ນາຍົກລັດຖະມົນຕີ ລົງເຄື່ອນໄຫວຕິດຕາມການປ້ອງກັນ ແລະ ແກ້ໄຂນໍ້າຖ້ວມ ຢຸ່ຈຸດບ້ານໝາກຮຽວ

ຕອນເຊົ້າ ວັນທີ 15 ກັນຍາ 2024, ທ່ານ ສອນໄຊ ສີພັນດອນ, ນາຍົກລັດຖະມົນຕີ ພ້ອມດ້ວຍການນຳບັນດາຂະແໜງການ, ນະຄອນຫລວງວຽງຈັນ ແລະ ພາກສ່ວນກ່ຽວຂ້ອງ ລົງເຄື່ອນໄຫວຕິດຕາມສະພາບນໍ້າຖ້ວມ ແລະ ຊຸກຍູ້ການປ້ອງກັນ-ແກ້ໄຂບັນຫາດັ່ງກ່າວ ຢູ່ລຽບຕາມແຄມແມ່ນໍ້າຂອງ ເຂດເມືອງປາກງື່ມ, ເມືອງຫາດຊາຍຟອງ ແລະ ເມືອງສີສັດຕະນາກ ນະຄອນຫລວງວຽງຈັນ.

ຄະນະຂອງທ່ານ ນາຍົກລັດຖະມົນຕີ ໄດ້ໄປຕິດຕາມເບິ່ງສະພາບການລະບາຍນໍ້າ ອອກຈາກຕົວເມືອງນະຄອນຫລວງວຽງຈັນ ຢູ່ຈຸດຫ້ວຍໝາກຮຽວ ເມືອງປາກງື່ມ ຊຶ່ງຈຸດລະບາຍນໍ້າຫ້ວຍໝາກຮຽວ ແມ່ນຈຸດທ້າຍນໍ້າ ທີ່ນໍ້າໃນຕົວເມືອງນະຄອນຫລວງວຽງຈັນ ໄຫລໄປໂຮມກັນອອກສູ່ແມ່ນໍ້າຂອງ. ແຕ່ເນື່ອງຈາກລະດັບນໍ້າ ໃນແມ່ນໍ້າຂອງສູງຂຶ້ນກວ່າລະດັບນໍ້າໃນຫ້ວຍຫມາກຮຽວ ປະມານ 2 ແມັດ ເພື່ອປ້ອງກັນບໍ່ໃຫ້ນໍ້າຍູ້ອັ່ງຖ້ວມຕົວເມືອງນະຄອນຫລວງວຽງຈັນ ພາກສ່ວນກ່ຽວ ຂ້ອງ ໄດ້ໃຊ້ເຄື່ອງຈັກດູດນ້ຳ 7 ເຄື່ອງ ດູດນ້ຳອອກຈາກຫ້ວຍໝາກຮຽວ ສູ່ແມ່ນໍ້າຂອງ ໂດຍສາມາດດູດປະລິມານນໍ້າໄດ້ທັງໝົດ 136.000 ລິດ/ຊົ່ວໂມງ.

ຜ່ານການໃຊ້ເຄື່ອງຈັກດູດນໍ້າ ດັ່ງກ່າວ ແມ່ນສາມາດຮັກສາລະດັບນໍ້າຫ້ວຍໝາກຮຽວ ຢູ່ໃນລະດັບເກນປົກກະຕິ (ລະດັບນໍ້າບໍ່ເພີ່ມຂຶ້ນ) ແລະ ເພື່ອຕິດຕາມສະພາບການຂຶ້ນ-ລົງຂອງນໍ້າ ແລະ ປ້ອງກັນຄວາມສ່ຽງຕ່າງໆທີ່ອາດເກີດຂຶ້ນ, ທາງອົງການປົກຄອງນະຄອນຫລວງວຽງຈັນ ໄດ້ຈັດຕັ້ງຄະນະຮັບຜິດຊອບຜັດປ່ຽນກັນເວນຍາມຢູ່ຈຸດດັ່ງກ່າວ ຕະຫລອດ 24 ຊົ່ວໂມງ ໂດຍປະກອບມີເຈົ້າໜ້າທີ່ທະຫານ, ຕຳຫລວດ, ພະນັກງານພະແນກໂຍທາທິການ ແລະ ຂົນສົ່ງ, ພະແນກກະສິກຳ ແລະ ປ່າໄມ້ ແລະ ການຈັດ ຕັ້ງບ້ານ ຢ່າງຄັກແນ່.

ຂ່າວ: ຂປລ