ລີບັງປະນາມອິດສະລາແອນໂຈມຕີສັງຫານເຈົ້າໜ້າທີ່ກູ້ໄພ ເຮັດໂບລາຍິງຈະຫລວດອີກ

     ລັດຖະບານລີບັງປະນາມອິດສະລາແອນໂຈມຕີທາງອາກາດສັງຫານເຈົ້າໜ້າທີ່ບັນເທົາທຸກຢ່າງໜ້ອຍ 3 ຄົນ. ເຖິງຢ່າງໃດກໍຕາມ, ກຸ່ມແຮັດໂບລາເຊິ່ງໃຊ້ລີບັງເປັນຖານຍິງຈະຫລວດໂຈມຕີອິດສະລາແອນ.

     ວັນທີ 8 ກັນຍາ, ກະຊວງສາທາລະນະສຸກລີບັງລາຍງານວ່າ: ເຈົ້າໜ້າທີ່ບັນເທົາທຸກຢ່າງໜ້ອຍ 3 ຄົນ ເສຍຊີວິດ ແລະ ມີອີກຢ່າງໜ້ອຍ 2 ຄົນໄດ້ຮັບບາດເຈັບ ຈາກປະຕິບັດການໂຈມຕີທາງອາກາດຂອງອິດສະລາແອນ ຢູ່ເມືອງໂຟຣອຸນ ທາງພາກໃຕ້ຂອງລີບັງ.

     ຖະແຫລງການດັ່ງກ່າວຂອງລັດຖະບານລີບັງລະບຸອີກວ່າ: ເຈົ້າໜ້າທີ່ທີ່ເສຍຊີວິດ ແລະ ໄດ້ຮັບບາດເຈັບມາຈາກໜ່ວຍງານປ້ອງກັນໄພພົນລະເຮືອນ ຢູ່ລະຫວ່າງຊ່ວຍກັນມອດໄຟທີ່ເກີດຂຶ້ນຈາກປະຕິບັດການໂຈມຕີທາງອາກາດຂອງກອງທັບອິດສະລາແອນ. ຂະນະທີ່ກອງທັບອິດສະລາແອນອອກຖະແຫລງການໃນເວລາຕໍ່ມາ ຢືນຢັນການເປັນຜູ້ໂຈມຕີທາງອາກາດໃນບໍລິເວນດັ່ງກ່າວແທ້ ເພື່ອຈັດການສະມາຊິກກຸ່ມກໍ່ການຮ້າຍທີ່ເປັນເຄືອຂ່າຍຂອງກຸ່ມແຮັດໂບລາ.

     ສ່ວນນາຍົກລັດຖະມົນຕີ ນາຈິບ ມິກາຕີ ຜູ້ນໍາລີບັງ ປະນາມການໂຈມຕີດັ່ງກ່າວ ເປັນການລະເມີດກົດໝາຍສາກົນຢ່າງຮ້າຍແຮງ ແລະ ທໍາລາຍຄຸນຄ່າທາງສິດທິມະນຸດ.

     ເຖິງຢ່າງໃດກໍຕາມ, ຕໍ່ຈາກນັ້ນບໍ່ດົນ ກຸ່ມແຮັດໂບລາ ເຊິ່ງມີຖານທີ່ໝັ້ນຢູ່ພາກໃຕ້ຂອງລີບັງ ລາຍງານການຍິງຈະຫລວດໃສ່ທ້ອງຖິ່ນໃນເມືອງຊາເມຍ ທາງພາກເໜືອຂອງອິດສະລາແອນ ເພື່ອທໍາລາຍຖານປະຈໍາການຂອງອິດສະລາແອນໃນບໍລິເວນນັ້ນ, ສ່ວນກອງທັບອິດສະລາແອນຢືນຢັນວ່າ: ໂຈມຕີທາງອາກາດຕອບໂຕ້ ດ້ວຍການທໍາລາຍໂຄງລ່າງພື້ນຖານທີ່ກ່ຽວຂ້ອງກັບກຸ່ມແຮັດໂບລາຢູ່ພາກຕາເວັນອອກ ແລະ ພາກໃຕ້ຂອງລີບັງ.

     ທັງນີ້, ອິດສະລາແອນ ແລະ ກຸ່ມແຮັດໂບລາຢູ່ລີບັງ ໂຈມຕີຕອບໂຕ້ຂ້າມຊາຍແດນກັນບໍ່ເວັ້ນແຕ່ລະວັນ ນັບແຕ່ສົງຄາມຢູ່ເຂດກາຊາເລີ່ມຂຶ້ນ ໃນວັນທີ 7 ຕຸລາ 2023 ຈົນຮອດປັດຈຸບັນມີຜູ້ເສຍຊີວິດຢູ່ລີບັງຫລາຍກວ່າ 600 ຄົນ ສ່ວນຫລາຍເປັນສະມາຊິກກຸ່ມແຮັດໂບລາ ແລະ ຢູ່ອິດສະລາແອນມີຜູ້ເສຍຊີວິດປະມານ 30 ຄົນ ສ່ວນຫລາຍເປັນທະຫານອິດສະລາແອນ.