະຫວ່າງອາຊຽນກັບຄູ່ຮ່ວມມືພາຍນອກ, ລວມທັງກໍານົດທິດທາງການຮ່ວມມືໃນຕໍ່ໜ້າ ເພື່ອເສີມຂະຫຍາຍການພັວພັນຮ່ວມມືກັບພາຍນອກ ບົນພື້ນຖານການຮ່ວມມືຕາມວິຖີທາງຂອງອາຊຽນ ແລະ ຍຶດໝັ້ນຄວາມເປັນແກນກາງຂອງອາຊຽນ ໃນໂຄງສ້າງການຮ່ວມມືພາກພື້ນທີ່ພວມຜັນແປໄປ, ແນໃສ່ປະກອບສ່ວນເຂົ້າໃນຂະບວນການສ້າງປະຊາຄົມອາຊຽນ ກໍຄື ການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ ກໍຄືໃນໂລກ. ອັນພົ້ນເດັ່ນ ສໍາລັບການພົວພັນຮ່ວມມືລະຫວ່າງອາຊຽນກັບພາຍນອກ ປີ 2024 ແມ່ນການສະເຫຼີມສະຫຼອງ ຄົບຮອບ 50 ປີ ແຫ່ງການພົວພັນຮ່ວມມືອາຊຽນ-ອົດສະຕຣາລີ ແລະ ການເຫຼີມສະຫຼອງການພົວພັນຮ່ວມມືອາຊຽນ-ສ.ເກົາຫລີ ຄົບຮອບ 35 ປີ. ພ້ອມດຽວກັນນີ້, ກອງປະຊຸມໄດ້ຍິນດີ ຕໍ່ກັບການຮັບເອົາ ເປຣູ ເປັນຄູ່ຮ່ວມພັດທະນາຂອງອາຊຽນ.
ໃນໂອກາດກອງປະຊຸມສຸດຍອດອາຊຽນ ຄັ້ງທີ 44, ປະທານທະນາຄານການລົງທຶນພື້ນຖານໂຄ່ງລ່າງອາຊີ (AIIB) ໃນຖານະເປັນແຂກຂອງປະທານ ກໍໄດ້ລາຍງານໃຫ້ບັນດາຜູ້ນຳຊາບ ກ່ຽວກັບ ສະພາບການປະຈຸບັນ ແລະ ທ່າອ່ຽງໂດຍລວມຂອງການພັດທະນາເສດຖະກິດ-ສັງຄົມຂອງພາກພື້ນ ແລະ ຂອງໂລກໃນປັດຈຸບັນ, ລວມທັງການຮ່ວມມືກັບປະເທດສະມາຊິກອາຊຽນ, ຊຶ່ງເປັນຂໍ້ມູນສຳຄັນສຳລັບອາຊຽນໃນການພິຈາລະນາທິດທາງໃນຕໍ່ໜ້າຂອງອາຊຽນ ແລະ ນະໂຍບາຍສຳລັບການພັດທະນາເສດຖະກິດ-ສັງຄົມຂອງບັນດາປະເທດສະມາຊິກອາຊຽນ.
