ພາຍຸໄຕ້ຝຸ່ນຢາງິພັດຂຶ້ນຝັ່ງຕອນໃຕ້ຂອງຈີນ ອົບພະຍົບປະຊາຊົນ 1 ລ້ານຄົນ
ພາຍຸໄຕ້ຝຸ່ນຢາງິ ເຊິ່ງຖືເປັນພາຍຸຮຸນແຮງທີ່ສຸດພັດຖະຫລົ່ມທະວີບອາຊີໃນປີນີ້ ພັດຂຶ້ນຝັ່ງທາງພາກໃຕ້ຂອງຈີນໃນວັນທີ 6 ກັນຍາ ເຖິງ 2 ຮອບ ສົ່ງຜົນເຮັດໃຫ້ເກີດກະແສລົມພັດແຮງ ແລະ ຝົນຕົກໜັກ ແລະ ເຮັດໃຫ້ປະຊາຊົນ 1 ລ້ານກວ່າຄົນຕ້ອງອົບພະຍົບປະຖິ້ມບ້ານເຮືອນ.
ໂດຍພາຍຸໄຕ້ຝຸ່ນຢາງິ ເຊິ່ງກ່ອນໜ້ານີ້ມີກໍາລັງລົມແຮງເຖິງ 245 ກິໂລແມັດຕໍ່ຊົ່ວໂມງ ແລະ ຂ້າຊີວິດປະຊາຊົນຢູ່ຟີລິບປິນແລ້ວ 16 ຄົນ ໄດ້ພັດຂຶ້ນຝັ່ງຮອບທໍາອິດຢູ່ເມືອງເຫວິນຊາງ ມົນທົນໄຫ່ໜານ ເວລາປະມານ 16:20 ໂມງ ຕາມເວລາທ້ອງຖິ່ນ ກ່ອນຈະພັດຂຶ້ນຝັ່ງຮອບທີ 2 ຢູ່ເຂດຊີ່ເຫວິນ ມົນທົນກວາງຕຸ້ງທີ່ຢູ່ໃກ້ຄຽງ.
ອິດທິພົນຂອງພາຍຸສົ່ງຜົນເຮັດໃຫ້ເກີດກະແສໄຟຟ້າດັບ ກະທົບບ້ານເຮືອນປະຊາຊົນກວ່າ 5 ແສນຫລັງ ໂດຍໂຮງຮຽນ, ສະຖານທີ່ທຸລະກິດ, ສະຖານທີ່ທ່ອງທ່ຽວຫລາຍແຫ່ງຕ່າງປິດຊົ່ວຄາວ. ຂະນະທີ່ລະບົບຂົນສົ່ງສາທາລະນະ ແລະ ຖ້ຽວບິນທັງຂາເຂົ້າ ແລະ ຂາອອກຕ້ອງຢຸດໃຫ້ບໍລິການ.
ຫລ້າສຸດພາຍຸໄຕ້ຝຸ່ນຢາງິທີ່ອ່ອນກໍາລັງລົງເລັກໜ້ອຍຈາກພາຍຸໄຕ້ຝຸ່ນລະດັບ 4 ເປັນລະດັບ 3 ດ້ວຍກໍາລັງລົມສູງສຸດ 187 ກິໂລແມັດຕໍ່ຊົ່ວໂມງ ກໍາລັງເຄື່ອນທີ່ເໜືອອ່າວຕັງເກຍ ແລະ ມຸ້ງໜ້າໄປທາງພາກເໜືອຂອງຫວຽດນາມ ໂດຍຄາດວ່າຈະພັດຂຶ້ນຝັ່ງໃນຕອນບ່າຍວັນທີ 7 ກັນຍານີ້.
ເຊິ່ງທາງການໄດ້ກຽມກໍາລັງເຈົ້າໜ້າທີ່ກອງທັບ 4.6 ແສນກວ່າຄົນ ເພື່ອຮັບມືຜົນກະທົບຈາກພາຍຸ ແລະ ກຽມພ້ອມອົບພະຍົບປະຊາຊົນຫລາຍໝື່ນຄົນໃນພື້ນທີ່ສ່ຽງຢູ່ແຂວງຮາຍຟອງ ແລະ ທາຍບິນ. ພ້ອມທັງກຽມປິດສະໜາມບິນ 4 ແຫ່ງທາງພາກເໜືອຂອງປະເທດ ເພື່ອປ້ອງກັນອັນຕະລາຍຈາກພາຍຸ.
ອ້າງອີງ:
- https://www.reuters.com/world/asia-pacific/super-typhoon-yagi-sets-sight-vietnam-after-tearing-through-chinas-hainan-2024-09-07/
- https://www.bbc.com/news/articles/c4gz3rk71n7o
- https://www.theguardian.com/world/article/2024/sep/07/super-typhoon-yagi-hits-chinas-hainan-forcing-1-million-to-leave-their-homes
