ເອກົວດໍຜະເຊີນໄພແຫ້ງແລ້ງຮຸນແຮງໃນຮອບຫລາຍທົດສະວັດ ຈໍາເປັນຕ້ອງຕັດໄຟອີກ
ລັດຖະບານເອກົວດໍປະກາດຕັດໄຟໄວຂຶ້ນກວ່າເກົ່າອີກ 1 ວັນ ເພື່ອຈັດສັນໄຟຟ້າ ຂະນະທີ່ປະເທດກໍາລັງຜະເຊີນໄພແຫ້ງແລ້ງຄັ້ງຮ້າຍແຮງທີ່ສຸດໃນຮອບ 61 ປີ ຈາກຝົນບໍ່ຕົກຢ່າງໜ້ອຍ 71 ວັນແລ້ວ.
ເອກົວດໍມີແຜນຕັດກະແສໄຟຟ້າໃນ 12 ແຂວງທຸກຄືນ ນັບແຕ່ວັນຈັນ-ພະຫັດຂອງແຕ່ລະອາທິດ ແລະ ຈະເພີ່ມໄລຍະເວລາກາງເວັນ ລະຫວ່າງ 08:00-17:00 ໂມງ ຂອງວັນອາທິດ ເພື່ອປົກປ້ອງແຫລ່ງນໍ້າທີ່ມີຢູ່ ພາຍຫລັງບໍ່ມີຝົນຕົກຕິດຕໍ່ກັນຢ່າງໜ້ອຍ 71 ວັນແລ້ວ.
ທັງນີ້, ລະດັບນໍ້າທີ່ຫລຸດລົງສົ່ງຜົນເຮັດໃຫ້ອ່າງເກັບນໍ້າຂອງໂຮງໄຟຟ້າພະລັງນໍ້າ ເຊິ່ງຄວບຄຸມຄວາມຕ້ອງການໄຟຟ້າໃນປະເທດ 70% ຫລຸດລົງເຖິງລະດັບວິກິດ.
ຖະແຫລງການຂອງປະທານາທິບໍດີ ດານຽວ ໂນໂບອາ ຜູ້ນໍາເອກົວດໍ ລະບຸວ່າ: ອາດມີການບັງຄັບໃຊ້ມາດຕະການເພີ່ມຕື່ມທີ່ຈໍາເປັນ ພາຍຫລັງປະເມີນສະຖານະການນໍ້າໃນພາກພື້ນ, ປະເທດ ແລະ ແຕ່ລະແຂວງແລ້ວ.
ໂດຍໃນວັນທີ 18 ກັນຍາຜ່ານມາ, ພາຍຫລັງລັດຖະບານເລີ່ມດໍາເນີນການບໍາລຸງຮັກສາ ຫລາຍພື້ນທີ່ຕ້ອງຜະເຊີນໄຟຟ້າດັບເຖິງ 6 ຊົ່ວໂມງ.
ຂະນະທີ່ວັນທີ 21 ກັນຍາຜ່ານມາ, ຄະນະກໍາມະການປະຕິບັດການສຸກເສີນແຫ່ງຊາດ (COE) ຂະຫຍາຍການເຕືອນໄພສີແດງໃນ 15 ແຂວງ ລວມທັງນະຄອນຫລວງກີໂຕ.
ສ່ວນກົມການຄ້າພາຍໃນເມືອງກວາຢາກິລ ເມືອງການຄ້າ ທີ່ຕັ້ງຢູ່ທາງຕາເວັນຕົກສຽງໃຕ້ຂອງປະເທດ ປະເມີນວ່າ: ເອກົວດໍຈະສູນເສຍເງິນປະມານ 12 ລ້ານໂດລາສະຫະລັດ ໃນທຸກໆຊົ່ວໂມງທີ່ເກີດໄຟຟ້າດັບ.
“ໃນຕົ້ນປີນີ້ ເອກົວດໍສູນເສຍເງິນເວລາໄຟຟ້າດັບ 1,440 ລ້ານກວ່າໂດລາສະຫະລັດ ຫລື 1.4% ຂອງລວມຍອດຜະລິດຕະພັນພາຍໃນ (GDP)” ກົມການຄ້າລາຍງານ ໂດຍອ້າງເຖິງການປັນສ່ວນໄຟນໍາໃຊ້ເຖິງ 13 ຊົ່ວໂມງຕໍ່ວັນ ໃນເດືອນເມສາຜ່ານມາ ເນື່ອງຈາກໄພແຫ້ງແລ້ງຮຸນແຮງໃນເວລານັ້ນ.
