ອຸຍເນັສໂກເປັນຫ່ວງ ລະບົບການສຶກສາທົ່ວໂລກຕົກເປັນເປົ້າໝາຍຂອງການໂຈມຕີເພີ່ມຂຶ້ນ

      ອົງການການສຶກສາ, ວິທະຍາສາດ ແລະ ວັດທະນະທໍາແຫ່ງສະຫະປະຊາຊາດ (ອຸຍເນັສໂກ) ເປີດເຜີຍວ່າ: ໃນໄລຍະ 2 ປີຜ່ານມາ, ສະຖາບັນການສຶກສາ, ຜູ້ຊ່ຽວຊານ ແລະ ນັກຮຽນ ຖືກໂຈມຕີສູງເຖິງ 6,000 ຄັ້ງ ໂດຍສະເພາະໃນປະເທດກໍາລັງຜະເຊີນຄວາມຂັດແຍ່ງ.

     ວັນທີ 10 ກັນຍາ, ຂໍ້ມູນຈາກກຸ່ມການຮ່ວມມືລະດັບໂລກເພື່ອປົກປ້ອງການສຶກສາຈາກການໂຈມຕີ ລະບຸວ່າ: ລະຫວ່າງປີ 2022-2023 ມີນັກຮຽນ, ຜູ້ຊ່ຽວຊານ ແລະ ສະຖາບັນການສຶກສາທົ່ວໂລກ ຖືກໂຈມຕີສູງເຖິງ 6,000 ຄັ້ງ ແລະ ມີສະຖາບັນການສຶກສາຖືກໃຊ້ເພື່ອຜົນປະໂຫຍດທາງການທະຫານ 1,000 ຄັ້ງ ຫລື ສະເລ່ຍມື້ລະ 8 ຄັ້ງ ເຊິ່ງເພີ່ມຂຶ້ນ 20% ເມື່ອທຽບໃສ່ປີກ່ອນໜ້າ.

      ການໂຈມຕີເຫລົ່ານີ້ເກີດຂຶ້ນເພີ່ມຂຶ້ນເລື້ອຍໆໃນປະເທດປະສົບບັນຫາການຂັດແຍ່ງກັນທາງອາວຸດໃນປະເທດ ໂດຍສະເພາະຢູ່ມຽນມາ, ຕາເວັນອອກກາງ ແລະ ເຂດກາຊາ ລວມທັງຄອງໂກ, ຊູດັງ, ອູແກຣນ ແລະ ເຢເມນ.