CNN ກຽມທົດລອງໃຊ້ paywall ເກັບເງິນຄ່າອ່ານເນື້ອໃນເພື່ອເພີ່ມລາຍຮັບ

      ເວັບໄຊຂອງສໍານັກຂ່າວ CNN ເຊິ່ງມີຜູ້ເຂົ້າເບິ່ງຫລາຍທີ່ສຸດໃນອາເມລິກາ ມີແຜນຈະເລີ່ມໃຊ້ໂມເດລ Paywall ຫລື ລະບົບຈ່າຍເງິນເພື່ອເຂົ້າເຖິງເນື້ອໃນ ໃນເດືອນໜ້າ.

     ໃນຕົ້ນເດືອນຕຸລາຈະເຖິງນີ້, CNN ຈະເລີ່ມທົດລອງເກັບເງິນຈາກຜູ້ອ່ານຂ່າວບາງສ່ວນ ສໍາລັບການເຂົ້າເຖິງເນື້ອໃນທາງດິຈີຕອນ ເພື່ອຮັກສາທຸລະກິດຂອງບໍລິສັດ ເນື່ອງຈາກໂທລະພາບເຄເບິນມີບົດບາດຫລຸດລົງໃນອຸດສາຫະກໍານີ້.

     ດ້ານບຸກຄົນ 2 ຄົນທີ່ຮູ້ເຖິງການຕັດສິນໃຈຂອງ CNN ກ່າວວ່າ: ບໍລິສັດກໍາລັງວາງແຜນໃຊ້ໂມເດລຈໍາກັດການເຂົ້າເຖິງເນື້ອໃນ ຫລື paywall ເຊິ່ງຈະເຮັດໃຫ້ຜູ້ນໍາໃຊ້ເວັບໄຊເປັນປະຈໍາຕ້ອງຈ່າຍເງິນພາຍຫລັງອ່ານບົດຄວາມຈໍານວນໜຶ່ງ.

      ທັງນີ້, ສໍານັກພິມອື່ນໆຫລາຍແຫ່ງເຊັ່ນ: ເດິ ນິວຢອກ ທາມ ແລະ ເດິ ນິວ ຢອກເກີ ຕ່າງກໍໃຊ້ລະບົບ paywall ໃນໄລຍະ 10 ປີຜ່ານມາ ເພື່ອສ້າງລາຍຮັບຜ່ານການສະໝັກສະມາຊິກ ເຖິງວ່າລາຄາເລີ່ມຕົ້ນສໍາລັບການສະໝັກເປັນສະມາຊິກຂອງ CNN ຍັງບໍ່ແນ່ນອນ, ແຕ່ແຫລ່ງຂ່າວລະບຸວ່າ: CNN ຈະກໍານົດລາຄາທີ່ຍັງບໍ່ແພງ ເພື່ອປະເມີນຄວາມຕ້ອງການຂອງລູກຄ້າກ່ອນ.

      ລະບົບ paywall ເປັນໜຶ່ງໃນແຜນລິເລີ່ມທາງທຸລະກິດທີ່ສໍາຄັນຂອງທ່ານ ມາກ ທອມສັນ ປະທານຄະນະເຈົ້າໜ້າທີ່ບໍລິຫານ (CEO) ຂອງ CNN ເຊິ່ງທ່ານລະບຸໃນບັນທຶກຂໍ້ຄວາມເຖິງພະນັກງານໃນປີນີ້ວ່າ: ເຕັກໂນໂລຊີດັ່ງກ່າວຈະຊ່ວຍໃຫ້ CNN ສາມາດນໍາສະເໜີຂ່າວສານທີ່ຜູ້ອ່ານຍິນດີຈ່າຍເງິນ ແລະ ໃນເວລາຕໍ່ມາ, ທ່ານ ທອມສັນ ກ່າວອີກວ່າ: CNN ຈະທົດລອງໃຊ້ລະບົບ paywall.

      ຄວາມຈິງແລ້ວ, CNN ມີສັນຍານທີ່ບົ່ງບອກວ່າ: ບໍລິສັດກໍາລັງວາງແຜນດໍາເນີນທຸລະກິດການສະໝັກສະມາຊິກ ໂດຍໃນໄລຍະຕົ້ນປີຜ່ານມາ CNN ເລີ່ມທົດລອງກໍາແພງການລົງທະບຽນ ເຊິ່ງກໍານົດໃຫ້ຜູ້ນໍາໃຊ້ທົ່ວໄປຂອງເວັບໄຊ ຕ້ອງໃຫ້ອີເມລຂອງພວກເຂົາ ເພື່ອແລກປ່ຽນການອ່ານບົດຄວາມ.