IMF ກ່າວວ່າ ສົງຄາມອິດສະລາແອນ-ຮາມັດ ເຮັດໃຫ້ GDP ຢູ່ເຂດກາຊາຫລຸດລົງ 86%
ກອງທຶນການເງິນສາກົນ (IMF) ລະບຸວ່າ: ຄວາມຂັດແຍ່ງລະຫວ່າງອິດສະລາແອນກັບກຸ່ມຮາມັດ ເຊິ່ງຈະຄົບຮອບ 1 ປີ ໃນວັນທີ 7 ຕຸລານີ້ ສົ່ງຜົນເຮັດໃຫ້ເກີດຜົນກະທົບຮ້າຍແຮງຕໍ່ເສດຖະກິດຢູ່ເຂດເວສແບງ ແລະ ເຂດກາຊາ ລວມທັງເຮັດໃຫ້ລວມຍອດຜະລິດຕະພັນພາຍໃນ (GDP) ຂອງເຂດກາຊາຫລຸດລົງເກືອບ 90%.
ທ່ານ ນາງ ຈູລີ ໂຄແຊກ ຫົວໜ້າຝ່າຍການສື່ສານຂອງ IMF ກ່າວວ່າ: ການປະເມີນເບື້ອງຕົ້ນຢ່າງເປັນບົ່ງຊີ້ວ່າ: GDP ຂອງເຂດກາຊາຫລຸດລົງ 86% ໃນ 6 ເດືອນຕົ້ນປີ 2024 ແລະ ພົນລະເຮືອນຢູ່ເຂດກາຊາຕ້ອງຜະເຊີນສະພາບເສດຖະກິດ ແລະ ສັງຄົມທີ່ຮ້າຍແຮງ, ວິກິດມະນຸດສະທໍາ ຕະຫລອດຈົນການສົ່ງມອບການຊ່ວຍເຫລືອທີ່ບໍ່ພຽງພໍ.
ເຖິງຢ່າງໃດກໍຕາມ, ເສດຖະກິດຂອງອິດສະລາແອນກໍໄດ້ຮັບຜົນກະທົບເຊັ່ນກັນ ໂດຍໜ່ວຍງານຈັດອັນດັບຄວາມໜ້າເຊື່ອຖືຫລັກ 3 ແຫ່ງ ປັບຫລຸດອັນດັບຄວາມໜ້າເຊື່ອຖືຂອງອິດສະລາແອນ.
ເຖິງວ່າຂໍ້ມູນຢ່າງເປັນທາງການເຜີຍໃຫ້ເຫັນວ່າ: GDP ຂອງອິດສະລາແອນ ຫລຸດລົງ 21% ໃນໄຕມາດທີ 4 ຂອງປີ 2023 ແລະ ຟື້ນຕົວ 14% ໃນໄຕມາດທໍາອິດຂອງປີນີ້, ແຕ່ການຂະຫຍາຍຕົວຂອງ GDP ພັດຊ້າລົງໃນໄຕມາດທີ 2 ຢູ່ລະດັບ 0.7%.
ນອກຈາກນີ້, ນາງ ໂຄແຊກ ກ່າວອີກວ່າ: ຄວາມຂັດແຍ່ງຢູ່ລີບັງທີ່ທະວີຄວາມຮຸນແຮງຂຶ້ນເມື່ອບໍ່ດົນມານີ້ ເຮັດໃຫ້ສະຖານະການທາງສັງຄົມ ແລະ ເສດຖະກິດມະຫາພາກທີ່ບອບບາງຢູ່ແລ້ວ ຮ້າຍແຮງອີກ ເຊິ່ງ IMF ກໍາລັງຕິດຕາມສະຖານະການທີ່ໜ້າກັງວົນ ແລະ ມີຄວາມບໍ່ແນ່ນອນສູງແບບນີ້ຢ່າງໃກ້ຊິດ.
