ກຸ່ມແຮັດໂບລາຍິງລູກສອນໄຟໃສ່ນະຄອນຫລວງເທລອາວີບ ຫວັງໂຈມຕີສໍານັກງານມໍຊາດ

      ລູກສອນໄຟຂອງກຸ່ມແຮັດໂບລາສາມາດເດີນທາງໄກເຖິງນະຄອນຫລວງເທລອາວີບໄດ້ເປັນຄັ້ງທໍາອິດ ໂດຍມີເປົ້າໝາຍຄືສໍານັກງານໃຫຍ່ຂອງມໍຊາດ, ແຕ່ອິດສະລາແອນຢືນຢັນວ່າ: ສະກັດໄດ້ທັນເວລາ.

     ກອງທັບອິດສະລາແອນອອກຖະແຫລງການວ່າ: ເປັນຄັ້ງທໍາອິດທີ່ກຸ່ມແຮັດໂບລາສາມາດຍິງລູກສອນໄຟ ທີ່ມີໄລຍະຍິງໄກເຖິງນະຄອນຫລວງເທລອາວີບ ເຖິງວ່າລະບົບປ້ອງກັນໄອເອິນ ໂດມ ສາມາດສະກັດເອົາໄວ້ໄດ້, ແຕ່ກອງທັບອິດສະລາແອນຂໍເຕືອນອີກຝ່າຍວ່າ: ການຍິງລູກສອນໄຟຄັ້ງນີ້ຄືການປຸກປັ່ນ.

     ຂະນະທີ່ກຸ່ມແຮັດໂບລາອອກຖະແຫລງການຢືນຢັນການຍິງລູກສອນໄຟ ຄາເດີ 1 ມີຈຸດປະສົງເພື່ອໂຈມຕີສໍານັກງານໃຫຍ່ຂອງໜ່ວຍຂ່າວມໍຊາດ ຕັ້ງຢູ່ໃນນະຄອນຫລວງເທລອາວີບ ຂອງອິດສະລາແອນ ເຊິ່ງຕ້ອງຮັບຜິດຊອບຕໍ່ການຢູ່ເບື້ອງຫລັງເຫດການໂຈມຕີຮຸນແຮງຫລາຍຄັ້ງຢູ່ລີບັງ ຂ້າຊີວິດສະມາຊິກລະດັບແກນນໍາຫລາຍຄົນຂອງກຸ່ມແຮັດໂບລາ.

     ມໍຊາດຍັງປະຕິເສດໃຫ້ຄວາມເຫັນຢ່າງເປັນທາງການ. ເຖິງຢ່າງໃດກໍຕາມ, ອິດສະລາແອນບໍ່ເຄີຍເປີດເຜີຍຢ່າງເປັນທາງການວ່າ: ສໍານັກງານໃຫຍ່ຂອງມໍຊາດຕັ້ງຢູ່ບ່ອນໃດໃນປະເທດ ໂດຍລະບຸພຽງວ່າ: ນະຄອນຫລວງເທລອາວີບ.

     ທັງນີ້, ກອງທັບອິດສະລາແອນປະຕິບັດການໂຈມຕີທາງອາກາດຄັ້ງໃຫຍ່ຢູ່ພາກຕາເວັນອອກ ແລະ ພາກໃຕ້ຂອງລີບັງ ແລະ ພື້ນທີ່ບາງສ່ວນຂອງນະຄອນຫລວງເບຣຸດທີ່ຢູ່ທາງຕາເວັນຕົກ ໃນວັນທີ 23 ກັນຍາຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 558 ຄົນ ສ່ວນຫລາຍເປັນພົນລະເຮືອນ. ເຫດການດັ່ງກ່າວຖືວ່າຮຸນແຮງ ແລະ ນອງເລືອດທີ່ສຸດນັບແຕ່ສົງຄາມລະຫວ່າງອິດສະລາແອນກັບລີບັງໃນປີ 2006.