ລາວ-ຫວຽດນາມເພີ່ມທະວີການຮ່ວມມືພັດທະນາຊົນນະບົດ
ລາວ-ຫວຽດນາມໄດ້ຈັດກອງປະຊຸມພົບປະສອງຝ່າຍໃນວັນທີ 8 ພະຈິກນີ້, ທີ່ນະຄອນຫລວງວຽງຈັນ, ຊຶ່ງຝ່າຍລາວນໍາໂດຍທ່ານ ທອງວັນ ວິໄລເຮືອງ ຮອງຫົວໜ້າຄະນະພັດທະນາຊົນນະບົດ ແລະ ລຶບລ້າງຄວາມທຸກຍາກຂັ້ນສູນກາງ ແລະ ຫວຽດນາມນໍາໂດຍ ທ່ານ ເລ ວັນ ເລີນ ຮອງຫົວໜ້າຄະນະຊີ້ນໍາພາກຕາເວັນຕົກສ່ຽງເໜືອສູນກາງພັກກອມມູນິດຫວຽດນາມ.
ການພົບປະໃນຄັ້ງນີ້, ສອງຝ່າຍໄດ້ມີການແລກປ່ຽນສະຫລຸບຕີລາຄາຄືນໝາກຜົນໃນການຮ່ວມມືໃນໄລຍະຜ່ານມາ, ຊຶ່ງໄດ້ມີຜົນສໍາເລັດອັນຕັ້ງໜ້າໃນຫລາຍດ້ານ, ໂດຍສະເພາະໂຄງການຮ່ວມມືພັດທະນາເຂດຊາຍແດນລາວ-ຫວຽດນາມທີ່ໄດ້ຈັດຕັ້ງປະຕິບັດຢູ່ 15 ຈຸດສຸມ (ກຸ່ມບ້ານ) ທີ່ນອນຢູ່ 13 ເມືອງຂອງ 10 ແຂວງແມ່ນໄດ້ມີຜົນສໍາເລັດເປັນຢ່າງດີ. ພ້ອມນີ້ສອງຝ່າຍໄດ້ເປັນເອກະພາບກໍານົດທິດທາງການຮ່ວມມືໃນຊຸມປີຕໍ່ໜ້າ 2018-2025, ໂດຍຈະສຸມໃສ່ບູລະນະສ້ອມແປງບັນດາກິດຈະກໍາ ແລະ ໂຄງການຕ່າງໆມີ 68 ໂຄງການ, ລວມມູນຄ່າຫລາຍກວ່າ 67 ຕື້ກີບ ແລະ ສືບຕໍ່ສຸມທຶນໃສ່ພັດທະນາ 15 ຈຸດສຸມ ເພື່ອຍົກລະດັບການພັດທະນາໃຫ້ຂຶ້ນສູ່ຄຸນນະພາບໃໝ່ ແລະ ປັບປຸງຄຸນນະພາບຊີວິດການເປັນຢູ່ທາງດ້ານວັດຖຸ ແລະ ຈິດໃຈຂອງປະຊາຊົນໃຫ້ສູງຂຶ້ນມີ 84 ໂຄງການ ລວມມູນຄ່າ 107 ຕື້ກວ່າກີບ. ພ້ອມນີ້, ສອງຝ່າຍເຫັນດີເປັນເອກະພາບຮັບຮອງເອົາ 13 ຈຸດສຸມໃໝ່, ເພື່ອເປັນຈຸດສຸມຮ່ວມມືພັດທະນາຊາຍແດນລາວ-ຫວຽດນາມໄລຍະປີ 2018-2025 ມີ 312 ໂຄງການລວມມູນຄ່າກວ່າ 891 ຕື້ກີບ.
ເພື່ອເປັນກົນໄກສະໜອງທຶນໃນການຈັດຕັ້ງປະຕິບັດໂຄງການຢູ່ 13 ຈຸດສຸມໃໝ່ນີ້, ຝ່າຍລາວໄດ້ສະເໜີໃຫ້ຝ່າຍຫວຽດນາມຊ່ວຍເຫລືອລ້າ 50% ແລະ ຝ່າຍລາວລົງທຶນ 50%, ພ້ອມນີ້ຢາກໃຫ້ຄະນະຊີ້ນໍາພັດທະນາເຂດພາກຕາເວັນຕົກສຽງເໜືອ ສສ.ຫວຽດນາມ ຊ່ວຍປະສານງານ ແລະ ຊີ້ນໍາບັນດາຂະແໜງການທີ່ກ່ຽວຂ້ອງໂດຍສະເພາະກະຊວງກະສິກໍາ ແລະ ພັດທະນາຊົນນະບົດຂອງຫວຽດນາມ ໃຫ້ການຊ່ວຍເຫລືອແກ່ລາວໃນການສ້າງຕົວແບບຊົນນະບົດໃໝ່ຢູ່ບັນດາຈຸດສຸມຕາມບໍລິເວນຊາຍແດນ, ແນໃສ່ເພີ່ມທະວີການຮ່ວມມືກັນ ໃນລະດັບທ້ອງຖິ່ນໃຫ້ເລິກເຊິ່ງກວ່າເກົ່າ, ໂດຍເນັ້ນໃສ່ການຮ່ວມກັນສ້າງໂຄງການຕົວແບບ, ສ້າງຊົນນະບົດຢູ່ຕາມບໍລິເວນຊາຍແດນໃຫ້ເປັນຮູບປະທໍາຕົວຈິງ.
