ອິດສະແອນຍິງລະເບີດໃສ່ເວສແບງໜັກສຸດໃນຮອບ 24 ປີ ມີຜູ້ເສຍຊີວິດຢ່າງໜ້ອຍ 18 ຄົນ
ມີຜູ້ເສຍຊີວິດຢ່າງໜ້ອຍ 18 ຄົນ ຈາກປະຕິບັດການໂຈມຕີທາງອາກາດຂອງອິດສະລາແອນຢູ່ເຂດເວສແບງ ເຊິ່ງຮຸນແຮງທີ່ສຸດນັບແຕ່ປີ 2000.
ກະຊວງສາທາລະນະສຸກປາແລັສຕິນລາຍງານ ມີຜູ້ເສຍຊີວິດຢ່າງໜ້ອຍ 18 ຄົນ ແລະ ໄດ້ຮັບບາດເຈັບອີກຫລາຍສິບຄົນ ຈາກເຫດການເຮືອບິນຮົບຂອງກອງທັບອິດສະລາແອນໂຈມຕີທາງອາກາດ ຄ້າຍຜູ້ລີ້ໄພຢູ່ເມືອງທຸລຄາເຣມ ທາງພາກເໜືອຂອງເຂດເວສແບງ ໃນຄືນວັນທີ 3 ຕຸລາຜ່ານມາ ຖືເປັນການໂຈມຕີທາງອາກາດນອງເລືອດທີ່ສຸດຂອງອິດສະລາແອນ ເຊິ່ງເກີດຂຶ້ນກັບເຂດເວສແບງ ນັບແຕ່ປີ 2000.
ກອງທັບອິດສະລາແອນອອກຖະແຫລງການ ຢືນຢັນການໂຈມຕີດັ່ງກ່າວແທ້ ໂດຍເປັນປະຕິບັດການຮ່ວມກັບໜ່ວຍຂ່າວຊິນ ເຊດ ແລະ ສາມາດສັງຫານທ່ານ ຊາຮີ ຢາເຊີ ອັບດຸລ ອັລ-ຣາເຊກ ອູຟີ ຜູ້ນໍາກຸ່ມຮາມັດປະຈໍາເມືອງທຸລຄາເຣມ.
ຂະນະທີ່ກຸ່ມຮາມັດອອກຖະແຫລງການປະນາມອິດສະລາແອນປ່າເຖື່ອນ ແລະ ເຕືອນວ່າ: ເປັນການກະຕຸ້ນຄວາມຮຸນແຮງໃນລະດັບຮ້າຍແຮງ. ທັງນີ້ ນັບແຕ່ສົງຄາມຢູ່ເຂດກາຊາເລີ່ມຂຶ້ນ ໃນວັນທີ 7 ຕຸລາ 2023 ຄວາມຮຸນແຮງບໍ່ເວັ້ນແຕ່ລະວັນ ເຊິ່ງເກີດຂຶ້ນຄູ່ຂະໜານກັບຢູ່ເຂດກາຊາ ສົ່ງຜົນເຮັດໃຫ້ມີຜູ້ເສຍຊີວິດແລ້ວ 700 ກວ່າຄົນ ຢູ່ເຂດເວສແບງ, ສ່ວນເຈົ້າໜ້າທີ່ຂອງອິດສະລາແອນເສຍຊີວິດຈາກປະຕິບັດການຢູ່ເຂດເວສແບງແລ້ວຢ່າງໜ້ອຍ 24 ຄົນ.
