ອຸນຫະພູມສະເລ່ຍລະດູຮ້ອນຂອງ ສ.ເກົາຫລີ ປີນີ້ ສູງທີ່ສຸດເປັນປະຫວັດສາດ

     ຂໍ້ມູນຢ່າງເປັນທາງການຂອງ ສ.ເກົາຫລີ ລະບຸວ່າ: ອຸນຫະພູມສະເລ່ຍຂອງປະເທດໃນຊ່ວງລະດູຮ້ອນທີ່ຫາກໍຜ່ານພົ້ນໄປ ສ້າງສະຖິຕິສູງທີ່ສຸດເປັນປະຫວັດສາດ.

     ວັນທີ 5 ກັນຍາ, ກົມອຸຕຸນິຍົມວິທະຍາເກົາຫລີ (KMA) ລາຍງານອຸນຫະພູມສະເລ່ຍຂອງປະເທດລະຫວ່າງເດືອນມິຖຸນາ-ສິງຫາຜ່ານມາ ຢູ່ລະດັບ 25.6 ອົງສາ ຖືເປັນສະຖິຕິສູງທີ່ສຸດນັບແຕ່ KMA ສ້າງລະບົບເພື່ອຮວບຮວມຂໍ້ມູນ ແລະ ວິເຄາະອຸນຫະພູມປະຈໍາເດືອນແບບດັ່ງກ່າວໃນປີ 1973.

     ຂະນະດຽວກັນ, ສະຖິຕິອຸນຫະພູມຊ່ວງລະດູຮ້ອນຂອງ ສ.ເກົາຫລີ ປີນີ້ ຍັງສູງກວ່າຄ່າສະເລ່ຍຂອງປະເທດໃນລະດັບ 1.9 ອົງສາ ເຊິ່ງ KMA ເບິ່ງວ່າ: ສະພາບການປ່ຽນແປງຂອງສະພາບອາກາດໂລກ ຫລື ໂລກຮ້ອນ ສ້າງການປ່ຽນແປງໃຫ້ຮູບແບບອາກາດຂອງ ສ.ເກົາຫລີ ໃນໄລຍະຜ່ານມາ.

     ນອກຈາກນີ້, ສ.ເກົາຫລີ ຍັງຜະເຊີນສະພາບອາກາດຮ້ອນໃນເວລາກາງຄືນ ເຊິ່ງອຸນຫະພູມສູງກວ່າ 25 ອົງສາ ຕໍ່ເນື່ອງຍາວນານທີ່ສຸດ ໂດຍຄ່າສະເລ່ຍຢູ່ລະດັບ 20.2 ວັນ ລະຫວ່າງເດືອນມິຖຸນາ-ສິງຫາຜ່ານມາ ເຊິ່ງຍາວນານກວ່າຄ່າສະເລ່ຍປົກກະຕິ 6.5 ວັນ.

     ສານດີກາ ສ.ເກົາຫລີ ມີຄໍາພິພາກສາໃນອາທິດຜ່ານມາວ່າ: ເປົ້າໝາຍສະພາບອາກາດຕາມແນວທາງຂອງລັດຖະບານຂັດຕໍ່ລັດຖະທໍາມະນູນ ເນື່ອງຈາກຂາດແຜນດໍາເນີນງານທີ່ຈະແຈ້ງໃນການຫລຸດການປ່ອຍແກັສເຮືອນແກ້ວ ລະຫວ່າງປີ 2031-2050. ອີກທັງເປັນການລະເມີດສິດທິມະນຸດ ເຊິ່ງສານຂໍໃຫ້ລັດຖະບານແກ້ໄຂແຜນງານດັ່ງກ່າວ.