ສະມາຊິກອາຊຽນຮ່ວມຫາລື ແນວທາງພັດທະນາການຄ້າລະດັບພາກພື້ນ

     ຄະນະຜູ້ແທນຈາກກຸ່ມປະເທດສະມາຊິກອາຊຽນ ພົບປະຫາລືກັນຢູ່ນະຄອນຫລວງວຽງຈັນ ຂອງ ສປປ ລາວ ເພື່ອຫາລືກ່ຽວກັບການຍົກລະດັບການຄ້າໃນພາກພື້ນ ດ້ວຍການຫລຸດປະສັກທາງການຄ້າ ແລະ ດໍາເນີນມາດຕະການເກື້ອໜຸນທາງການຄ້າ.

    ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າຂອງລາວ ກ່າວຕໍ່ກອງປະຊຸມລັດຖະມົນຕີເຂດການຄ້າເສລີ ສະມາຄົມປະຊາຊາດແຫ່ງອາຊີຕາເວັນອອກສຽງໃຕ້ (ອາຊຽນ) ຄັ້ງທີ 38 ໃນວັນທີ 16 ກັນຍາຜ່ານມາ ເນັ້ນເຖິງຄວາມສໍາຄັນຂອງກອງປະຊຸມທີ່ຈະຊ່ວຍໜຸນການເດີນໜ້າບູລະນະອາຊຽນໃຫ້ເປັນສູນກາງການຜະລິດທີ່ມີປະສິດທິພາບການແຂ່ງຂັນ.

     ການຄ້າໃນກຸ່ມປະເທດອາຊຽນກ້າວໜ້າຢ່າງສໍາຄັນ ນັບແຕ່ຈັດຕັ້ງເຂດການຄ້າເສລີອາຊຽນໃນປີ 1992 ໂດຍອາຊຽນໄດ້ຍົກເລີກການເກັບພາສີ 98.6% ຂອງສິນຄ້າທີ່ເສຍພາສີທັງໝົດ ແລະ ປັບປຸງລະບົບ ASEAN Single Window Tax Notification System) ຢ່າງຕໍ່ເນື່ອງ ເພື່ອຫລຸດຕົ້ນທຶນການຄ້າ ແລະ ອໍານວຍຕໍ່ທຸລະກິດໃນພາກພື້ນແຫ່ງນີ້.

     ມາດຕະການດັ່ງກ່າວສົ່ງຜົນເຮັດໃຫ້ການຄ້າເຕີບໃຫຍ່ຢ່າງຕໍ່ເນື່ອງ ມູນຄ່າການຄ້າພາຍໃນກຸ່ມປະເທດສະມາຊິກອາຊຽນ ໃນປີ 2023 ສູງເຖິງ 759,000 ລ້ານໂດລາສະຫະລັດ ຄິດເປັນ 21.5% ຂອງມູນຄ່າການຄ້າທັງໝົດພາຍໃນກຸ່ມປະເທດສະມາຊິກອາຊຽນ.

    ກອງປະຊຸມຄັ້ງນີ້ເນັ້ນພິຈາລະນາ ແລະ ປັບໃຊ້ ລາຍງານຈາກເຈົ້າໜ້າທີ່ອາວຸໂສດ້ານເສດຖະກິດຂອງອາຊຽນ, ລາຍງານຈາກຄະນະກໍາມະການເຈລະຈາວ່າດ້ວຍການຍົກລະດັບຂໍ້ຕົກລົງການຄ້າອາຊຽນ ແລະ ຖະແຫລງການຮ່ວມຂອງກອງປະຊຸມຄະນະມົນຕີເຂດການຄ້າເສລີອາຊຽນ ຄັ້ງທີ 38 ເພື່ອຂະຫຍັບຂະຫຍາຍການຄ້າໃນພາກພື້ນ ແລະ ບູລະນະການຄ້າໃຫ້ຫລາຍຍິ່ງຂຶ້ນ.