ອຸຍນີເຊັບເປັນຫ່ວງ ພາຍຸຢາກິກະທົບເດັກ 6 ລ້ານຄົນໃນອາຊີຕາເວັນອອກສຽງໃຕ້
ກອງທຶນເພື່ອເດັກແຫ່ງສະຫະປະຊາຊາດ (ອຸຍນີເຊັບ) ລາຍງານວ່າ: ອຸທົກກະໄພ ແລະ ດິນເຈື່ອນທີ່ເກີດຈາກອິດທິພົນຂອງພາຍຸໄຕ້ຝຸ່ນຢາກິ ສົ່ງຜົນກະທົບຕໍ່ເດັກເກືອບ 6 ລ້ານຄົນທົ່ວອາຊີຕາເວັນອອກສຽງໃຕ້ ແລະ ຍັງເຮັດໃຫ້ຈໍານວນຜູ້ເສຍຊີວິດຈາກໄພພິບັດສູງຂຶ້ນ.
ວັນທີ 19 ກັນຍາ, ສໍານັກຂ່າວຕ່າງປະເທດລາຍງານວ່າ: ເນື່ອງຈາກຄວາມຮຸນແຮງຂອງພາຍຸໄຕ້ຝຸ່ນຢາກິ ເຊິ່ງສ້າງຄວາມເສຍຫາຍຢ່າງຮຸນແຮງຢູ່ຫວຽດນາມ, ໄທ, ລາວ ແລະ ມຽນມາ ເມື່ອ 2 ອາທິດຜ່ານມານັ້ນ.
ລາຍງານຂອງອຸຍນີເຊັບລະບຸວ່າ: ພາຍຸຫົວດັ່ງກ່າວໄດ້ເພີ່ມຄວາມສ່ຽງຕໍ່ການເຂົ້າເຖິງນໍ້າສະອາດ, ການສຶກສາ, ການເບິ່ງແຍງສຸຂະພາບ, ອາຫານ ແລະ ທີ່ພັກອາໄສຂອງເດັກໃນປະເທດເຫລົ່ານັ້ນລວມເກືອບ 6 ລ້ານຄົນ.
ຢູ່ຫວຽດນາມ ປະຊາຊົນປະມານ 3 ລ້ານຄົນ ກໍາລັງຜະເຊີນຄວາມສ່ຽງທີ່ຈະເຈັບເປັນຈາກການຂາດເຂີນນໍ້າດື່ມທີ່ປອດໄພ ແລະ ຖືກສຸຂະອະນາໄມ. ຂະນະທີ່ຢູ່ມຽນມາ ປະຊາຊົນເກືອບ 400,000 ຄົນ ຕ້ອງອົບພະຍົບອອກຈາກເຮືອນ ເນື່ອງຈາກນໍ້າຖ້ວມສູງ.
ສ່ວນໂຄງການອາຫານໂລກ (WFP) ປະກາດວ່າ: ຈະເລີ່ມໃຫ້ແຈກຢາຍອາຫານສຸກເສີນເປັນເວລາ 1 ເດືອນ ໃຫ້ປະຊາຊົນ 500,000 ກວ່າຄົນ ຢູ່ມຽນມາ.
ທັງນີ້, ອຸຍນີເຊັບລາຍງານວ່າ: ການປ່ຽນແປງສະພາບດິນຟ້າອາກາດ ແລະ ລະດັບນໍ້າທະເລທີ່ອຸ່ນຂຶ້ນ ຈະເຮັດໃຫ້ເກີດເຫດການສະພາບອາກາດສຸດຂົ້ວ ເຊັ່ນພາຍຸໄຕ້ຝຸ່ນຢາກິເລື້ອຍໆ ແລະ ຮຸນແຮງຂຶ້ນ ເປັນອັນຕະລາຍຕໍ່ເດັກໃນອາຊີຕາເວັນອອກ ແລະ ປາຊີຟິກຫລາຍກວ່າໃນອະດີດເຖິງ 6 ເທົ່າ ເມື່ອທຽບໃສ່ປະຊາກອນລຸ້ນບັນພະບູລຸດຕ້ອງຜະເຊີນ.
