ອິດສະລາແອນສົ່ງສັນຍານກຽມບຸກລີບັງພາກພື້ນ ກັງວົນສົງຄາມໃຫຍ່ພາກພື້ນເລີ່ມຂຶ້ນອີກ

      ຄວາມເປັນໄປໄດ້ທີ່ອິດສະລາແອນຈະສົ່ງກໍາລັງພາກພື້ນບຸກເຂົ້າໄປໃນດິນແດນຂອງລີບັງຫລາຍຂຶ້ນ ພາຍຫລັງຜູ້ບັນຊາການກອງທັບບົກອິດສະລາແອນສົ່ງສັນຍານວ່າ: ປະຕິບັດການໂຈມຕີທາງອາກາດຢູ່ລີບັງໃນໄລຍະຜ່ານມາອາດເປັນການປູທາງສໍາລັບທະຫານບົກ.

     ພົນໂທ ເຮີຊີ ຮາເລວີ ຂອງກອງທັບອິດສະລາແອນ ລະບຸວ່າ: ສຽງເຮືອບິນຮົບທີ່ບິນຢູ່ເທິງຟ້າ ແລະ ປະຕິບັດການໂຈມຕີທາງອາກາດ ສອງສິ່ງນີ້ເປັນການປູທາງສະດວກສໍາລັບການບຸກເຂົ້າໄປລີບັງ ເພື່ອທໍາລາຍກຸ່ມແຮັດໂບລາ ເຊິ່ງເປັນພັນທະມິດຂອງຮາມັດ ແລະ ສັດຕູຂອງອິດສະລາແອນ.

      ນັບແຕ່ຕົ້ນອາທິດຜ່ານມາ, ອິດສະລາແອນເດີນໜ້າໂຈມຕີທາງອາກາດໃສ່ເປົ້າໝາຍກຸ່ມແຮັດໂບລາຢ່າງຕໍ່ເນື່ອງ ທັງໃນພື້ນທີ່ຕອນໃຕ້ຂອງລີບັງ ແລະ ນະຄອນຫລວງເບຣຸດ ໂດຍລັດຖະມົນຕີສາທາລະນະສຸກລີບັງເປີດເຜີຍວ່າ: ໃນວັນທີ 25 ກັນຍາ ພຽງມື້ດຽວ ມີຜູ້ເສຍຊີວິດ 50 ກວ່າຄົນ. ຂະນະທີ່ກອງທັບອິດສະລາແອນເປີດເຜີຍວ່າ: ການໂຈມຕີຄັ້ງນີ້ສາມາດທໍາລາຍສູນຂ່າວ, ເຄື່ອງຍິງຈະຫລວດ ແລະ ສາງອາວຸດຂອງກຸ່ມແຮັດໂບລາໄດ້ເປັນຈໍານວນຫລາຍ.

     ສ່ວນຍອດລວມຜູ້ເສຍຊີວິດຢູ່ລີບັງໃນອາທິດຜ່ານມາສູງເຖິງ 500 ຄົນແລ້ວ ໃນຈໍານວນນີ້ເປັນເດັກນ້ອຍ ແລະ ຜູ້ຍິງຈໍານວນຫລາຍ ແລະ ມີຜູ້ບາດເຈັບອີກຫລາຍພັນຄົນ.

     ທາງກຸ່ມແຮັດໂບລາກໍໂຈມຕີເຂົ້າໄປໃນດິນແດນອິດສະລາແອນຢ່າງຕໍ່ເນື່ອງ. ມີລາຍງານວ່າ: ມິສໄຊລູກໜຶ່ງຖືກສະກັດໄດ້ໃກ້ກັບສູນເສດຖະກິດຂອງອິດສະລາແອນຢູ່ເທລອາວີບ ໂດຍກອງທັບອິດສະລາແອນລະບຸວ່າ: ເປັນມິສໄຊລູກທໍາອິດທີ່ເຂົ້າໃກ້ເມືອງດັ່ງກ່າວຫລາຍທີ່ສຸດ. ຂະນະທີ່ກຸ່ມແຮັດໂບລາລະບຸວ່າ: ພວກເຂົາມຸ້ງເປົ້າໂຈມຕີສໍານັກງານໜ່ວຍຂ່າວ Mossad.

    ສ່ວນບັນດາປະເທດມີຄວາມພະຍາຍາມໃຊ້ຊ່ອງທາງການທູດຫລຸດຄວາມເຄັ່ງຕຶງໃນພາກພື້ນ ໂດຍຝຣັ່ງ ແລະ ອາເມລິກາສະເໜີໃຫ້ສອງຝ່າຍຢຸດຍິງເປັນເວລາ 21 ວັນ ເພື່ອເປີດທາງໃຫ້ມີການຕັ້ງໂຕະເຈລະຈາ.

     ຂະນະທີ່ທ່ານ ອັນໂຕນິໂອ ກູເຕເຣສ ເລຂາທິການສະຫະປະຊາຊາດ ເຕືອນຜູ້ນໍາໂລກໃນກອງປະຊຸມສຸກເສີນສະພາຄວາມໝັ້ນຄົງ UN ໃນວັນທີ 25 ກັນຍາວ່າ: ນາລົກກໍາລັງເກີດຂຶ້ນຢູ່ລີບັງ ແລະ ເນັ້ນວ່າ: ການຍົກລະດັບປະຕິບັດການທາງທະຫານບໍ່ເປັນປະໂຫຍດຕໍ່ໃຜ. ພ້ອມຮຽກຮ້ອງໃຫ້ສອງຝ່າຍຫລີກລ່ຽງການເຮັດສົງຄາມເຕັມຮູບແບບ.

ອ້າງອີງ:

• https://www.bbc.com/news/articles/c8xe8nkj9wyo 
• https://edition.cnn.com/world/live-news/israel-lebanon-war-hezbollah-09-25-24/index.html