ໂປໂລຍແຫ້ງແລ້ງໜັກ ລະດັບນໍ້າໃນແມ່ນໍ້າສາຍຫລັກຫລຸດຕໍ່າສຸດເປັນປະຫວັດສາດ

      ຄວາມແຫ້ງແລ້ງທີ່ຮຸນແຮງເນື່ອງຈາກການປ່ຽນແປງສະພາບອາກາດຢູ່ໂປໂລຍ ສົ່ງຜົນເຮັດໃຫ້ລະດັບນໍ້າໃນແມ່ນໍ້າຫລຸດລົງຢ່າງຕໍ່ເນື່ອງ ລວມທັງແມ່ນໍ້າວິສຕູລາ ເຊິ່ງແມ່ນໍ້າຍາວທີ່ສຸດຂອງປະເທດ.

     ວັນທີ 9 ກັນຍາ, ລະດັບນໍ້າຂອງແມ່ນໍ້າວິສຕູລາຫລຸດລົງເຫລືອພຽງ 25 ຊັງຕີແມັດ ທໍາລາຍສະຖິຕິເກົ່າ 1 ຊັງຕີແມັດ. ຂະນະທີ່ສະຖາບັນອຸຕຸນິຍົມວິທະຍາ IMGW ລະບຸວ່າ: ສະຖານະການດັ່ງກ່າວຮ້າຍແຮງກວ່າປີ 2015 ແລະ ລະດັບນໍ້າຍັງຫລຸດລົງຢ່າງຕໍ່ເນື່ອງ.

     ທ່ານ ເກຣເຊກໍ ວາລິເຢສກີ ນັກອຸທົກວິທະຍາຂອງ IMGW ເຕືອນວ່າ: ແມ່ນໍ້າໃນໂປໂລຍຫລາຍແຫ່ງກໍາລັງປະສົບໄພແຫ້ງແລ້ງ ເນື່ອງຈາກໄພແຫ້ງແລ້ງທາງອຸທົກວິທະຍາທີ່ເກີດຂຶ້ນມາດົນ ເຊິ່ງສົ່ງຜົນເຮັດໃຫ້ກາຍເປັນໄພແຫ້ງແລ້ງຖາວອນນັບແຕ່ປີ 2015 ເປັນຕົ້ນມາ ໂດຍສາເຫດຕົ້ນຕໍມາຈາກການປ່ຽນແປງສະພາບອາກາດ. ຂະນະທີ່ລະດູໜາວເຊິ່ງອົບອຸ່ນຂຶ້ນ, ຫິມະ ແລະ ຝົນທີ່ຕົກໜ້ອຍລົງ ແລະ ອຸນຫະພູມທີ່ສູງຂຶ້ນສົ່ງຜົນເຮັດໃຫ້ລະດັບນໍ້າຫລຸດລົງຕໍ່າ.

     ແມ່ນໍ້າວິສຕູລາເປັນແມ່ນໍ້າຍາວທີ່ສຸດໃນບັນດາປະເທດສະມາຊິກສະຫະພາບເອີຣົບ (EU) ມີໄລຍະທາງຫລາຍກວ່າ 1,000 ກິໂລແມັດ ແບ່ງປະເທດອອກເປັນ 2 ສ່ວນ ແລະ ໄຫລລົງສູ່ທະເລບໍຕິກ.