ຮົງກາລີຍັງຖ້ວມໜັກ ແມ່ນໍ້າດານູບຢູ່ບູດາເປສນໍ້າລົ້ນໄຫລຖ້ວມຂັນໄດລັດຖະສະພາ
ໃນເດືອນກັນຍາ ຮົງກາລີຜະເຊີນນໍ້າຖ້ວມຮຸນແຮງ ພາຍຫລັງພາຍຸບໍຣິສພັດຖະຫລົ່ມເອີຣົບຕອນກາງ ເຮັດໃຫ້ລະດັບນໍ້າໃນແມ່ນໍ້າດານູບເພີ່ມສູງຈົນເກືອບເທົ່າລະດັບສະຖິຕິປີ 2013 ໂດຍສະເພາະຢູ່ນະຄອນຫລວງບູດາເປສ ນໍ້າລົ້ນຕາຝັ່ງ ແລະ ໄຫລຖ້ວມສູງຈົນຮອດຂັ້ນໄດຂອງອາຄານລັດຖະສະພາ ເຈົ້າໜ້າທີ່ຕ້ອງເລັ່ງເພີ່ມແນວກັ້ນນໍ້າດ້ວຍຖົງຊາຍ ລວມທັງປິດກັ້ນພື້ນທີ່ບາງແຫ່ງເຊັ່ນ: ສະຖານີລົດໄຟໃຕ້ດິນໃນ Batthyany ເພື່ອປ້ອງກັນນໍ້າໄຫລເຂົ້າຖ້ວມ.
ຂະນະທີ່ນາຍົກລັດຖະມົນຕີ ວິກເຕີ ອໍບານ ໄດ້ຍົກເລີກການເດີນທາງລະຫວ່າງປະເທດທັງໝົດໃນອາທິດນີ້ ແລະ ເນັ້ນວ່າ: ລັດຖະບານກໍາລັງເນັ້ນໃສ່ການຄວບຄຸມນໍ້າຖ້ວມ ໂດຍເຕືອນວ່າ: ໄລຍະເວລາທີ່ຍາກລໍາບາກຍັງຢູ່ເບື້ອງໜ້າ, ແຕ່ທີມເຈົ້າໜ້າທີ່ ແລະ ອາສາສະໝັກຫລາຍໝື່ນຄົນກໍາລັງເຮັດວຽກຢ່າງໜັກໃນການສ້າງ ແລະ ເພີ່ມແນວກັ້ນນໍ້າຕາມພື້ນທີ່ທີ່ໄດ້ຮັບຜົນກະທົບຢ່າງຕໍ່ເນື່ອງ.
ທັງນີ້, ພາຍຸບໍຣິສໄດ້ພັດຖະຫລົ່ມເອີຣົບໃນກາງເດືອນກັນຍາຜ່ານມາ ໂດຍສົ່ງຜົນກະທົບຮຸນແຮງຕໍ່ຫລາຍປະເທດໃນເອີຣົບຕອນກາງເຊັ່ນ: ໂປໂລຍ, ສ.ເຊັກ, ໂອຕຣິດ ແລະ ຮັງກາລີ. ພາຍຸນີ້ສົ່ງຜົນເຮັດໃຫ້ເກີດຝົນຕົກໜັກເກີນກວ່າຄ່າສະເລ່ຍຫລາຍເດືອນໃນເວລາພຽງບໍ່ເທົ່າໃດວັນ ແລະ ເກີດນໍ້າຖ້ວມໃຫຍ່ ເຊິ່ງສ້າງຄວາມເສຍຫາຍທາງເສດຖະກິດຢ່າງມະຫາສານ.
ອ້າງອີງ:
