ອິດສະລາແອນເຂົ້າຮ່ວມ ທະນາຄານພັດທະນາອາຊີ ຜູ້ຊ່ຽວຊານກັງວົນ ອາດເກີດຄວາມຂັດແຍ່ງ

     ອິດສະລາແອນເປັນສະມາຊິກນອກພາກພື້ນປະເທດຫລ້າສຸດຂອງທະນາຄານພັດທະນາອາຊີ (ADB), ຂະນະທີ່ນັກວິເຄາະສະແດງຄວາມກັງວົນວ່າ: ການເຂົ້າມາຂອງອິດສະລາແອນອາດເຮັດໃຫ້ເກີດຄວາມຂັດແຍ່ງພາຍໃນອົງກອນ.

      ADB ເຊິ່ງມີສໍານັກງານໃຫຍ່ຢູ່ຟີລິບປິນ ລະບຸໃນຖະແຫລງການວ່າ: ຄະນະກໍາມະການອະນຸມັດການເປັນສະມາຊິກຂອງອິດສະລາແອນ ນັບແຕ່ເດືອນເມສາ 2022 ແຕ່ຍັງບໍ່ມີຜົນ ຈົນກວ່າອິດສະລາແອນສາມາດປະຕິບັດຕາມຂໍ້ກໍານົດ ແລະ ເງື່ອນໄຂຂອງການເປັນສະມາຊິກໄດ້ຢ່າງຄົບຖ້ວນ.

      ທ່ານ ວິກເຕີ ອາໂບລາ ນັກເສດຖະສາດຈາກມະຫາວິທະຍາໄລອາຊີ ແລະ ປາຊີຟິກ ກ່າວວ່າ: ອິດສະລາແອນເປັນພັນທະມິດກັບອາເມລິກາ ແລະ ຖືວ່າມາຈາກເອີຣົບ, ແຕ່ພວກເຂົາຍັງຕ້ອງການພັນທະມິດທົ່ວໂລກເພີ່ມຂຶ້ນ “ການເຂົ້າເປັນສະມາຊິກ ADB ໝາຍເຖິງການພົວພັນທາງຍຸດທະສາດ ແລະ ການຄ້າທີ່ໃກ້ຊິດຍິ່ງຂຶ້ນ” ທ່ານກ່າວ.

      ເຖິງຢ່າງໃດກໍຕາມ, ທ່ານ ເຊສຕໍ ຄາບາລຊາ ນັກວິເຄາະດ້ານຄວາມໝັ້ນຄົງ ກ່າວວ່າ: ການທີ່ອິດສະລາແອນເປັນສະມາຊິກ ADB ທ່າມກາງສົງຄາມຢູ່ເຂດກາຊາຍັງຍືດເຍື້ອ ອາດເຮັດໃຫ້ສະມາຊິກບາງປະເທດຖອນຕົວ ແລະ ຫັນໄປສະໜັບສະໜູນ ທະນາຄານເພື່ອການລົງທຶນໃນໂຄງລ່າງພື້ນຖານຂອງອາຊີ (AIIB).

      ອິດສະລາແອນຍື່ນເອກະສານສະໝັກເປັນສະມາຊິກ ADB ໃນເດືອນມັງກອນ 2022 ແລະ ເປັນສະມາຊິກນອກພາກພື້ນລໍາດັບທີ 20 ເມື່ອລວມອິດສະລາແອນ ເຮັດໃຫ້ປັດຈຸບັນ ADB ມີສະມາຊິກຢ່າງໜ້ອຍ 69 ປະເທດ ມີຍີ່ປຸ່ນ ແລະ ອາເມລິກາ ເປັນຜູ້ສະໜັບສະໜູນເງິນທຶນຫລັກ.