ພາຍຸຢາກິທໍາລາຍເສດຖະກິດຫວຽດນາມເສຍຫາຍ 1,600 ລ້ານໂດລາ
ພາຍຸຢາກິທີ່ພັດຖະຫລົ່ມຫວຽດນາມໃນອາທິດຜ່ານມາ ຂ້າຊີວິດປະຊາຊົນໄປແລ້ວຢ່າງໜ້ອຍ 292 ຄົນ ແລະ ສ້າງຄວາມເສຍຫາຍຕໍ່ເສດຖະກິດຂອງປະເທດ 1,600 ລ້ານໂດລາສະຫະລັດ.
ວັນທີ 16 ກັນຍາ, ຈໍານວນຜູ້ເສຍຊີວິດຈາກພາຍຸຢາກິທີ່ພັດຖະຫລົ່ມຫວຽດນາມໃນເດືອນນີ້ເພີ່ມຂຶ້ນຢ່າງຕໍ່ເນື່ອງເປັນຢ່າງໜ້ອຍ 292 ຄົນ, ແຕ່ມີຜູ້ສູນຫາຍອີກຢ່າງໜ້ອຍ 38 ຄົນ ແລະ ມີຜູ້ໄດ້ຮັບບາດເຈັບ 1,900 ກວ່າຄົນ. ຕາມລາຍງານຂອງສູນຄວບຄຸມໄພພິບັດແຫ່ງຊາດ.
ນອກຈາກນັ້ນ, ອິດທິພົນຂອງພາຍຸຢາກິ ທີ່ມີຄວາມຮຸນແຮງທີ່ສຸດໃນຮອບ 30 ປີ ສ້າງຄວາມເສຍຫາຍໃຫ້ແກ່ບ້ານເຮືອນອີກ 235,000 ກວ່າຫລັງ, ສັດລ້ຽງຕາຍ 2.6 ລ້ານກວ່າໂຕ ສ່ວນຫລາຍເປັນສັດປີກ, ສ່ວນເນື້ອທີ່ກະສິກໍາ 200,000 ກວ່າເຮັກຕາ ໄດ້ຮັບຄວາມເສຍຫາຍຢ່າງໜັກ.
ກະຊວງວາງແຜນ ແລະ ການລົງທຶນຫວຽດນາມຄາດວ່າ: ການສູນເສຍດັ່ງກ່າວອາດເຮັດໃຫ້ການເຕີບໃຫຍ່ທາງເສດຖະກິດຂອງປະເທດໃນປີ 2024 ຫລຸດລົງ 0.15% ພາຍຫລັງກ່ອນໜ້ານີ້ ພາກລັດກໍານົດເປົ້າໝາຍການຂະຫຍາຍຕົວຂອງເສດຖະກິດປີນີ້ໄວ້ໃນລະດັບ 7%.
ສ່ວນລາຍງານໂດຍກອງທຶນເພື່ອເດັກແຫ່ງສະຫະປະຊາຊາດ (ອຸຍນີເຊັບ) ລະບຸໃນລາຍງານວ່າ: ເດັກຫລາຍລ້ານຄົນໃນພາກພື້ນທາງເໜືອຂອງຫວຽດນາມຕ້ອງການການຊ່ວຍເຫລືອຢ່າງຮີບດ່ວນ ແລະ ປະຊາຊົນປະມານ 3 ລ້ານຄົນ ບໍ່ມີນໍ້າດື່ມທີ່ສະອາດ ແລະ ບໍ່ສາມາດເຂົ້າເຖິງລະບົບສຸຂະອະນາໄມທີ່ສະອາດພຽງພໍ.
ນອກຈາກນີ້, ຜົນການປະເມີນເບື້ອງຕົ້ນໂດຍລັດຖະບານຫວຽດນາມ ລະບຸວ່າ: ພາຍຸຢາກິສ້າງຄວາມເສຍຫາຍປະມານ 1,600 ລ້ານໂດລາສະຫະລັດ ໃຫ້ເສດຖະກິດຂອງປະເທດ ແລະ ສົ່ງຜົນເຮັດໃຫ້ອັດຕາການເຕີບໃຫຍ່ຂອງລວມຍອດຜະລິດຕະພັນພາຍໃນ (GDP) ປີນີ້ ຫລຸດລົງປະມານ 0.15%.
