ອິດສະລາແອນໂຈມຕີພື້ນທີ່ປອດໄພຢູ່ກາຊາ ອ້າງເປັນບ່ອນລີ້ຊ້ອນຂອງກຸ່ມຮາມັດ ມີຜູ້ເສຍຊີວິດແລ້ວ 40 ຄົນ

     ມີຜູ້ເສຍຊີວິດຢ່າງໜ້ອຍ 40 ຄົນ ຈາກເຫດການກອງທັບອິດສະລາແອນໂຈມຕີເຂດມະນຸດສະທໍາທາງພາກໃຕ້ຂອງເຂດກາຊາ ໂດຍໃຫ້ເຫດຜົນວ່າ: ເປັນບ່ອນລີ້ຊ້ອນຂອງກຸ່ມຮາມັດ.

     ວັນທີ 10 ກັນຍາ, ສໍານັກງານປ້ອງກັນໄພພົນລະເຮືອນຂອງເຂດກາຊາ ລາຍງານວ່າ: ກອງທັບອິດສະລາແອນປະຕິບັດການໂຈມຕີທາງອາກາດ ຢູ່ເມືອງອັລ-ມາວາຊີ ເຊິ່ງຖືເປັນພື້ນທີ່ມະນຸດສະທໍາ ເນື່ອງຈາກມີປະຊາຊົນອາໄສຢູ່ຢ່າງໜາແໜ້ນ ຕັ້ງຢູ່ໃກ້ເມືອງຂ່ານ ຢູນິສ ໃນພາກໃຕ້ຂອງເຂດກາຊາ ສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 40 ຄົນ ແລະ ມີຜູ້ໄດ້ຮັບບາດເຈັບອີກ 60 ກວ່າຄົນ.

      ຂະນະທີ່ກອງທັບອິດສະລາແອນອອກຖະແຫລງການວ່າ: ການໂຈມຕີດັ່ງກ່າວທີ່ເກີດຂຶ້ນໃນຕອນເຊົ້າຂອງວັນທີ 10 ກັນຍາ ມີເປົ້າໝາຍເພື່ອທໍາລາຍຖານທີ່ໝັ້ນຂອງກຸ່ມຮາມັດ ເຊິ່ງອາໄສພື້ນທີ່ປອດໄພແຫ່ງນີ້ເປັນຖານກໍາບັງ. ສ່ວນກຸ່ມຮາມັດອອກຖະແຫລງການປະຕິເສດ ໂດຍຢືນຢັນວ່າ: ບໍ່ມີການໃຊ້ພື້ນທີ່ດັ່ງກ່າວ.

     ຢ້ອນກັບໄປໃນເດືອນກໍລະກົດຜ່ານມາ, ກອງທັບອິດສະລາແອນໂຈມຕີທາງອາກາດບໍລິເວນນີ້ ສົ່ງຜົນເຮັດໃຫ້ມີຜູ້ເສຍຊີວິດ 90 ກວ່າຄົນ ເພື່ອສັງຫານທ່ານ ໂມຮໍາເໝັດ ເດອິບ ຜູ້ນໍາກອງພົນນ້ອຍອັລ-ກໍຊໍາ ເຊິ່ງເປັນກອງກໍາລັງຕິດອາວຸດຂອງກຸ່ມຮາມັດ ແລະ ທ່ານ ຣາຟາ ຊາລາມາ ຜູ້ຊ່ວຍຂອງທ່ານ ເດອິບ.