ຕໍາຫລວດແຂວງຫລວງນໍ້າທາຈັບຜູ້ລັກລອບຄ້າຝິ່ນມາດໍາເນີນຄະດີ
ເຈົ້າໜ້າທີ່ ປກສ ແຂວງຫລວງນໍ້າທາ ໃຫ້ຮູ້ວ່າ: ເມື່ອບໍ່ດົນມານີ້, ກໍາລັງເຈົ້າ ໜ້າທີ່ຂອງຕົນ, ສາມາດຈັບຕົວທ້າວ ເຄີແຊ ອາຍຸ 22 ປີຢູ່ບ້ານນ້ຳສາເມືອງ ແລະ ແຂວງຫລວງນ້ຳທາມາດໍາເນີນຄະດີໃນຂໍ້ຫາຄ້າຂາຍຢາເສບຕິດ.
ເຈົ້າໜ້າທີ່ ໃຫ້ຮູ້ວ່າ: ພາຍຫລັງໄດ້ຮັບແຈ້ງຈາກພົນລະເມືອງດີວ່າຈະມີການລັກລອບຂົນສົ່ງຢາເສບຕິດເປັນຈໍານວນຫລາຍໃນເທດສະບານແຂວງ, ຈຶ່ງໄດ້ຈັດກຳລັງລົງຕິດຕາມ ແລະ ພົບເຫັນເປົ້າໝາຍຂັບຂີ່ລົດຈັກມາຕາມເສັ້ນທາງເຂດບ້ານວຽງຄຳ, ເຈົ້າໜ້າທີ່ຈຶ່ງໄດ້ເຂົ້າກັກຕົວພ້ອມກວດພົບເຫັນຝິ່ນນໍ້າໜັກ 2 ກິໂລ. ຈາກນັ້ນໄດ້ໄປກວດຄົ້ນເຮືອນຜູ້ກ່ຽວ ແລະ ພົບເຫັນຝິ່ນຕື່ມອີກ 5,6 ກິໂລກ, ຈຶ່ງຢຶດໄວ້ເປັນຫລັກຖານເພື່ອດໍາເນີນຄະດີ.
ຜ່ານການສືບສວນ-ສອບສວນຂອງເຈົ້າໜ້າທີ່ທ້າວ ເຄີແຊ ໄດ້ຮັບສາລະພາບວ່າ: ຝິ່ນດັ່ງກ່າວແມ່ນຂອງຕົນແທ້, ເຊິ່ງເອົາມາຈາກຂະບວນການດຽວກັນຢູ່ແຂວງຜົ້ງສາລີ ເພື່ອເອົາໄປຂາຍຕໍ່ໃຫ້ຜູ້ສັ່ງຊື້ແຕ່ຖືກເຈົ້າໜ້າທີ່ຈັບຕົວກ່ອນ ແລະປັດຈຸບັນ, ເຈົ້າໜ້າທີ່ພວມຂະຫຍາຍຜົນຫາຜູ້ຮ່ວມຂະບວນການເພື່ອຈັບຕົວມາດໍາເນີນຄະດີຕາມລະບຽບກົດໝາຍ.
