ຫວຽດນາມເລັ່ງຄົ້ນຫາອີກ 40 ຊີວິດ ຍັງສູນຫາຍຈາກຄວາມຮຸນແຮງຂອງພາຍຸຢາງິ

      ເຈົ້າໜ້າທີ່ຂອງຫວຽດນາມເດີນໜ້າຄົ້ນຫາຜູ້ສູນຫາຍອີກປະມານ 40 ຄົນ ຈາກອິດທິພົນຮຸນແຮງຂອງພາຍຸຢາງິ. ຂະນະທີ່ຈໍານວນຜູ້ເສຍຊີວິດເພີ່ມຂຶ້ນຕໍ່ເນື່ອງເປັນ 60 ກວ່າຄົນແລ້ວ.

     ວັນທີ 10 ກັນຍາ, ສື່ທ້ອງຖິ່ນຂອງຫວຽດນາມລາຍງານວ່າ: ຈໍານວນຜູ້ເສຍຊີວິດໃນປະເທດຈາອິດທິພົນຮຸນແຮງຂອງພາຍຸໄຕ້ຝຸ່ນຢາງິເພີ່ມເປັນຢ່າງໜ້ອຍ 63 ຄົນ ແລະ ມີຜູ້ໄດ້ຮັບບາດເຈັບອີກ 200 ກວ່າຄົນ. ເຖິງຢ່າງໃດກໍຕາມ, ມີທ່າອ່ຽງຈໍານວນຜູ້ເສຍຊີິວດຈະເພີ່ມຂຶ້ນອີກ ເນື່ອງຈາກເຈົ້າໜ້າທີ່ຍັງຄົ້ນຫາຜູ້ເສຍຊີວິດອີກປະມານ 40 ຄົນ ແລະ ການຄົ້ນຫາຍັງຜະເຊີນອຸປະສັກ ເນື່ອງຈາກລະດັບນໍ້າໃນພື້ນທີ່ປະສົບໄພຍັງສູງ.

      ທັງນີ້, ພາຍຸຢາງິພັດຂຶ້ນຝັ່ງບໍລິເວນເມືອງຮາຍຟອງກັບແຂວງກວາງນິມ ທາງພາກເໜືອຂອງຫວຽດນາມ ໃນວັນທີ 7 ກັນຍາຜ່ານມາ ດ້ວຍຄວາມໄວລົມສູງສຸດໃກ້ສູນກາງເກືອບ 200 ກິໂລແມັດຕໍ່ຊົ່ວໂມງ ຖືວ່າຮຸນແຮງທີ່ສຸດຂອງທະວີບອາຊີໃນປີນີ້ ແລະ ຫລາຍທີ່ສຸດໃນຮອບຫລາຍທົດສະວັດຂອງຫວຽດນາມ ກ່ອນອ່ອນກໍາລັງລົງຢ່າງຕໍ່ເນື່ອງ ຈົນເຫລືອເປັນພຽງຄວາມກົດດັນອາກາດຕໍ່າກໍາລັງແຮງ.

     ຂະນະທີ່ໃນອາທິດຜ່ານມາ, ພາຍຸຢາງິພັດຂຶ້ນຝັ່ງຟີລິບປິນ ແລະ ມົນທົນໄຫ່ໜານຂອງຈີນ ດ້ວຍຄວາມໄວລົມຫລາຍກວ່າ 230 ກິໂລແມັດຕໍ່ຊົ່ວໂມງ ຮຸນແຮງລະດັບຊຸບເປີໄຕ້ຝຸ່ນ ສົ່ງຜົນເຮັດໃຫ້ມີຜູ້ເສຍຊີວິດຢູ່ຟີລິບປິນຢ່າງໜ້ອຍ 20 ຄົນ ແລະ ຢູ່ຈີນຢ່າງໜ້ອຍ 4 ຄົນ.