ໄຂ້ຫວັດສັດປີກຢູ່ຫວຽດນາມ ຂ້າຊີວິດເສືອ-ສິງໂຕລວມເກືອບ 50 ໂຕແລ້ວ
ເສືອ 47 ໂຕ, ສິງ 3 ໂຕ ແລະ ເສືອດໍາ 1 ໂຕ ຕາຍຢູ່ສວນສັດ ທາງພາກໃຕ້ຂອງຫວຽດນາມ ເນື່ອງຈາກຕິດເຊື້ອໄວຣັສໄຂ້ຫວັດສັດປີກສາຍພັນ H5N1.
ການຕາຍຂອງເສືອ, ສິງ ແລະ ເສືອດໍາດັ່ງກ່າວ ເກີດຂຶ້ນຢູ່ສວນສັດໝີ່ຄວິນ ແຂວງລ໊ອງອານ ແລະ ສວນສັດເວິນໄສວ່ ໃນເມືອງດົງນາຍ ໃກ້ກັບນະຄອນໂຮ່ຈີມິງ.
ຜົນການທົດລອງຈາກສູນເພື່ອບົ່ງມະຕິສຸຂະພາບສັດແຫ່ງຊາດບົ່ງບອກວ່າ: ສັດທັງໝົດຕິດເຊື້ອໄວຣັສ H5N1 ສາຍພັນ A ແລະ ຮອດຕອນນີ້ ຍັງບໍ່ພົບອາການທາງລະບົບທາງເດີນຫາຍໃຈຈາກຜູ້ລ້ຽງ ເຊິ່ງສໍາຜັດໃກ້ຊິດກັບສັດທີ່ຕາຍໄປ. ເຖິງຢ່າງໃດກໍຕາມ, ຍັງບໍ່ມີການໃຫ້ຄວາມເຫັນຢ່າງເປັນທາງການໂດຍສວນສັດ.
ທັງນີ້, ຂໍ້ມູນຈາກອົງການອະນາໄມໂລກ (WHO) ລະບຸວ່າ: ນັບແຕ່ປີ 2022 ເກີດການລະບາດຂອງເຊື້ອໄວຣັສໄຂ້ຫວັດໃຫຍ່ໃນສັດລ້ຽງດ້ວຍນົມເພີ່ມຂຶ້ນຢ່າງຕໍ່ເນື່ອງ ລວມທັງໄຂ້ຫວັດສັດປີກສາຍພັນ H5N1, ສ່ວນການຕິດເຊື້ອໃນມະນຸດອາດມີອາການນັບແຕ່ລະດັບເລັກໜ້ອຍໄປຮອດຂັ້ນຮຸນແຮງ ແລະ ໃນບາງກໍລະນີອາດເຖິງຂັ້ນເສຍຊີວິດ.
ກ່ອນໜ້ານີ້ໃນປີ 2004 ເສືອໂຄ່ງຫລາຍສິບໂຕຕາຍຈາກພະຍາດໄຂ້ຫວັດສັດປີກ ຫລື ຖືກຂ້າຖິ້ມຢູ່ຟາມເພາະພັນຂະໜາດໃຫຍ່ທີ່ສຸດໃນໂລກ ເຊິ່ງຕັ້ງຢູ່ປະເທດໄທ.
