ກັກຕົວກຸ່ມໄວໜຸ່ມ ດັດແປງສະພາບເຕັກນິກລົດຈັກ ຂີ່ລົດກວນເມືອງ ມາສຶກສາອົບຮົມ

ວັນທີ 19 ກັນຍາ 2024, ກອງບັນຊາການ ປກສ ເມືອວຽງພູຄາ ແຂວງຫລວງນໍ້າທາ ໄດ້ກັກຕົວ ແລະ ນຳເອົາກຸ່ມແກ້ງໄວໜຸ່ມ ທີ່ດັດແປງສະພາບເຕັກນິກລົດຈັກຂີ່ລົດກວນເມືອງ 11 ຄົນ ເປັນໄວໜຸ່ມ ອາຍຸ 16-20 ປີ ມາສຶກສາອົບຮົມ ພ້ອມກັກລົດ 11 ຄັນ.

ລົດຈັກດັ່ງກ່າວ ແມ່ນໄດ້ດັດແປງ ໄຟຕາລົດ (ໄຟສີ) 4 ຄັນ, ດັດແປງທໍ່ອາຍເສຍສຽງດັງເກີນ 4 ຄັນ, ລົດໄຟຕາບໍ່ຮຸ່ງ 3 ຄັນ ເຊິ່ງເປັນການລະເມີດກົດລະບຽບການສັນຈອນທາງບົກ ແລະ ຄວາມບໍ່ເປັນລະບຽບຮຽບຮ້ອຍໃນສັງຄົມ.

ນອກຈາກສຶກສາອົບຮົມແລ້ວ, ຍັງໄດ້ສ້າງບົດບັນທຶກ ພ້ອມທັງແນະນໍາໃຫ້ເຂົາເຈົ້ານຳເອົາເຄື່ອງອາໄລ ທີ່ຖືກຕ້ອງຕາມສະພາບເຕັກນິກຂອງໂຮງງານມາປ່ຽນ ຈຶ່ງອະນຸຍາດນຳເອົາລົດອອກໄປຊົມໃຊ້ ແລະ ໄດ້ມອບໃຫ້ພໍ່ແມ່ຜູ້ປົກຄອງສືບຕໍ່ເອົາໃຈໃສ່ໃນການຕິດຕາມສຶກສາອົບຮົມສັ່ງສອນ ແລະ ຄຸ້ມຄອງການຫລິ້ນ-ການທ່ຽວຂອງລູກຫລານ, ຖ້າຫາກຜູ້ໃດຝ່າຝືນທາງເຈົ້າໜ້າທີ່ພົບເຫັນ ຈະໄດ້ດຳເນີນຕາມລະບຽບກົດໝາຍຢ່າງເຂັ້ມງວດ.