ຝົນຕົກໜັກຕິດຕໍ່ຫລາຍວັນ ເຮັດໃຫ້ນ້ຳຖ້ວມຢູ່ເນປານ ມີຜູ້ເສຍຊີວິດຫລາຍກວ່າ 100 ຄົນ
ຂ່າວຕ່າງປະເທດ ຂອງເນປານ ລາຍງານວ່າ: ວັນທີ 27 ກັນຍາ 2024, ພື້ນທີ່ທາງຕາເວັນອອກ ແລະ ຕອນກາງຂອງເນປານ ຖືກນໍ້າຖ້ວມເປັນບໍລິເວນກວ້າງ ໂດຍມີລາຍງານນໍ້າຖ້ວມກະທັນຫັນໃນແມ່ນໍ້າຫລາຍສາຍ ແລະ ເກີດຄວາມເສຍຫາຍຢ່າງໜັກຕໍ່ທາງຫລວງຂອງປະເທດ. “ໃນຕອນນີ້, ຈໍານວນຜູ້ເສຍຊີວິດເພີ່ມເປັນ 101 ຄົນ ແລະ ມີຜູ້ສູນຫາຍອີກຢ່າງໜ້ອຍ 64 ຄົນ” ໂຄສົກຕໍາຫລວດເນປານ ກ່າວ. ຈໍານວນຜູ້ເສຍຊີວິດມີທ່າອ່ຽງເພີ່ມຂຶ້ນ. ຂະນະທີ່ພາລະກິດຄົ້ນຫາ ແລະ ກູ້ໄພຍັງດໍາເນີນຕໍ່ໄປໃນພື້ນທີ່ໄດ້ຮັບຜົນກະທົບ.
ກົມອຸຕຸນິຍົມວິທະຍາຂອງເນປານ ລະບຸໃນໜັງສືພິມ ການມານທຸ ໂພສ ວ່າ: ພູການມານທຸບັນທຶກປະລິມານນໍ້າຝົນ 240 ມິນລີແມັດ ໃນເວລາ 24 ຊົ່ວໂມງ ຈົນຮອດຕອນເຊົ້າຂອງວັນທີ 28 ກັນຍາຜ່ານມາ ເຊິ່ງຖືເປັນປະລິມານນໍ້າຝົນລະດັບສູງສຸດທີ່ບັນທຶກໄດ້ໃນເມືອງຫລວງ ນັບແຕ່ປີ 1970 ເປັນຢ່າງໜ້ອຍ.
ລະດັບນໍ້າທີ່ສູງຂຶ້ນໃນແມ່ນໍ້າບັກມາຕີ ແລະ ລໍານໍ້າຫລາຍສາຍທີ່ໄຫລຜ່ານນະຄອນຫລວງການມານທຸ ເຮັດໃຫ້ຕາຝັ່ງຫລາຍແຫ່ງພັງທະລາຍ ສົ່ງຜົນເຮັດໃຫ້ບ້ານເຮືອນ ແລະ ລົດຢູ່ບໍລິເວນໃກ້ຄຽງຈົມຢູ່ໃຕ້ບາດານ. ຂະນະທີ່ຊາວເມືອງພະຍາຍາມຝ່ານໍ້າຖ້ວມທີ່ສູງເຖິງໜ້າເອິກ ເພື່ອໄປບ່ອນທີ່ສູງ. ມາຮອດປັດຈຸບັນ ເຈົ້າໜ້າທີ່ກູ້ໄພສາມາດຊ່ວຍເຫລືອຜູ້ປະສົບໄພໄດ້ປະມານ 3,300 ຄົນ.
ນອກຈາກນີ້, ດິນເຈື່ອນຍັງປິດກັ້ນທາງຫລວງຫລາຍສາຍທີ່ເຊື່ອມຕໍ່ນະຄອນຫລວງການມານທຸກັບພື້ນທີ່ອື່ນຂອງເນປານ ສົ່ງຜົນເຮັດໃຫ້ຜູ້ເດີນທາງສັນຈອນຫລາຍຮ້ອຍຄົນຕົກຄ້າງຢູ່ໃນເມືອງຫລວງເຊັ່ນກັນ.
