ອາຊຽນ-ຮົງກົງ ລົງນາມຂໍ້ຕົກລົງ ການຄ້າ-ການລົງທຶນເສລີ
ສະມາຄົມປະຊາຊາດອາຊີຕາເວັນອອກສຽງໃຕ້ (ອາຊຽນ) ແລະ ຮົງກົງ ລົງນາມຂໍ້ຕົກລົງການຄ້າ ແລະ ການລົງທຶນເສລີແລ້ວໃນວັນທີ 12 ພະຈິກນີ້, ພາຍຫລັງໃຊ້ເວລາເຈລະຈາເກືອບ 3 ປີ ຄາດວ່າຈະມີຜົນໃນວັນທີ 1 ມັງກອນປີໜ້າ.
ທ່ານ ເອັດເວິດ ເຢົາ ຫົວໜ້າຝ່າຍການຄ້າ ແລະ ພັດທະນາເສດຖະກິດຮົງກົງ ກ່າວວ່າ: ການລົງນາມຂໍ້ຕົກລົງນີ້ເປັນການປະກາດຈະແຈ້ງວ່າ: ຮົງກົງ ແລະ ອາຊຽນ ຕ້ອງການການຄ້າທີ່ເສລີ ແລະ ເປັນທຳ ໃນຍາມທີ່ອີກຫລາຍສ່ວນຂອງໂລກກຳລັງເກີດກະແສປົກປ້ອງທາງການຄ້າ, ຮົງກົງໃນຖານະຜູ້ສົ່ງເສີມການຄ້າເສລີ ແລະ ລະບົບການຄ້າພະຫຸພາຄີທີ່ແຂງແຮງ ໂດຍຕັ້ງຢູ່ບົນພື້ນຖານຂອງລະບຽບຈະເດີນໜ້າຊຸກດັນເລື່ອງນີ້ຢ່າງເຕັມສ່ວນ. ທ່ານ ເຢົາ ກ່າວອີກວ່າ: ພາຍໃຕ້ຂໍ້ຕົກລົງນີ້ ອາຊຽນຈະທະຍອຍຫລຸດພາສີອາກອນສິນຄ້ານຳເຂົ້າຈາກຮົງກົງ. ນອກຈາກນີ້ ຍັງຈະເປັນປະໂຫຍດຕໍ່ຂະແໜງບໍລິການນຳອີກ ເພາະຈະມີເງິນລົງທຶນໄຫລວຽນເພີ່ມຂຶ້ນ.
ສະຖິຕິຢ່າງເປັນທາງການລະບຸວ່າ: ປີຜ່ານມາ ການຄ້າສິນຄ້າ ຮົງກົງ-ອາຊຽນ ມີມູນຄ່າທັງໝົດ 833.000 ລ້ານໂດລາສະຫະລັດ ແລະ ການຄ້າຂະແໜງບໍລິການມີມູນຄ່າ 121.000 ລ້ານໂດລາສະຫະລັດ.
