ອິດສະລາແອນໂຈມຕີຄ້າຍຜູ້ລີ້ໄພຢູ່ເວສແບງ ສັງຫານເຈົ້າໜ້າທີ່ UNRWA

     ຖືເປັນກໍລະນີທີ່ບໍ່ຄ່ອຍເກີດຂຶ້ນ ທີ່ບຸກຄະລາກອນຂອງສໍານັກງານສະຫະປະຊາຊາດຢູ່ປາແລັສຕິນປະຈໍາເຂດເວສແບງ ເສຍຊີວິດຈາກການໂຈມຕີຂອງອິດສະລາແອນ.

     ວັນທີ 14 ກັນຍາ, ສໍານັກງານບັນເທົາທຸກ ແລະ ຈັດຫາງານຂອງສະຫະປະຊາຊາດ ສໍາລັບຜູ້ລີ້ໄພປາແລັສຕິນຢູ່ຕາເວັນອອກໃກ້ (UNRWA) ອອກຖະແຫລງການວ່າ: ທ່ານ ຊຸບຢັນ ຈາເບີ ອາເບັດ ຈາວວັດ ຊາວປາແລັສຕິນ ເຊິ່ງເຮັດວຽກເປັນພະນັກງານອະນາໄມຂອງ UNRWA ເສຍຊີວິດຈາກການຖືກຍິງໂດຍທະຫານອິດສະລາແອນ ເຊິ່ງຈູ່ໂຈມຄ້າຍຜູ້ລີ້ໄພຟາຣາ ໃນເຂດເວສແບງ.

     ຖະແຫລງການຂອງ UNRWA ລະບຸອີກວ່າ: ເປັນຄັ້ງທໍາອິດໃນຮອບກວ່າ 10 ປີ ເຊິ່ງເຈົ້າໜ້າທີ່ຂອງໜ່ວຍງານເສຍຊີວິດຈາກປະຕິບັດການຂອງກອງທັບອິດສະລາແອນໃນເຂດເວສແບງ.

      ສ່ວນກອງທັບອິດສະລາແອນອອກຖະແຫລງການກ່ຽວກັບເລື່ອງນີ້ວ່າ: ມີການປະຕິບັດການດ້ານຄວາມໝັ້ນຄົງເປັນເວລາ 48 ຊົ່ວໂມງ ຈົນຮອດວັນທີ 13 ກັນຍາຜ່ານມາ ຢູ່ເຂດທູບາສ ທາມຸນ ແລະ ຟາຣາ ເຊິ່ງຕັ້ງຢູ່ທາງຕາເວັນອອກສຽງເໜືອຂອງເມືອງນາບລຸສ ໃນເຂດເວສແບງ ໂດຍການໂຈມຕີຂອງເຈົ້າໜ້າທີ່ມີການໃຊ້ເຮືອບິນ ແລະ ສົ່ງຜົນເຮັດໃຫ້ມີຜູ້ກໍ່ການຮ້າຍເສຍຊີວິດຢ່າງໜ້ອຍ 5 ຄົນ.

     ເຫດການດັ່ງກ່າວເກີດຂຶ້ນພາຍໃນເວລາພຽງບໍ່ເທົ່າໃດວັນ ພາຍຫລັງກອງທັບອິດສະລາແອນໂຈມຕີທາງອາກາດ ສ້າງຄວາມເສຍຫາຍຢ່າງໜັກໃຫ້ໂຮງຮຽນອັລ-ຈາວນີ ໃນເມືອງນູໄຊຣັດ ທາງພາກກາງຂອງເຂດກາຊາ ໃນວັນທີ 11 ກັນຍາຜ່ານມາ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 18 ຄົນ ໃນຈໍານວນນີ້ 6 ຄົນ ເປັນເຈົ້າໜ້າທີ່ຂອງ UNRWA.