ແຂວງສາລະວັນ ກັບ ຈັງຫວັດອຸບົນຣາຊະທານີ ເຫັນດີຮ່ວມມືຂົນສົ່ງທາງນໍ້າຜ່ານດ່ານສາກົນ

ວັນທີ 23 ກັນຍາ 2024, ແຂວງສາລະວັນ ສປປ ລາວ ແລະ ຈັງຫວັດອຸບົນຣາຊະທານີ ຣາຊະອານາຈັກໄທ ໄດ້ຈັດກອງປະຊຸມຄະນະກໍາມະການຂົນສົ່ງທາງເຮືອບັກ, ເຮືອໂດຍສານພາຫະນະເຂົ້າ-ອອກ, ຢູ່ດ່ານຊາຍແດນຖາວອນປາກແຊງ ຕຳບົນພະລານ ອຳເພີນາຕານຈັງຫວັດອຸບົນຣາຊະທານີ.

ໃນກອງປະຊຸມສອງຝ່າຍເຫັນດີໃຫ້ສືບຕໍ່ເຊັນບົດບັນທຶກກ່ຽວກັບການຂົນສົ່ງທາງນໍ້າ ຢູ່ດ່ານຊາຍແດນສາກົນປາກຕະພານ ແຂວງສາລະວັນ ແລະ ດ່ານຊາຍແດນຖາວອນປາກແຊງ  2 ສະບັບຄື: ບົດບັນທຶກກ່ຽວກັບການຂົນສົ່ງທາງນໍ້າ ຢູ່ດ່ານສາກົນປາກຕະພານ ແລະ ດ່ານຊາຍແດນຖາວອນ ປາກແຊງ;  ບົດບັນທຶກກ່ຽວກັບການຂົນສົ່ງທາງນໍ້າ (ເຮືອບັກ ແລະ ເຮືອໂດຍສານ) ເຂົ້າ-ອອກ.

 ທັງສອງຝ່າຍຍັງເຫັນດີເປັນເອກະພາບກໍານົດໃຫ້ມີທ່າເຮືອຮ່ວມກັນ 2 ຈຸດຄື: ຈຸດທີ1: ແມ່ນຈຸດກວດກາເຮືອ ແລະ ສິນຄ້າ  ຢູ່ແຂວງສາລະວັນ  ແມ່ນ ທ່າຈອດເຮືອໂດຍສານບໍລິເວນທາງຂຶ້ນລົງຢູ່ຈຸດດ່ານກວດກາຄົນເຂົ້າ-ອອກເມືອງ ແລະ ຢູ່ຈັງຫວັດອຸບົນຣາຊະທານີ ແມ່ນທ່າຈອດເຮືອໂດຍສານ ຢູ່ດ່ານກວດກາຄົນເຂົ້າ-ອອກເມືອງ,  ສ່ວນຈຸດທີ 2:  ຢູ່ແຂວງ ສາລະວັນແມ່ນ ຈຸດກວດກາຄົນ, ສິນຄ້າ ແລະ ພາຫະນະ ຢູ່ຈຸດຈອດເຮືອບັກ ດ່ານຊາຍແດນສາກົນປາກຕະພານ-ຈຸດຊາຍແດນຖາວອນປາກແຊງ ຂອງຈັງຫວັດອຸບົນຣາຊະທານີ,  ສອງຝ່າຍເຫັນດີກຳນົດໃຫ້ມີການແຕ່ງຕັ້ງຄະນະກຳມະການຮ່ວມກຳນົດແລວເດີນເຮືອບັກ ແລະ ເຮືອຂົນສົ່ງໂດຍສານ ເພື່ອບໍ່ໃຫ້ມີຜົນກະທົບຕໍ່ຕາຝັ່ງແມ່ນໍ້າຂອງ, ເຮືອບັກ ແລະ ເຮືອໂດຍສານແຕ່ລະລຳຕ້ອງມີປະກັນໄພ ແລະ ຮັກສາຄວາມປອດໄພຂອງຜູ້ໂດຍສານ, ພາຫະນະ, ພ້ອມດ້ວຍສິນຄ້າ ແລະ ການຮັກສາຄວາມສະຫງົບຮຽບຮ້ອຍ ຕາມລະບຽບກົດໝາຍຂອງແຕ່ລະປະເທດ.